چاسمين
چاسمين1
فريد… المشكله مش في الدنيا يا ياسر المشكله في الناس اللي عايشين معانا عليها كل ما بقرب من تفكيرهم و بقرب من نقطة النهايه واحس اني هرفع راية الانتصار بحس بخيبة امل كبير لما الاقي لسه المشوار بعيد و النهايه اللي كنت فاكر اني وصلتلها كانت مجرد سراب و وهم بالظبط زي ما تكون تايهه وسط صحراء وتشوف جبل كبير تفكر انك لو طلعت عليه و وصلت للقمه هتقدر تجيب اخر الصحراء اللي انت تايهه فيها دي بس للأسف لما بتطلع بتتفاجئ ان الجبل ده كان نقطة بدايه جديده لدايرة مش بتخلص هتنزل تاني وتمشي تاني لحد ما تقابل جبل تاني و تطلع عليه وتقول خلاص اكيد انا وصلت تتكرر من تاني نفس الدايره اللي مش بتنتهي.
ياسر… وهو يعني انت اول مره تعرف ان تفكير البشر ملهوش نهايه ؟
فريد…لا بس يمكن التعمق في التفكير احياناً بيصيب العقل بالجنون عارف يا ياسر المشكله في ايه ؟
ياسر…ايه يا صاحبي ؟
فريد…ان احنا سقف التوقعات عندنا كا بشر ديماً اقل من بكتير من العادي و ده بيخلينا مع الوقت نتصدم بالواقع زمان لما كنت عيل صغير كان اقصي طموحاتي لما حد يسالني نفسك تطلع ايه لما تكبر اقولهم ظابط كانوا يسألوني ليه اقولهم عشان امسك مسدس واقبض علي العصابه والحراميه اوقات احلامنا في الطفوله ممكن تتغير لما نكبر بس انا فضلت مصمم علي حلمي لكن فضل سقف توقعاتي للواقع نفس ما كنت طفل اقل من العادي كنت فاكر ان احتكاكي كله هيبقي مثلاً مع حرامي نصاب تاجر مخدرات تاجر سلاح تاجر اثار قاتل
و للأسف كنت فاكر كمان ان الفئه دي هي اخطر فئات موجوده معانا في المجتمع وده عشان زي ما قولتلك احنا البشر ديماً سقف توقعاتنا اقل بكتير من العادي
بس قبل الحادثه بسنتين اكتشفت اني مصدوم من الجرائم الجديده عليا اللي بسمع عنها او بمعني اصح اللي عمري ما كنت مركز فيها او مكنتش اتخيل انها ممكن تكون بتهدد بلاد ومجتمعات وعالم بحاله .
ياسر… انت فاكر ايه يا فريد الناس دي عندها عقائد و نظريات تدمر بجد لما اتكلمنا زمان و قولتلي ان القضيه دي لازم متبقاش علي ورق عشان متأذيش صدقني انا وافقتك مش عشان خايف انا وافقتك عشان نقدر نشتغل براحتنا و عشان خوفي كان عليك اكتر لان انت اللي كان عليك العين وشوفت ان ده اسلم حل.
فريد…للاسف يا ياسر العين مكانتش عليا بس العين كانت علي كل اللي قريبين مني و ده السبب في اني اخلي القضيه والبحث يكون في السر
ياسر…. القرب منهم خطر و عشان كده انا ديماً قلقان عليك
فريد…الدخول وسطهم مش سهل يا ياسر والخروج اصعب بكتير او بالاصح الخروج عندهم ملهوش باب الباب الوحيد ليهم انا وانتوا عارفينه كويس
ياسر… عشان كده بطلب منك ديماً تكون هادي بلاش لحظه وجع تخليك وتخلينا نخسر حياتنا كلها المشكله ان دي مش مجرد قضيه هتوصل فيها للمذنب فا هيتحاسب و انت هتكمل حياتك عادي اللي بيقع فيهم يا فريد بيجي غيره و غيره ده اكبر منه دي دايره يا صاحبي مش بتخلص لازم نحرص علي قد ما نقدر
فريد…. وانا مش بستعجلك يا ياسر ولا عايز اقع ولا اوقعك و لا اوقع اي حد انا عندي روح ضايعه مني بحاول اوصلها بأي طريقه وهي (ساره اختي ) يا ياسر
ياسر… هنوصلها يا فريد ان شاء الله اطمن متقلقش .
فريد… يارب
………….
في الحفله..
خالد.. ايه رأيك في الحفله يا بيري؟
بيري بضيف داخلي نظرت له و هي تبتسم ابتسامه مجامله.
بيري.. حلوه ميرسي يا خالد مكانش ليه لزوم كل ده
خالد… ايه اللي انتي بتقوليه ده دي حاجه بسيطه انا كان في دماغي تخطيط تاني خالص بس قولت بلاش احسن متوافقيش
بيري… تخطيط ايه ؟
خالد…يعني كنت بفكر اني اسافر انا وانتي و نحتفل بيه في اي بلد تعجبك و نرجع في نفس اليوم
بيري…نسافر !! لا كويس اوي كده انت عارف اني اصلا مش بحب الاحتفالات الكبيره والجو ده انا في العادي بحب احتفل بعيد ميلادي في بيتنا او مع صحابي
خالد….افهم من كده انك مش مبسوطه
بيري.. مقصدش طبعاً اني اقلل من مجهودك المبذول في الحفله يعني واضح انك مقصرتش بس انا بقولك علي اللي بحبه انا مليش في الدوشه خالص
خالد….اممم و الله لو عارف انك ممكن توافقي علي الاقل كنا احتفلنا بيه مع بعض من غير الدوشه دي كلها بس قولت ابسطك اكتر
بيري…. ميرسي بجد.يا خالد عموما انا مبسوطه و الحفله حلوه
خالد….لا ده لسه هتعجبك اكتر احنا لسه بنسخن يعني الحفله هتبدا بعد ما نطفي الشمع انتي بس خليكي مستعده.
ابتسمت بيري بهدوء ورن هاتفها لمحت اسم سهر و كأنها جاءت لها من السماء لتنقذها.
بيري…. طيب عن اذنك يا خالد هرد علي سهر.
خالد.. بضيق سلمي عليها
بيري… اوك الووو.
سهر…. ايوه يا قلبي عامله ايه
بيري… كنت بغرق و انتي جيتي انقذتيني
سهر…. بابتسامه يبقي الاستاذ خنقه كان واقف معاكي.
بيري… واي خنقه يا بنتي ده ساحب الاكسچين من المكان كله ده اتصالك ده جالي نجده تصدقي بالله انتي اجدع صاحبه في الدنيا
سهر… طيب فين ملك ومريم و امجد ومازن؟
بيري… موجودين بس مازن الطفس راح ياكل من البوفيه وهما كانوا معاه ومعرفش غطسوا فين
سهر… هو علي طول همه علي بطنه اخوكي ده
بيري…. اعمل ايه بقي قدري
سهر… معلش اهي سهره وتعدي يا روحي المهم انا قولت اكلمك قبل ما اقفل الموبايل واطلع هواء الحلقه بتاعتي كمان 12 دقيقه
بيري… ما تخليكي معايا شويه متبقيش رخمه
سهر…. يابت بقولك خلاص هطلع هواء بصي كده طيب علي ملك ولا اي حد وانا معاكي وروحي اقفي معاه
بيري… والله ما شيفاهم خالص
سهر… طيب كلمي اي حد فيهم علي الموبايل
بيري….وهما هيسمعوني من الدوشه دي عموما هقفل معاكي و اجرب كده
سهر…. ماشي يا روحي المهم اهربي من الخنقه اللي اسمه خالد
بيري… بضحك بيسلم عليكي صحيح
سهر…. سلم عليه عزرائيل يارب
هو انا بطيقه و لا بينزلي من زور
بيري… بضحك طيب بقولك ايه روحي يلا عشان تجهزي وانا هروح اشوفهم بسرعه هو واقف بيتكلم مع ناس ومش واخد باله مني
سهر… طيب يلا روحي بسرعه هكلمك لما اخلص تكوني روحتي
بيري… ماشي يا قلبي يلا باي
سهر…. باي
اغلقت بيري الهاتف و تحركت سريعاً تبحث عن ملك ومريم و فجأه ظهر امامها حمزه
حمزه…بيري
بيري… بتنهيده ضيق حمزه !
حمزه…اخبارك ايه
بيري… بخير الحمد لله
حمزه…كل سنه وانتي طيبه
بيري….شكراً
حمزه…دي حاجه بسيطه يارب تعجبك
نظرت بيري علي الهديه باشمئزاز
بيري… بمناسبة ايه ؟
حمزه…هو مش انتي عيد ميلادك انهارده ؟
بيري… ااااه عشان عيد ميلادي يعني؟
حمزه…اكيد
بيري.. ( بسخريه ) و ياتري بقي جبتها بفلوسك و لا بفلوس خالد اصل اللي اعرفه يعني يا حمزه انك طول عمرك بتقول ان الهدايا واعياد الميلاد مجرد مجاملات اجتماعيه ملهاش اي لازمه وعمرك ما فكرت تجيبلي هديه قبل كده مع العلم انك كنت بتقبل بالهدايا عادي.
حمزه… ولو اني يعني شايف انك بتتريقي بس اه يا بيري انا اللي جايب الهديه بفلوسي
بيري… اممم طيب و اشمعني المرادي بقي يا حمزه ؟ مش شايف يعني انها غريبه انك تجيبلي هديه و تتعب نفسك
حمزه… لا مش غريبه وبعدين مش يمكن عايز اعتذرلك علي اللي حصل مني ؟
بيري… اللي حصل منك ؟! ليه هو انت حصل منك حاجه يا حمزه
حمزه….بيري انا عارف انك مضايقه مني بس انا مش عايزك تفهميني غلط
بيري… افهمك غلط ؟! لا خالص مفيش حاجه تخليني افهمك غلط انت عملت ايه يعني عشان تتفهم غلط يا حمزه بالعكس انت طول عمرك كنت واضح عملي طموحك واصل للهوس بتجري وراء اي طريق يجيبلك فلوس ملكش في المجاملات الاجتماعيه زي ما كنت بتقول كنت بتختفي
او تدب معايا خناقه قبل اي مناسبه و مش بس كده انت عشان الفلوس دوست عليا بأوسخ جزمه عندك قبلت عرض خالد بقيت دراعه اليمين مسكك وظيفه مكنتش تحلم بيها بمرتب عالي و المقابل انك تسيبني و انت صراحه متأخرتش نفذت للراجل كل طلباته فا تفتكر انا ممكن ازعل منك لا يا راجل متقولش كده زي ما قولتلك انت كنت واضح من البدايه بس انا اللي كنت مغفله و فوقت متأخر اوي.
حمزه….بيري انا يمكن اكون ظلمتك بس مش عايزك تفهميني غلط انا مش بياع ولا بجري وراء الفلوس زي ما انتي بتقولي كل الحكايه اني اكتشفت ان لسه قدامي طريق طويل و حسيت اني مش مستعد ادخل في علاقه جاده لان طموحي واحلامي كبار ولسه محققتش حاجه منهم علي فكره احنا ممكن نبقي صحاب جامدين اوي اجمد بكتير من اننا نكون في علاقه
بيري… صحاااب!!
حمزه… اه يا بيري صحاب اوقات العلاقات اللي فيها صداقة بتبقي انجح من علاقات الحب و انا واضح وصريح معاكي و بقولك في وشك بكل صراحه عن احساسي تجاهك بس في نفس الوقت انا مش عايز اخسرك يا بيري علي الاقل كا صديقه و كمان عايز اقولك حاجه مهمه خالد بيحبك اوي يا بيري ياريت تديله فرصه انتي متعرفيش هو تعب ازاي عشان يجهزلك الحفله دي و يعملك مفجأه و يبسطك و كل ده عشان بس يقدر يقرب منك.
بيري… ( بصدمه ) انت بتقول ايه انا مش مصدقه اللي بسمعه منك بجد يعني انت مكانش كفايه عندك انك تسيبني بسبب كلمه منه و تبيعني عشان الفلوس جاي بكل وقاحه تكلمني عن خالد وحبه ليا انت جنسك ايه بجد انت مش مكسوف من نفسك معندك نخوه او رجوله انا بجد قرفانه من نفسي اوي اني حبيتك في يوم من الايام انا بعد اللي عملته فيا كان ممكن اصدق عليك اي حاجه الا انها توصل معاك لكده الله يلعن اليوم اللي عرفتك فيه يا حقير.
