ابن ليل

فا جدك قرر وقتها وهو مغلوب علي امره انه يوافق خاف لا دره من كتر ما هي بتحاول والكل واقف قصادها انها تتجوزه من غير علمهم وتوطي راسه في الارض قال تتجوز بمعرفتنا بدل ما تهرب وسيرتها وسيرتنا تبقي علي كل لسان يوسف وقتها كان مستعجل عشان كان حابب يكمل دراسه بره وقال ان دره كمان هتاخد الدكتوراه من هناك وفرصتها هتبقي افضل.

حسن….طيب ولما يوسف جوزها ده كان كويس اوي كده ايه اللي شقلب كيانه

دعاء….منعرفش سبحان مغير القلوب يمكن البت اللي كانت معاهم دي لعبت بدماغه الله اعلم ايه اللي حصل بس طول السنين اللي فاتت عمتك فعلا كانت مبسوطه معاه الله يسامحه بقي وينتقم من اللي خربت بيتهم

حسن…..بيتهيألي لو كرم عرف انها مكانتش بتحبه ممكن يروح فيها

دعاء…..مش هتفرق كتير يا حسن اللي عاشوا كرم طول السنين دي كان كله وجع اهو علي الاقل يعرف انها مكانتش قاصده لا تبيعه ولا تخونه ويعرف ان عبدالله كان مغلوب علي امره

حسن….بس عارفه ياما دره بردوا غلطت في حاجه واحده بس بيتهيألي لو كانت عملتها كان كل ده خلص من زمان

دعاء…ايه هي؟

حسن …المفروض كانت ركنت كل دول علي جنب وراحت لكرم وقالتها في وشه واكيد هو مكانس هيفضل معاها وهي مش عيزاه

دعاء….دره كانت بتحترم كرم وبتعزه وخافت تجرحه كانت فاكره انه مش بيحبها بس كانت عارفه انه حتي لو مش بيحبها هتجرحه انها يعني مش عيزاه وفي النهايه يا ولا عقلها زمان بردوا مكانش زي النهارده كانت صغيره

حسن….عموما يا أما اللي حصل حصل خلاص مفيش حاجه بترجع

دعاء….علي رأيك واكيد الايام قادره تهدي الدنيا بينهم وبين العيليتين

حسن….يارب.

……………….

في صباح يوم جديد صحيت دره والبنات فطروا ولبسوا كانت بتحاول تكون طبيعيه عشان محدش فيهم يسألها علي اي حاجه بعد وقت بسيط نزلوا من الشقه كانوا رايحين يشوفوا موضوع تقديم ورق الجامعه

في الوقت ده دره كانت بتفتح باب الشقه عند نبيله عشان تحضر الفطار.

دعاء…..صباح الخير ايه علي فين؟

دره….صباح النور ابداً كنت رايحه انا والبنات نخلص ورق جامعتهم

دعاء….طيب مقولتيش ليه استني اتصل بحسن ينزل بسرعه ويوصلكم

دره….لا لا مفيش لزوم وبعدين احنا متأخرين.

دعاء….يابنتي متقاوحيش انتي هتعرفي تروحي ولا تيجي علي الاقل عشان يبقي معاكي عربيه