لقاء كارثي

بصيت من فوق لاقيته نزل بهدوء كام درجه عشان اعرف هيدخل انهي شقه وقف قدام باب و خبط سمعت صوتها و هي بتهزر و بتحب فيه و شوفتها وهي بتحضنوا و بعدها دخلوا علي جوه …

نزلت بهدوء صورت باب الشقه والرقم بتاعها و جريت ..

طبعاً قولت لاختي ان الرقم مش بيرد حتي لما جيبت رقم غريب

فضلت بقي اراقب موبايلها كل ما تدخل تاخد شاور اطلعوا اشوف ايه اخر المسدجات اللي بينهم و اخر الڤويسات و كل حاجه بتديه فلوس بتصرف عليه جيباله عربيه الشقه اللي بيتقابلوا فيها كتباها باسمه
مسيطره عليه سيطره مريبه

كانت كل ما تنزل انزل وراها من بعيد و اراقبها والاقيهم بيتقابلوا و كل مره كانوا بيتقابلوا اصورهم من غيرما يحسوا

في يوم هو رجع وانا كنت عند اختي دخل ياخد شاور و اختي قامت مسكت الچاكت بتاعه تفتش فيه كانت الفتره دي عامله زي المجنونه و خلاص مبقاش عندها ثقه في نفسها وهي بتفتش لقت علبه فيها سلسله و كان عيد ميلادها فاضل عليه يومين قولتلها اهدي شكلك ظلمتيه ده جايبلك هديه و عاملك مفجأه رجعيها مكانها واكيد هيفاجئك بلاش تنكدي علي نفسك من الاخر هدتها و اقنعتها شويه

في الفتره دي اصلا انا كنت حاسه ان في مصيبه هتحصل هتحصل لان ماجد كان مغيب ادرجه انه مكانش عامل كنترول علي تصرفاته مبيحاولش حتي انه يقنعها ان مفيش حد في حياته ولا بيحاول يخفف نزول او بيات بره فا كنت حاسه ان حتي لو خبيت علي اختي هيجي عليها يوم و تكتشف بنفسها فا قررت اني اكون جاهزه انا كمان حضرت كل ورقي المهم و كل الورق اللي معايا ده و سيبته في شنطتي علي جنب لاني مكنتش هقدر اعيش معاها تاني بس مشكلتب الوحيده ان المبلغ بتاعي اللي طلع من الشقه كنت سيباه معاها و قولتلها تشغلوا او تعمل بيه اي حاجه عشان مضيعهوش و مكنتش عارفه ازاي هاخده منها قولتلها اني محتاجه الفلوس قالتلي ليه و عيزاهم ليه انا دخلتهم في شغل عشان يجيبلك اكتر و لما تبقي تتجوزي ابقي خديه هينفعك معرفتش اجادلها وقولت مش مهم الفلوس في داهيه

اما كان كل اللي في دماغي وقتها ان اختي لو عرفت مستجيل تكمل مع ماجد و انا مستحيل اكمل معاها و كنت عايزه نجيب شقه ايجار نقعد فيها ونبعد عنهم بس قولت مش مهم نبقي نحلها وقتها..

جه يوم عيد ميلاد اختي خالتوا اتصلت عليها وقالتلها تعالي انتي ونغم عشان عملالك مفجاه انا في الوقت ده كنت ابات عند خالتو يومين و عند اختي باقي الاسبوع مكنتش طايقه اقعد في وشها كنت خايفه من غضبي اتعصب و افضح الدنيا واختي تعرف بس روحت مع اختي عشان مكانش عندي سبب مقنع للاعتراض روحنا و هي مكانتش موجوده كانت تيته بس