لقاء كارثي

لقاء كارثي
أميره أسامه
صاحبة البطل الواحد

~° البارت الحادي والثلاثون°~
……………

صوت ضحك ايه علي سلامه كان بيعمل صدي في المحل مكانتش قادره تفصل من كتر الضحك علي منظره هما الاثنين لابسين الاسكيت و هو قاعد علي الكرسي بيمشي بيه و مش عارف يقوم.

سلامه….انتي علي فكره مش عارفه تعلميني

ايه…..انا بتجيبها فيا مش لما تقوم الاول ابقي اعلمك

سلامه….بضحكك اقوم واقع هيجري بيا

ايه….بضحك مش هيجري غير لو بدأت تتحرك قوم عادي

سلامه….هو ايه اللي قوم عادي ده فيه عجل يعني اول ما هقوم هطير

ايه…..بضحك يا ابني ما انا واقفه قدانك اهو و كمان بص بمشي بيه عادي

سلامه….انتي اصلا ازاي عارفه تمشي عادي كده و تنقلي رجلك

ايه…..عادي قوم جرب هتعرف

سلامه……بقولك ايه ارفعي رجلك كده والله البتاع بتاعك ده مش في عجل

نزلت ايه علي ركبها من كتر الضحك

ايه……ياغبي امال ازاي بجري بيه ايه ساحره

سلامه…..لا اصل انتي بتمشي عادي يعني كأنك مش لابسه عجل في رجلك

ايه….بضحك يا حبيبي ما انا ممكن امشي امد بيه اجري

سلامه….ايوه ازاي بقي

ايه….يا حبيبي ما هو الاول لازم تعرف تقف بيه و تعمل توازن لجسمك عليه

سلامه…..بضحك يا يابت ما انا لو عارف اقوم كنت قومت اصلا انا حاسس انب نسيت ازاي اقوم من علي الكرسي

حطت وشها علي ضهر الكرسي و فضلت تضحك

سلامه….بابتسامه غيظ علي فكره ضحكك ده اللي مخليني مش عارف اقوم

ايه…..بضحك طيب خلاص مش هضحك و يلا بهدوء كده جرب تقوم

سلامه…..طيب استني هحاول

سند بأيده الاثنين علي الكرسي و ثبت رجله في الارض و كل ما يحاول يقوم يلاقي نفسه هيجري بالعجل

سلامه……الحقيني يا ايه هيجري بيا

ايه….بضحك هموت والله انت اصلا بتقوم غلط انت عامل وضع الحركه انت قوم مره واحده كأنك بتقف عادي يا سلامه

سلامه….يابت والمصحف انا بعمل كده بس بيجري طيب بقول ايه ايه رأيك اقلع فرده فيهم و العب بواحده بس

ايه….ايوه و تفضل تمشي برجل واحده هو انت راكب سكيت بورد ده اسكيت

سلامه…..لا استني ايه الفرق بينهم

ايه….بضحك وانا كمان هشرح الفرق

سلامه….معلش اتحملي جهلي انا راجل قديم

ايه…..عارف انت البورد الخشب اللي بيبقي فيها عجل و بتحط عليها رجل والرجل التانيه بتبقي علي الارض وبعدين لما بتاخد السرعه بترفع رجلك الاتنين عليها اهو ده الاسكيت بورد

سلامه….ااااااااه عوامه يعني

ايه…..ايه عوامه دي هو انت في بحر

سلامه….لا مش قصدي علي عوامه الوزه دي اصلا كنا بنقول عليها طوق زمان بس انتي ايش فهمك انا هفضل ارغي معاكي هو البتاع ده كنا بنقول عليه زمان عوامه انتي عارفه اني كنت عندي واحد و كنت انا اللي عامله

ايه….بضحك ايوه صيع عليا واعمل نفسك مصمم العاب

سلامه…..اتنيلي وهي العابكم دي العاب زمان كنا بنعمل الالعاب بتاعتنا بنفسنا كنا بنجيب لوح خشب مربع كده و نحط فيه عجل او لو مفيش عجل كنا بنعملوا بالكازوز

ايه….ايه الكازوز ده كمان

سلامه….ده الغطاء بتاع الحاجه الساقعه الزجاج دي عرفاها كنا بنجمعه و نشبكه في بعض كده بحتت حديده صغيره و نخرمه و يبقي شبه العجل و ندقه في لوح الخشب و نجري بيه هي دي بقي العوامه او الاسكيت بورد بتاعتكم

ايه….انت هتفضل تحكيلي عن طفولتك المشرده خلينا في الاحنا فيه مش هينفع تقلع فرده

سلامه…..طيب امسكي ايدي عشان اعرف اقوم

ايه…..بضحك هو انا بعلم ابن اختي ما تقوم تقف علي حيلك اخلص خنقتني

سلامه…..خدي بالك اسلوبك في التعليم مش نافع معايا خلفك ضيق ودؤ بدايه مش مبشره

ايه….بضحك انت عارف لو حاولت تروح مكان تتعلم فيه المدرب هيعتزل المهنه.

سلامه……طيب اخلصي و بطلي رغي ساعديني و امسكي ايدي عشان اعرف اتهبب اتعلم

ايه….بضحك طب بص همسك ايدك هتقزم عادي و انسي خالص انك لابس اسكيت اعتبر نفسك لابس جزمه عادي قوم معايا و انت فارد نفسك و بعدين لما تقف كويس هسيبك و اقولك تعمل ايه

سلامه….ماشي بس متسبيش مره واحده

ايه….تمام

مسكت ايده و حاول بقوم براحه بس كان منشف رجله وفاردها فا اتزحلق منها علي الارض سابت ايده و فطست من الضحك عليه

سلامه….بضحك والله انتي ما عندك دم و علي فكره بقي انتي قاصده

ايه….بضحك والله ما قاصده وبعدين انتي ليه فارد رجلك وانت بتقوم ما طبيعي تتزحلق

سلامه….طيب امال اعمل ايه

ايه…..انت الوقت قاعد علي الكرسي اهو بص عليا كده ركبك بتبقي متنيه كده وانت بتقوم بقي مينفعش تفردها خليها علي وضعها وقوم بضهرك يعني بالجزء اللي فوق رجلك تفضل ثابته مكانها

سلامه….هو ايه اللب قوم بالجزء اللي فوق يعني الجزء اللي تحت ابن كلب

ايه…..بضحك يا ابني افهم اي حد طبيعي لما بيكون قاعد علي كرسي بيشد ضهره و بيقوم مش بيروح فارد رجله و مثبتها في الارض و قايم وهو فارد جسمه كده قوم عادي يا سلامه

سلامه….طيب هحاول بس اقوم ازاي من علي الارض بقي

ايه…..بضحك اسند علي الكرسي وقوم يا حاج

سلامه…قوم يا حاج استظرفي استظرفي

سند ركبه علي الارض و مسك في الكرسي و قام قعد تاني مسكت ايده و فضلت معاه عشر دقايق فاصله من الضحك لا عارف يقوم ولا عارف يثبت و بيزحلق نفسه

سلامه….تصدقي بالله اللي اخترع البتاع ده راجل مش مظبوط ولو شوفته هزنقوا وراء مصنع الكراسي

وقعت ايه من الضحك و هي مش قادره تتكلم

سلتمه….ابو اللي عايز يتعلم انا راجل مش مظبوط انا كمان ايه اللي خلانب اشتري البتاع ده لا وكانت عايز تعلمني في الشارع

ايه….بضحك استني والنبي متقلعش انا جالي فكره تعالي اتحرك بالكرسي و تعالي قدام التربيزه

سلامه…..وبعدين

ايه….تعالي بس

راح بالكرسي و هو بيشد فيه و بيتنطط وهو قاعد زي القنفد مسك في التربيزه

ايه….بضحك ايوه امسك بقي كده لحظه

مسك بأيده وقام بهدوم وهو مادد ضهره علي التربيزه و موطي

سحبت ايه الكرسي و بصت عليه كان واقف ولا اللي واقف واخد وضع الحقنه

ايه…..انت مالك واقف كده ليه انت هتاخد حقنه

سلامه…..بضحك احترمي نفسك واخلصي ايه الوقفه الشمال اللي انتي موقفهالي دي

سند علي الكرسي مكانتش عارفه تتكلم او تكمل معاه من الضحك و فضلت تكح و صدرها وجعها من الضحك

ايه….اااااه ااااه كفايه بقي والله تعبت

سلامه….والله انا اللي تعبت من الوقفه دي يابت اخلصي قبل ما حد يجي و يدخل يلاقيني مصدر الدنيا كده

ايه…ااااااااه اسكت اسكت والله مش قادره تعبت من الضحك بص امسك في ضهر الكرسي

سلامه….هتفرق يعني كرسي من تربيزه ماهو نفس الوقفه والوضع المهبب ده وبعدين هلف ازاي امسك الكرسي انا خايف ابص عليكي اصلا

ايه…..علي فكره بقي انت جبان امسك نفسك يا سلامه بص وانت ماسك كده افرد ضهرك واحده واحده و بعدين سيب ايدك

سلامه……زعقي واتعصبي انا لو قفشتك هقطع شعرك اللي فرحانه بيه ده

ايه…..بضحك لا خلاص مش بتعصب يلا براحه كده تصدق بالله انا لو بعلم طفل المشي مكانش شلني زيك كده

ركز سلامه و فضل ساكت وهو بيرفع ضهره بهدوء

وقف وفضل ساند بصوابعه علي حرف التربيزه

سلامه…..بنظره سعاده انا وقفت وقفت يا ايه

ايه…..ايوه شاطر والله خليك واقف بقي شوبه متتحركش

سلامه….هو ايه اللي خليك واقف متتحركش هتذنب يعني

ايه….لا بس استني تتعود علي الوقفه و جسمك يعمل توازن عليه

سلامه….هو انا عندي سؤال بس انتي ازاي واقفه علبه ده بتعب اوي انا واقف علي سيف الاسكيت مش كنت جيبته باربع عجلات

ايه…..بضحك اربع عجلات ايه يا ابني انت صغير وبعدين مالك بتكلمني و انت موقف رقبتك كده ليه بصلي

سلامه…..لا طبعاً لو حركت رقبتي هقع سبيني انا وازن نفسي كده

ايه…..طيب يلا شيل صوابعك دي براحه

شال سلامه صوابعه و فضل واقف بس مش بيتحرك عينه بس هي اللي رايحه جايه.

حركت ايه التربيزه بعيد عنه بقب واقف من غير ما يسند علي اي حاجه

سلامه…..لا بصي نداله لا رجعي التربيزه

ايه…يبقي مش هتتعلم اخلص بص بقي حرك رجلك بهدوء نقاها يعني

سلامه…..بالعجل يعني اجري

ايه….لا تجري ايه هتعمل فيها محترف ده احنا بقالنا ساعه الا ربع عشان تقف بيه

سلامه….احترمي نفسك واتكلمي بأسلوب احسن من ككه

أيه…..بضحك حاضر يلا نقل رجلك كأنك بتمشي واحده واحده

بدأ يحاول و كل ما يحس انه هيقع تمسك ايده فضلت مسكاه وهو بينقل رجله كأنه بيتعلم المشي

أيه….شاطر يلا بقي جرب كده كام خطوه لوحدك

سلامه…..انا لو وقعت هنفخك

ايه…..لا مش هتقع

فضل يحاول بهدوء يرفع رجل و ينزل رجل بس وهو مش موزون خالص

ايه….يلا افضل رايح جاي شويه

سلامه….هو انا جايبه عشان امشي بيه

ايه….هو انت فاكر يعني لما تلبسوا هتجري بيه علي طول انت لازم تتعود تقف عليه و لازم تتعود تمشي بيه و بعدين تتعود ازاي تاخد وضع الحركه بيه براحه كمان جسمك لازم يكون ليه شكل معين

سلامه…..ابو اللي اخترعه والله كل ده عشان العب بيه

أيه….اخلص بلاش رغي

فضل رايح جاب و اتعود شوبه علي المشي بيه قربت منه الكرسي وفضلت تخليه يقوم و يقعد اكتر من مره عشان يتعود و بقي عارف يتحرك بيه و يقوم ويقعد

أيه….بص بقي هنبدأ نتحرك و عشان تتحرك هتميل حاجه بسيطه بضهرك لقدام زي كده بس وانت ىاسك مرفوعه و شادد صدرك متوطيش اوي يعني

سلامه…..كده

ايه….شاطر هتفتح رجلك بقي حاجه بسيطه

سلامه…..بضحك لا بقولك ايه كفايه الوقفه اللي وقفتها من شويه

أيه…..بضحك اتلم انا مش بهزر و يلا اعمل زيي هتفتح رجلك كده زيي متلزقهمش في بعض و هتتني ركبتك حاجه بسيطه و لما تبدأ تمشي بتسحب مع كل خطوه قدم رجلك لوراء

سلامه….لا استني مش فاهم يعني ايه

ايه….بص عليه هعملها قدامك بس براحه بص احنا في العادي لما بنكون ماشيين و بنبدل رجل قدام رجل لما بناخد خطوه و بنحط القدم علي الارض لو ركزت يعني كعب رجلك بيلمس الارض وبعدين مشط رجلك

سلامه…لا ازاي انا بحط مشط رجلي عادي

أبه…..ولااااااا متقاوحش انت هتعمل فيها بلارينا و بتمشي علي مشط رجلك

سلامه…..اهدي يا ابو دوما مش كده

ايه……بنحط الكعب و بعدين بننزل عادي بمشط الرجل في الاسكيت بقي لما بتمشي انت بتمشي علي وراء عكس اتجاه الارض بتسحب بمشط رجلك و كعبك بيبقي علي فوق اقولك شوفت الثور وهو بيحفر في الارض قبل ما يجري بيرجع رجله ازاي هو زي كده

سلامه….انا قولت لعبه شمال مصدقتنيش ثور ايه ياللي تنشكي

ايه…..بضحك انا بديك مثل

سلامه….مثل مهبب اخلصي يلا

ايه….يلا ركز معايا

فضلت رايحه جايه بهدوء قدامه اكتر من مره و بدأت تمسك ايده تاني و تعدل من وقفته و تعرفه ازاي يبدل رجله و يسحب علي وراء لحد ما بدأ يظبط الوضع سابت ايده و بدأ يتحرك بجد و يعمل زيها وهو فرحان اوي

ايه….بابتسامه يلا شاطر تاني

سلامه…..ده طلع حلو اوي

ايه….بضحك ما كان اختراع شمال يلا تاااني

سلامه……طيب انا عايز اجرب اجري بقي

ايه….لا مش الوقت انت كده هتكسرلي المحل انت لازم تعمل كل ده اكتر من مره لحد ما تبقي حافظ كل ده صم و الجري نفس الحركه دي بس بتسرع يعني رجلك بتبقي بسرعه وراء بعض انت كده بتمشي بتمد بيه فهمت

سلامه….اه بس طلع حلو هو متعب بس رجلي وجعتني

ايه….عشان رجلك لسه مش متعوده عليه ولا علي الوقفه لما تتعود مش هتحس بوجع

فضل رايح جاي و هو مبسوط زي الاطفال

ايه….هتتجنن وتسرع

سلامه….صراحه اه

ايه….طيب تعالي براحه يلا

مسكت ايده و فضلت تسرع شويه معاه

سلامه….وقف وبصلها بقولك ايه انا بشوف الشباب بيجروا علي رجل واحده و بينزلوا علي الارض انتي بتعرفي تعملي كده

ايه…..اه بعرف

سلامه….بابتسامه حماس طب علميني

أيه…..بضحك اعلمك ايه لا دي كده وسعت منك اوي دي حركات بتعنلها بس لما بتبقي عارف تركبوا اصلا يعني لما تبقي محترف كده ان شاء الله ابقي اعلمك

سلامه…..طيب اعملي انتي و فرجيني

ايه….مش هعرف هنا دي عايزه مساحه لازم الشارع

سلامه…..طب الشارع اهو قدامك اخرجي فرجيني

ايه….بضحك والله عامل زي الطفل اللي مصدق مسك لعبه في ايده تعالي و اخلص ضيعت يومي

سلامه….حوشي الشغل اللي فوق دماغك اتوكسي انتي مجالكيش غير كلبين صغيرين من ساعت ما وصلوا وهنا بياكلوا وبس

ايه…..بضحك قولتلك معنديش غير استضافه بس واخلص مطولش لسانك

خروجوا بره وقف علي باب المحل

راحت هي بعيد عن الشارع وبدأت تتحرك بهدوء و فضلت تسرعه شويه شويه بقي راحه جايه تجري بكل أحتراف و تنزل بضهرها لحد تحت و تمشي برجل واحده بنفس السرعه

سلامه…..يا بنت اللذينه

بعد ما راحت وجات و عملت حركات كتير قدامه راحت تاني علي المحل

دخل قبلها و هو بيحاول يقلدها براحه و هو بينزل علي الارض زيها وقع و معرفش يقوم وقفت هي تضحك عليه من قلبها

سلامه…تعالي قوميني

أيه….والله اسيبك واقع زي الصرصار علي ضهرك كده لحد ما يلاقولك صاحب

سلامه…..صرصار في عينك تعالي يا بت قوميني بدل ما اقتلك

ضحكت ايه وراحت عليه وطت شويه ومدتلوا ايدها قام قعد علي الارض حاولت تشدوا براحه عشان يقوم العجل زحلقه وقع تاني و هو ماسك في ايدها شدها وقعت عليه و الاتنين وقعوا علي الارض نايمين سندت ايدها علي صدره بصوا لبعض اوي و هما مقربين وشهم لبعض

فضل قلبها يدق بسرعه وهي بصاله و ضحكتها وقفت كانت مبتسمه بإحراج

سلامه…..بهمس بسيط انتي كويسه

هزت ايه راسها بهدوء

سلامه….في حاجه وجعاكي

ايه….ااا لا انت كويس

سلامه….ااا مش عارف ااا يعني ضهري بس وجعني شويه ابتسم و رفع شعرها بأيده قومي بسرعه احسن حد يدخل علينا واحنا كده يلا

أيه…..فاقت من صدمتها هاااا اااا اه اه قامت بسرعه و هي قلبها بيدق جامد

سند سلامه علي الارض و قام قعد و بعدين قلع الاسكيت و هو قاعد و قام وقف بصلها بطرف عينه لاهو كان علي بعضه ولا حتي هي بس حب يكسر الصمت اللي حصل و يخرجها من احراجها.

سلامه…..اااا ده انا مش حاسس برجلي كانت وجعاني اوي

ايه….بتوتر وهي مش عايزه تبصلوا عشان اول مره بس هتتعود

سلامه…..المهم يعني يجي مني؟

ايه….احممم اه طبعاً رجعت شعرها لوراء و بصت عليه بطرف عينها

سلامه…..بس طلعتي شاطره علي فكره بعيداً عن التريقه و المسرح اللي طلعتيني عليه بس فهمت منك و كمان طلعتي بتعرفي تمشي بيه بجد

أيه….انت محتاج بس شويه وقت واكيد هتعرف و هتبقي احسن مني كمان

سلامه….خلاص لما اتعلم بقي نبقي نمشي بيه في الشارع مع بعض موافقه

ايه…..بابتسامه اكيد

سلامه…..بس وقتها هنبقي نجري

ايه….ماشي موافقه

سلامه….طيب يلا اقلعي

بصتلوا بصدمه اقلع ايه

سلامه….بضحك الاسكيت

ابتسمت ايه و بسرعه قعدت علي الكرسي قلعتوا و هو لبس الكوتش بتاعه

أيه…..احممم ااااا هتاخدوا معاك ولا هتخليه هنا

سلامه…..عادي مش هتفرق

ايه….طيب هاتوا خليه معايا هنا

سلامه….امسكي

راحت شالته جوه ورجعت

سلامه……ها يا حبيبي هتخلصي و تمشي امته

ايه…..علي ثمانيه يكون اصحاب الكلاب وصلوا وخدوهم هقفل وامشي

سلامه….طيب يا روحي انا همشي انا بقي عشان اسه عندي كام مشوار شغل انا قولت بس اجي اقعد والعب معاكي شويه و امشي

أيه….طيب مش عابز تغسل وشك و تظبط نفسك جوه الاول

سلامه….احمممم ياريت

ايه…..طيب تعالي.

دخلوا علي جوه فتحتلوا المايه وقف غسل ايده و وشه و ظبط هدومه و ظبط شعره كان لابس قميص مفتوح وليه ياقه كانت مرفوعه مدت ايدها بهدوء وهو مديها ضهره عدلتهاله

سلامه….بابتسامه ايه كده تمام

ايه….بابتسامه سخريه اقفل صدرك ده شويه عامل فيها احمد رمزي

سلامه….ايه خايفه البنات تعاكسني

ايه….وانت ما هتصدق طبعا هتروح علي طول

سلامه….بابتسامه جميله مقدرش بنوتي تموتني علي فكره انا اتبسطت اوي و ضحكت كتير و بجد يعني بعترف ان احلي وقت بقيت اقضيه اللي بقضيه معاكي

أيه….بسعاده بجد يا سلامه

سلامه….بجد يا قلب سلامه يعني معاكي بعمل حجات عمري ما تخيلت اني اعملها في سني ده اروح الملاهي و اركب اللعب و اتعلم علي الاسكيت حجات كتير و تفاصيل اكتر بعيشها معاكي يا ايه

أيه….بابتسامه هاديه انا بحبك اوي يا سلامه

سلامه…..بصلها وابتسم ابتسامه جميله و انا بحبك اكتر يا احلي حاجه في حياة سلامه مسك وشها بأيده وباس جبهتا بحب

غمضت ايه عينها وهي ماسكه ايده

بعد عنها شويه وبصلها وهو لسه ماسك وشها

سلامه….انا همشي بقي مش عايزه اي حاجه

ايه…..عايزه سلامتك

سلامه….خدبي بالك من نفسك و لما تيجي تغيري زي ما قولتلك تقفلي الباب من جوه الاول لحد ما اجي اشوف حل في المكان المفتوح ده بس لما تقفلي عليكي تتصلي عليا و افضل معاكي

ايه….اشمعني بقي

سلامه….يعني افرضي تعبتي في مره ولا دوختي ابقي معاكي و اعرف انتي كويسه ولا لا عشان لو فيكي حاجه اجيلك بسرعه

ايه….متقلقش عليا ويلا روح عشان متتأخرش

سلامه…هكلمك

ايه…..تمام سوق براحه

سلامه….حاضر يلا يا حبيبي

راحت معاه علي بره و وقفت علي الباب لحد ما ركب و مشي

دخلت ايه علي جوه و هي طايره من السعاده و ماسكه قلبها .

………

في منزل نادين علي الساعه خمسه
وقفت قريب من باب الشقه بتوتر واصل لأعلي حد بعد مكالمه عسال ليها عشان يعرفها انهم وصلوا تحت بيتها.

كانت حاسه انها هتفقد وعيها من كتر ما قلبها بيدق و أيدها متلجه

راحت بسرعه علي اوضتها بصت لنفسها في المرايه كانت لابسه بنطلون أبيض و بلونه كت بيضه شعرها سايب شكلها هادي و جميل و بسيط راحت بسرعه تاني علي الباب و سمعت صوت الاسانسير حطت ايدها علي قلبها

وسمعت صوت الجرس غمضت عليها ووقفت ثواني و عدت بهدوء جواها واحد اثنين ثلاثه حطت ايدها علي أوكره الباب و فتحت و هي وشها مخطوف وعليه ابتسامه هاديه.

لمحت في وشها اول حد عسال خرج منها تنهيده ابتسم بهدوء.

عسال…..اذيك يا نودي

نادين…ااا الحمد لله

عسال…..بهدوء أعرفك علي امي يا نودي

بصت نادين علي حنان بهدوء كانت مبتسمه ابتسامه فيها طيبه

أبتسمت نادين و قربت منها بهدوء

نادين….أهلاً بحضرتك يا طنط

حنان…..بأبتسامه جميله مدت ايدها وقربت منها ضمتها اهلا بيكي انتي يا نادين حمد الله علي سلتمتك يا حبيبتي

نادين….الله يسلم حضرتك أتفضلي متقفيش كده

عسال….دي بقي ريهام اختي

ريهام….بابتسامه واسعه ايه القمر ده

نادين….بأبتسامه انتي اللي قمر اخبارك ايه يا ريهام

قربت منها ريهام و باستها

ريهام….الحمد لله انتي كويسه حمد الله علي سلامتك

نادين….ميرسي الله يسلمك اتفضلوا اتفضلوا

دخلوا وقفل عسال الباب و كان في ايده ورد و شنطتين شكلهم شيك

عسال…..نودي الحاجه دي من امي و ريهام

نادين بأبتسامه إحراج هزت راسها لعسال شمال ويمين ابتسم عسال وهز راسها عشان تاخدهم منه

نادين….طيب ليه كده بس ليه تعبتوا نفسكم

حنان….دي حاجه بسيطه يا نادين

ريهام….مفيش تعب ولا حاجه

حطت نادين الحاجه علي اقرب تربيزه وهي ايدها فيها رعشه بسيطه.

نادين…..طيب اتفضلوا هنقعد هناك واقفين ليه

سبقت نادين بكام خطوه عشان توصلهم مكانهم البيت كان شكلوا يجنن شيك و راقي و مترتب منظر السمك مع الورود و البلالين اللي لسه متعلقه في كل مكان كان جميل اوي.

قعدوا و فضلت نادين واقفه جنب ميدو

نادين….ااااا تشربوا ايه ؟

حنان….تعالي أقعدي يا نادين احنا مش عايزين أي حاجه تعالي ارتاحي

نادين…لا لا مش هينفع طبعاً لازم تشربوا

حنان….احنا جايين نطمن عليكي و نقعد معاكي شويه

نادين….طيب انا هاجي علي طول بس لازم تشربوا

عسال…..بأبتسامه طيب هاتي عصير يا نادين

نادين…..اااا طيب

عسال….اساعدك

نادين…..اااا لا لا خليك

راحت نادين بسرعه علي جوه وهي حاسه ان رجلها مش شيلاها مدت ايدها لقدام صوابعها كانت بتترعش جامد راحت فتحت الثلاجه و طلعت منها العصير حطت الكاسات في صنيه خشب شكلها يجنن و حطت صنيه تانيه وعليها اطباق تقديم وجنب الاطباق طبق كبير شويه في حلويات كتير هي كانت مظبطاهم في الطبق قبل ما يوصلوا

راحت بسرعه جابت كوبايه مايه و ظبطت كل حاجه بصت علي الصواني و هي مش عارفه هتخرج بيهم ازاي قربت من البار و هي جوه المطبخ تحاول تبص علي عسال كان بعيد و ضهره ليها و هي مستحيل تناديه مبقتش عارفه تعمل ايه

مسكت موبايلها واتصلت علي ليله و هي بتتكلم براحه.

ليله….بابتسامه نودي

نادين….بهمس نودي ايه وزفت ايه حرام عليكي يعني كان لازم تسيبيني في يوم زي ده

ليله….بأبتسامه في ايه بس مالك متوتره طبعاً و ضاربه لخمه

نادين…..ليله انا في المطبخ بجيب عصير و الحلو زي ما قولتيلي بس واقفه مش عارفه اخرج

ليله…..طيب ليه في ايه؟

نادين….في اني لو خرجت هوقع كل حاجه من الارتباك و التوتر اللي انا فيه و بجد مش عارفه اتصرف

ليله…..بضحك الله يخربيت عقلك طيب نادي لعسال يساعدك

نادين….لا طبعاً مستحيل يعني مامته و اخته قاعدين وانا انادي عليه لا مش هقدر ليله انا متوتره اوي هتيجي امته

ليله…..يابت انتي هبله يعني لو قولتلك هنزل الوقت وتجيلك هتفضلي في المطبخ لحد ما اجي عشان اخرجك

نادين….طيب اعمل ايه طيب ليله اتصرفي مش انتي اللي مشيتي و سبتيني ليله بجد الموضوع محرج اوي حاسه ان انا اللي ضيفه و مكسوفه اطلع من مكاني

ليله….بضحك طيب اقفلي يا مصيبه انا هتصرف

نادين….هتتصرفي ازاي

ليله…..ماهو لو قفلتي هتعرفي و مش هتفضلي لاطعه الناس كده و قاعده في المطبخ يلا اقفلي

نادين….طيب ماشي باي

ليله….باي

قفلت ليله و اتصلت علي عسال.
رن موبايل عسال مسك الموبايل و ابتسم

عسال…..ايوه يا ليله اخبارك ايه

ليله…..بضحكه جميله الحمد لله بقولك ايه يا عم ميدو قوم للهبله بتاعتك دي في المطبخ ساعدها عشان محتاسه كالعاده لوحدها ومكسوفه تطلع

عسال….بضحكه جميله طيب ماشي انا هروحلها خلاص

ليله…..بسرعه قبل تبوظ الجوازه انت حر

عسال…..بضحك لا وعلي ايه انا هروحلها يلا

قفل عسال وبص لامه و ريهام وهو مبتسم

عسال…..بضحكه هاديه ثواني و راجعلكم

حنان…..ماشي يا حبيبي

قام عسال وراح علي المطبخ لمحها واقفه في اخر المطبخ وحاطه ايدها وراء ضهرها

لف بهدوء من قدام البار و دخل المطبخ وهو بيضحك قربت منه بسرعه

نادين…..ميدو تعالي ميدو انا مش عارفه اخرج

عسال….بهدوء مسك ايديها الاثنين هو احنا ممكن نهدأ شويه في ايه لكل ده يا عمري دي قاعده بسيطه تتعرفوا علي بعض و بس ليه بتترعشي كده و ليه ايدك متلجه هتحبيهم اوي والله هتحبيهم

نادين….وانا مش معترضه والله و عارفه اني هحبهم بس انا مالي ايدي اللي بتترعش مش انا

عسال….بضحكه جميله ماهي بتترعش عشان انتي موتره نفسك و مكسوفه

نادين….اه اه مكسوفه بجد و قلقانه

عسال…..شششششش بس بس اهدي قلقانه من ايه مفيش حاجه يا قلبي اهدي عشان خاطري و فكي كده واتعاملي بطبيعتك انا جنبك ماشي

نادين….ميدو انت مش هتمشي و حياتي عندك خليك مش هقدر والله

عسال….وحياتك عندي هتقدري و كام دقيقه و هتاخدي علي الجو و هتنسي التوتر و هتلاقي نفسك بترغي و مش عارفه تسكتي اصلا ريهام مش هتخليكي تسكتي

نادين…..ميدو خليك

عسال…..حبيبي احنا اتفقنا ان القاعده دي بتاعتك انتي و بس فهمتي يلا بقي انا هقعد معاكم شويه و بعدين عروح اخلص مشوار تكونوا قعدتوا براحتكم قوليلي بقي اساعدك في ايه

نادين…..لا انت هتساعدني في كله انا لو خرجت بأي حاجه هوقعها ايدي مش بتسكت

عسال….بضحكه جميله ماشي يا ستي عيوني يلا تعالي

نادين…..لا استني انا خلاص هشيل دي مينفعش اشيلك كل حاجه قدام مامتك كده

عسال…..بضحك لا يا ستي مش مهم

نادين….لا لا شيل انت بس العصير

عسال….طيب اللي يريحك يلا تعالي ورايا

شال عسال صنيه العصير و المايه وهي شالت صنيه الحلو وراحت وراه وهي مستخبيه في ضهره زي الاطفال.

حطت عسال الصنيه و مسك كاس عصير قدمه لامه و كاس تاني لريهام وهي حطت الحلو

حنان…..ايه كل ده تعبتي نفسك ليه بس كده انا مش جايه اتعبك

نادين….مفيش تعب والله

عسال….بابتسامه اقعدي يا نادين

قعدت وهي ماسكه صوابعها في بعض و باصه علي الارض مش بتتكلم.

ريهام…..احممم عامله ايه الوقت يا نادين بقيتي احسن

نادين….بلعت ريقها بصعوبه اااا اه اه الحمد لله احسن كتير

حنان…..ميدو قال ان في جرح اتخيط فكيتي الخياطه ولا لسه

نادين….اااا لا هو الدكتور قال ان مفيش حاجه هتتفك

عسال…..هو تجميل و الخيط ده بيقع لوحده يعني مش بتحتاج تفك خياطه ولا حاجه

حنان….طيب الحمد لله

ريهام….كويس انه بيتفك لوحده لان فك الخياطه رخم و بيوجع انا زمان وقعت و اتعورت في كف ايدي و وقت الخياطه ووقت الفك كان صعب اوي

نادين…..اااا اه انا حسيت شويه بردوا بالخياطه

ريهام….الله يكون في عونك هي مكانها صعب اصلا و اكيد بتشد عليكي صح

نادين….كتير بس احسن من الاول

حنان….المهم خدي الادويه في معادها عشان تخفي بسرعه.

نادين….بصت لعسال بتوتر ابتسم بهدوء و هز راسه بهدوء اكتر عشان تتكلم

اااا ما انا باخد والله كل الادويه

ريهام….علي فكره ماما الام الوحيده اللي في الدنيا دي اللي بقي عندها مناعه من الجروح و الخياطه و الجو ده يعني كل الامهات بمجرد ما تشوف ولادها واقعين و متتورين بيرقعوا بالصوت الا هي تاخدنا و تروح تخيط

نادين…..بابتسامه ده عشان اتعورتي

عسال….بضحكه جميله لا مش هي بس احنا كنا مربينلها الرعب كلنا

نادين….بس اكيد بتخاف عليكم طبعاً

حنان….اكيد بخاف و بترعب كمان لما كنت اشوف واحد فيهم متعور بس من كتر ماهما وقعوا و اتعوروا بقي عندي مناعه لدرجه الدكتور نفسه اتعود

نادين….بهدوء اتعوروا كتير للدرجادي

حنان….كتير عندك ريهام في كف ايدها فتحت ايدها بالكتر و عندها جرح في راسها محمد اللي كان معورها

بصت نادين لميدو وابتسمت

عسال……بأبتسامه بريئه لا والله مش انا تقصد سلامه

حنان…..اه ماهو انا بقول لمحمد محمد عادي بس بقول لمحمد رقم اتنين ميدو

نادين….بابتسامه محمد رقم اتنين

عسال…..اه انا محمد رقم اتنين بصي عشان افهمك بس مع صحابنا انا عسال و هو سلامه في البيت سلامه قليل اوي بيقولوا سلامه الكل بينادي محمد و عشان يفصلوا بينا انا بقيت ميدو.

ريهام….بضحك اهو ده بقي عيب المجامله في الاسامي يخلوا الواحد مش عارف ينادي لمين فيهم

نادين…..هو بصراحه الموضوع صعب بس هنا اتنين ارحم من هما وصحابهم كلهم محمد

حنان…ماهما لما بيكونوا عندنا كلهم بننادي عليهم زي ما انتوا بتقولوا عسال سلامه عشري رشيد كده يعني

نادين….ايوه احنا اتعودنا علي كده اصلا انا مستغربه اسم محمد

ريهام…..المهم يعني ان ميدو برئ اللي عورني المؤذي سلامه كان زمان في لعبه الطبق طاير عرفاه

نادين….اه عرفاه

ريهام….بضحك سلامه بقي مكانش عنده طبق طاير عارفه الغطاء الحديد بتاع علبة السمن

بصتلها نادين بصدمه

ريهام….بضحك ايوه هي دي طيرها و خدت حته من راسي

عسال….بضحك بس حرام مكانش يقصد

حنان….هو كان بيلعب فعلاً بس هي كانت هتموت بجد و ربنا ستر و يومها قلبي كان هيقف ودي كانت تاني مره لريهام اما هو بقي طول عمره تاعبني كان شقي جداً وكل لعبه خطر متخيط في راسه هو كمان و في دراعه من فوق و في صباعه غير بقي الجروح بتاعت اللعب و مصطفي اتعور كتير واتخيط كتير

ريهام…..وفي مره بردوا سلامه اللي عوروا خلاه ماشي حط رجله وقع علي وشه و كان في لعبه مكسور حرفها نزل عليها بدقنه

نادين…..بضحك هو كان شقي اوي كده؟

حنان….يا خبرررر سبحان من هداه هو مش للدرجادي يعني بس هدي كتير

ريهام….بضحك و عور ميدو كمان في حاجبه

ابتسم عسال وشاورلها علي حاجبه

نادين….بابتسامه ايه ده هو ده جرح

عسال….بابتسامه ايه مش باين ولا ايه ده عامل علامه في حاجبي

نادين….بضحكه كسوف لا بس كنت فاكره انت اللي عاملها في ناس كتير بيعملوها

حنان…..لا ده سلامه كان حادفه بمقص

ريهام…..معقد نفسياً

نادين….بضحك ايوه صح بس هو كان ببنتقم منكم ليه اكيد بتضايقوا

حنان…..لا ده كده بيلعب

نادين…..بيلعب ازاي هو اصلا كان كبير يعني

حنان….مش اوي يعني 12 سنه او 14 بس لعبوا كان صعب و طول عمره شقي وبيتحرك كتير

ريهام….ولحد الوقت والله ما بيقعد ساكت في حاله يعني لو شافنا ساكتين يأذينا بأي طريقه عشان نتكلم ونضحك هي دي طريقته

عسال….بابتسامه بس اتفرجي بقي علي سلامه وهو تعبان يصعب عليكي و يبقي نفسك تقوليله قوم اعمل شقاوه بس متنامش كده

حنان….دي حقيقه لما بيتعب لا بيتكلم ولا يتحرك بيبقي طيب اوي

عسال…..طيب بقول ايه مش هقطع انا كلامك بقي بس هقوم انا اروح المشوار بتاعي زي ما قولتلكم و هرجع تاني

بصتلوا نادين بسرعه وهي بتترجاه بعينها عشان ميمشيش

حنان….ماشي يا حبيبي روح ربنا معاك

نادين….بتوتر ااا اوصلك

عيال….بابتسامه هاديه لا خليكي مرتاحه يلا سلام عليكم

الجميع…..عليكم السلام

فضلت عينها عليه لحد ما فتح الباب وقبل ما يقفلوا ابتسم و حدفاها بوسه ابتسمت بهدوء و بعدت عينها بسرعه عنه قفل ميدو ومشي.

بصت نادين عليهم بتوتر

نادين….هو انا بصراحه مش بعرف اقول اشربوا و كلوا فا من فضلكم اتعاملوا عادي يعني بيتهيألي مش.محتاجين عزومه

حنان….بابتسامه لا مفيش عزومه ولا حاجه

ريهام….بابتسامه طبعاً لو سلامه عرف اننا بنقطع في فروته كده مش هيسكت

نادين….بابتسامه بس طيب والله انا بعزه جداً

ريهام…..سلامه حنين و طيب اوي هو بس اللي عنده فرط حركه و بيحب الضحك و المقالب

حنان…..لا مش هو بس هما الاربعه والله طول عمرهم مجنني بس ميدو كان اقل واحد فيهم

نادين…..بابتسامه توتر هو هادي عن سلامه

ريهام…..مين ده اللي هادي هو ضحك عليكي ولا ايه لا اوعي يغرك الوش ده ميدو مصيبه

حنان….بابتسامه متصدقيهاش

ريهام…..بصدمه والله العظيم ميدو شيطان

حنان….يابت متحلفيش ده هو الوحيد اللي عمره ما تعب قلبي زيكم

ريهام…..اسمعني مني انا هو يبان هادي و طيب بس طول عمره هو وسلامه المخ والعضلات يعني ميدو كان يفكر في المصيبه و احنا الثلاثه ننفذ

حنان…..اه كان بيخطط بس اقصد في العموم كان هادي جداً يعني متلاقيهوش يتنطط يبهدل يبوظ يأذي

ريهام…..خدي بالك ميدو دمه خفيف جداً يعني لو رايق و قعدتي معاه تنسي نفسك و متبطليش ضحك و بتاع مقالب هو كمان

نادين….بابتسامه طيب مين اكتر حد تعبك فيهم اوي

حنان…..كلهم والله حتي ميدو لانهم لما كانوا بيتجمعوا هما الاربعه كانت بتبقي مصيبه بس لو هنقول بالترتيب اكيد محمد لان هو كان الكبير و المسيطر و هما كانوا صغيرين بيسمعوا كلامه و اللي بعده مصطفي

نادين…..مصطفي الصغير صح

حنان…..اه بس تقدري تقولي انه في سن معين كده كان لعنه خد بقي شقاوة الكل و طلعها عليا انا و ريهام بردوا كان رهيبه يعني لما بنت تتربي وسط صبيان بتبقي زيهم حتي لعبها

ريهام….بضحك زيهم ازاي

ضحكت نادين علي ريهام

حنان….يعني لعبك و شقاوتك و تصرفاتك زيهم عارفه يا نادين كنت اجيبلها عرايس و لعب بنات تسيبهم و تلعب بالكوره بالمسدس يعني كانت تميل للعب الصبيان اكتر

نادين…..عشان مش معاها بنات اكيد

حنان…..اه ما هي البنت لما تتربي وسط صبيان بتاخد من طباعهم

نادين….لا بس هي زي القمر والله و بنوته جميله

ريهام….بضحك ربنا يسترك والله

ضحكت نادين بهدوء وحست انها بدأت تفك شويه.

نادين…..طيب بعيد عن شقاوتهم و لعبهم مين تربيته اصعب الولاد ولا البنات

حنان…..بصي نادين هي تربيه الاطفال عموماً متعبه و مرهقه خصوصا لما الست تكون بطولها و انتي اكيد عرفتي من ميدو اني كنت مسؤوله عن اربع اطفال انا طول عمري كنت هاديه و بتلخم و مش بعرف اتصرف و امي الله يرحمها كانت بتعملي انا و مني اختي كل حاجه و كانت مدلعانا هي و ابويا الله يرحمهم

نادين…الله يرحمهم

حنان…..المهم يعني انا في سن صغير فجأه لاقيت نفسي مسؤوله عن اربع اطفال و امي كانت مريضه فا كنت مضطره اتعامل و ابقي قد المسؤوليه مريت معاهم بأوقات صعبه كتير و هما سنهم الاربعه كان قربب من بعض فا صعب تقدري تسيطري و انا عمري ما عرفت ازعق لحد او اتعصب و لما كان حد فيهم يتعور زي ما حكيتلك كده كنت بحس ان قلبي هيقف تخيلي في نص الليل تلاقي اللي دقنه مفتوحه واللي راسه و اللي حاجبه و تجري لوحدك و بالك مشغول علي امك الكبيره و باقي ولادك الصغيرين

يمكن الحمد لله انها جات علي الشقاوه سواء من بنت او ولد أرجع واقول كانوا اطفال و لما كبروا شويه وتعبوني حبه كانوا مراهقين بس في النهايه ربنا كرمني فيهم و محدش فيهم طلع وحش بالعكس طول عمرهم حتي وهما تاعبين قلبي و راعبني عليهم كانوا حنينين ولاد حلال محصلش في مره ان حد فيهم جابلي مصيبه لا قدر الله يعني شقاوه و بس و ده كان كرم كبير من ربنا عشان كده لما بفتكر بحمد ربنا و بنسي تعبهم اصلاً

نادين….بابتسامه بس حضرتك قويه يعني انك تكوني مسؤوله عن اربع اطفال و ام واب ليهم دي قوه وقدرتي انك تكبريهم

حنان…..ربنا كان معايا وامي يمكن مش هكدب عليكي ترببتهم مكانتش سهله خالص انا مكنتش بس ام واب انا كنت حجات كتير اوي يا نادين

و يمكن البني ادم غصب عنه بيجي عليه وقت بيحس انه مش قادر يكمل و عايز ينهار و حاسس ان المسؤوليه اللي كان فاكر نفسه هيقدر عليها طلعت صعبه و مش سهله خالص انا اشتغلت حجات كتير اوي و شغلي كان بياخد وقت كبير مني يعني كان بيجي عليا وقت واحس اني مش قادره اكمل ولا حتي ارتاح لما كنت انزل الشغل من الساعه سته الصبح واوقات خمسه كمان كنت ارجع علي ثلاثه البيت مش شايفه و هموت وانام وارتاح بس وقتها مكانش ينفع لان طول اليوم بسيبهم لامي و لما برجع هي من التعب بتنام وانا اقف اعمل اكل واحمي و انضف و اكل واشرب واغسل و اذاكر و اللي تعبان فيهم اهتم بيه و اخر اليوم انيم فيهم ودي لوحدها كانت فقره عشان تسيطري عليهم وتهلبهم يناموا في النهايه هما اطفال و عندهم طاقه مش بيحسوا انهم تعبانين و في وسط كل ده ميجليش قلب اشخط وازعق واطلع تعبي فيهم

في مره شغلانه من ضمن الشغل اللي اشتغلتوا كنت بشتغل جليسه لست كبيره مسنه الست دي كانت واقعه وعامله عمليه و مركبه في رجليها شرايح و مسامير و كان عندها بنت وحيده و البنت دي كان عندها ولدين توأم و كانوا في ثانويه عامه و طبعاً الثانويه صعبه جداً ومحتاجه تركيز و هي كانت ساكنه بعيد اوب عن والدتها و مدارس ولادها ودروسهم في نفس المكان وكان مستحيل تقدر تروح وتيحي و تهمل في ولادها و دراستهم لانهم كانوا داخلين علي امتحانات و الست دي رفضت تسيب بيتها خالص فكان الحل ان يكون معاها جليسه و كنت انا الجليسه دي

كانت ست جميله و محترمه و في حياتي مشوفتش زيها كانت مدرسه لغه عربيه كبيره و طالعه علي المعاش انا قعدت معاها في الشغل ده ست شهور كنت بروحلها الساعه تسعه الصبح امشي علي الساعه اربعه اروح البيت اغديهم واطمن عليهم وارجعلها علي سته افضل قاعده معاها لحد الساعه عشره تنام وامشي و البيت بتاعها مكانس بعيد اوي عني بس الوقت اللي كنت بقضيه معاها لحد ما اروح علي قد ما كان متعب اوي علي قد ما كان جميل بالنسبالي .

في يوم روحتلها و انا حاسه اني خلاص طاقتي خلصت مش قادره اكون لوحدي و اليوم ده تحديداً كان اللي ميدو اتفتح حاجبه كنت مضايقه اوي من محمد عارفه انه طفل و مكانش يقصد بس للحظه حسيت اني مقدرتش احافظ علي امانه اختي و اهملت في ميدو غير الضغوطات و التعب و اليوم اللي عامل زي العجله دايره ومش بتقف

روحت وانا مستنيه حد بس يقولي مالك عشان انفجر و حصل فعلاً يومها انا عيطت عياط في حياتي معيطتش قده كمان افتكر ان اليوم ده كان يوم اربعه وعشرين في الشهر يعني كانت فلوسي بتخلص و اللي كان معايا صرفته علي ميدو في العياده والعلاج و كان المفروض ريهام عندها استشاره دكتور و امي كانت محتاجه تروح لدكتور الكلي فا كنت حاسه اني مش ملاحقه علي المصاريف ولا علي اي حاجه

عيطت بقهر و وجع بقت تحاول تهديني و قعدنا اتكلمنا يومها قولتلها المشكله مش بس فلوس المشكله اني حاسه اني تعبت مش عارفه اكمل الناس حواليا بيضغطوا عليا

انتي محتاجه راجل انتي لازم تتجوزي انتي معاكي صبيان و مستحيل تقدري تربيهم لوحدك انتي عندك بنت لازم تاخد كل وقتك و تصاحبيها عشان متضيعش من ايدك وانتب تايهه وسط زحمه الحياه

قولتلها مش قادره خايفه اقصر في تربيتهم خايفه ميطلعوش زي ما بتمني خايفه الناس يطلع معاها حق و اطلع انا مش قد الحمل ده خايفه اكون من تعبي و الضغط اللي جوايا انا اللي قصرت مع ميدو و اهملت فيه سألتها يومها نفس السؤال اللي انتي سألتيه اهتم بمين اكتر بما انك كنتي مدرسه كبيره و اتعاملتي مع ولاد وبنات مين فيهم يستاهل اني اديلوا كل وقتي و تركيزي مين فيهم اللي اقصر معاه شويه عسان اعرف اهتم بالباقي الكبير اللي داخل علي سن مراهقه ولا الصغير اللي محتاج رعاية وأهتمام البنت و لا الأمانه اللي سابتها اختي ليا كنت حقيقي تايهه في اليوم ده.

يومها ردت عليا رد بيتهيألي اني بعد ردها ده حياتي كلها اتغيرت و قدرت اقف علي رجلي بجد قدرت اشتغل واهتم و اراعي و اعلم واكبر اطلع بنت بميت راجل واطلع شباب رجاله و مسؤولين الوقت اللي كنت حاسه انه بيجري بيا وانا مش عارفه اعمل اي حاجه بقيت عارفه اقسموا اتعلمت من الست دي حجات كتير في ست شهور خلتني عندي خبره كبيره في تربيه ولادي

نادين…..بتأثر و هدوء ايه الرد اللي ردته عليكي .

حنان…..قالتلي اولاً مفيش حاجه اسمها اهتم بالبنت ولا بالولد و امانة اختك بقت ملكك يعني بقي ابنك زيه زي ولادك و بما انك قررتي تكوني الجبل اللي شايل الحمل يبقي لازم تعرفي ان انتي معندكيش اختيار للفشل او الراحه و قالتلي بالنسبه لسؤالك مين تربيته اصعب فا انا هقولك جملة بسيطه بتختصر سنين تعليم و احتكاك بالبنات والولاد قالتلي الجمله اللي غيرت حياتي بجد.

تربية الولد أشق وتربية البنت أدق فانتبه للادق واصبر علي الأشق علموا البنات الا تكون مثل روما كل الطرق تؤدي اليها ولكن تكون مثل مكة لايستطيع الوصول اليها إلا من إستطاع اليها سبيلا

نادين….بابتسامه معناها حلو اوي بجد

حنان….من كتر ما المعني حلو انا حفظته و طبقته الست دي كان فضلها عليا كبير و يمكن هي شاركت في تربية ولادي من غير ما تحس مجرد جمله قالتها قصرت فيا بعد كده كانت بتعلمني لعب و انشطه مناسبه لسنهم عشان اقدر اشغلهم طول الوقت عشان اطمن عليهم وألهيهم في حاجات تانيه غير اللعب والشقاوه و الاذي و الحمد لله زي ما انتي شايفه كبروا و ربنا ساعدني في تربيتهم و اليوم اللي عيطت فيه ده كان اول واخر يوم و من بعدها الحمل بدأ يخف و الحياه بقت اسهل واتعودت و لما ولادي بقوا رجاله بمجرد ما دخلوا جامعه ريحوني و شالوني بجد و تعبي معاهم كان رصيد ليا ربنا بيحوشه عشان لما اوصل للسن ده ارتاح و افتخر بيهم

نادين…..بابتسامه وهما بجد بيفتخروا بحضرتك و يمكن انا هعترفلك باعتراف انا حبيتك اوي من قبل حتي ما اشوفك بسبب كلتم ميدو عنك هو مش بيحبك حب عادي ميدو قالي كتير انك اعظم ست في الدنيا و الحقيقه هو مكدبش حضرتك بجد حد جميل وقوي و بجد عظيمه

حنان….بابتسامه حبيبتي تسلمي ميدو ده حته من قلبي هو مش ابن اختي ده ابني اللي مخلفتوش كان مجرد امانه بس الامانه دي لما حافظت عليها ربنا عوضني كتير و كأنه بيقولي ده تعبك في تربيته وده اللي تستحقيه ميدو انا مش هقول الكلام ده في حقه عشان اجمل صورته قدامك بس ميدو راجل و بار و حنين و صفاته الحلوه اللي موجوده فيه مستحيل تلاقيها في شاب في سنه الوقت انا يمكن اتحرمت من حجات كتير و ضاع منب حجات اكتر و اتقيت ربنا فيهم اوي و عشان كده ربنا كرمني فيهم و الوقت اقدر اقول اني لا اتحرمت من حاجه ولا ضاع مني حاجه ميدو كان هديه ربنا ليا يمكن وقتها مكنتش عارفه حاجه زي دي بس مع الوقت اكتشفت ان ميدو ده رزقي في الدنيا و خدت نصيبي في الدنيا من جمال قلب ميدو

نادين….بابتسامه جميله ربنا يخليكم لبعض كلكم

ريهام….كنا زمان بنغير من ميدو شويه يعني بس مع الوقت اكتشفنا ان ماما كان معاها حق ميدو بجد طيب اوي و حنين جداً و بجد عمره ما زعل اي حد فينا

نادين…..هو بيحبكم اوي و بعدين مش ميدو بس اللي قلبوا جميل سلامه كمان و ريهام و انا متعرفتس بمصطفي بس كلام ميدو وسلامه عنه بيقول انه ميختلفش عنكم و بصراحه انا شايفه ان السبب في ده حضرتك انتي بجد طيبه و يمكن فيكي كتير منهم او هما اللي خدوا كل صفاتك الحلوه.

حنان….بابتسامه طيب خدي بالك بقي انا بتوتر انا كمان من الكلام الحلو زيك اصل ميدو فتن عليكي وقال انك بتتوتري زيي

نادين….بابتسامه بصراحه اه شويه يعني خصوصا لما أتعرف علي اي حد لاول مره ويمكن كنت متوتره جداً انهارده بس بجد التوتر راح و الكلتم مع حضرتك جميل بجد

حنان……انتي لسه متعرفنيش اوي يا نادين وده طبيعي بس انا متأكده لما تعرفيني اكتر هتحسي انك واحده مننا و التوتر ده هيروح خالص و علي فكره مش انتي بس اللي حبتيني من كلام ميدو انا كمان حبيتك من كلامه عنك و حبيتك اكتر عشان اول مره اشوف ميدو فرحان من قلبه بالشكل ده و هو معاكي

نادين….بابتسامه هاديه قال ايه عني

حنان….بضحكه جميله كل خير بس انا عايزه اسمع منك انتي عايزه اتعرف عليكي اكتر

نادين….اكيد طبعاً طيب تحبي تعرفي ايه بالظبط او ميدو حكالك ايه عني عشان محكيش تاني

حنان….ميدو قال انه عنك كل خير بس انا عايزه اتعرف عليكي

ابتسمت نادين بإحراج و بعدين سكتت واتوترت شويه.

نادين…..اااا طيب أقول ايه أساليني حضرتك في اي حاجه تحبي تعرفيها

حنان….انا مش عايزه الكلام بينا يكون سؤال وجواب انا عايزه اسمع منك تحكيلي عنك اللي يجي في بالك يعني

ريهام…ماما تقصد ان احنا قاعدين قاعدة تعارف يعني انتي بتتعرفي علينا واحنا كمان بنتعرف عليكي يعني فكي كده احنا مش في تحقيق يعني انا مثلاً ريهام عندي 27 سنه درست فنون جميله مع ان رسمي وحش

ضحكت نادين و فضلت بصالها

ريهام….بأبتسامه عندي هوايه وهو بحب العب علي الطبله طبعاً بردوا مبعرفش بس بحبها

نادين….بضحك امال بتعرفي تعملي ايه

ريهام…..بضحك والله بحاول اتعلم و ميدو من وقت ما جابلي الطبله و هو واعدني يعلمني واديني مستنيه

حنان….دي بتهرف تناقر فيا في اخواتها تعمل مقالب تاكل تنام اساليها في الكام هوايه دول هتلاقيها.بتتقنهم اوي

ريهام….بضحك متسمعيش منها هي ديماً ظلماني كده

نادين…..بابتسامه جميله طيب انا هقولكم انا درست تجاره خارجيه و خدت اكتر من كورس في المحاسبه و الاقتصاد من معاهد معتمده أشتغلت وانا في اخر سنه في ثانويه عامه يعني بدأت شغل بجد في الترم الثاني من ثالثه ثانوي كان شغل خفيف بس بعد الثانوي دخلت الجامعه و بقيت اشتغل وادرس حبيت الشغل جداً و بدأت اخد ترقيات كويسه في شركة التسويق في البدايه كنت زي واجهه اعلانيه للشركه بعد كده بقيت اسافر و شغلي كان بين مصر و دبي

عايشه لوحدي مش عارفه ميدو قالكم حاجه زي دي ولا لا ماما و بابا موجودين بس منفصلين من زمان كان عندي 16 سنه كل واحد فيهم اتجوز ماما عندها ولد وبنت و بابا كمان عنده ولد وبنت كل واحد فيهم عايش في بلد وبس انا كنت عايشه مع تيته من اول ما اتولدت و لحد ما وصلت ثانيه جامعه تقريباً لان وقتها كنت بدأت اسافر و هي تعبت حصل معاها جلطه فا خالو اضطر ياخدها تعيش معاه لان هي كانت لوحدها و لما رجعت خدت شقه في التجمع هنا قعدت فيها فتره طبعاً محبتش اعيش مع خالو يعني هو عنده مراته واولاده و كمان تيته هو حاول معايا والله كتير لس بصراحه رفضت و كمان اتعودت ان اقعد لوحدي لما كنت بسافر وبس

ريهام….طيب معلش سؤال لو مش هيضايقك ليه بتقولي انك قاعده مع جدتك من اول ما اتولدتي و قولتي ان بباكي و مامتك انفصلوا و انتي عندك 16 سنه يعني ليه مكنتيش عايشه معاهم قبل الانفصال

نادين…..بابتسامه حزن يعني هما كانوا مقررين ده

ريهام….انا اسفه لو سؤالي ضايقك والله بس هو فضول مش اكتر

نادين….لا خالص بالعكس كل الحكايه ان هما الاثنين كانوا بيشتغلوا قبل الجواز و بابا كان شغلوا بين المغرب و مصر بس وقته كله كان في المغرب و بيجي اجازات و ماما كانت بتشتغل هنا في شركه كبيره و كان لازم تسيبني مع جدتي في تاني اسبوع من ولادي لما بدأت تنزل الشغل فضلت ثلاث ايام تروح توديني الصبح و ترجع تاخدني بليل فكانت مسافه كبيره بعدها بقت توديني افضل هناك طول الاسبوع و ترجع تاخدني الخميس بليل و اقعد معاها الجمعه وتجيبني بليل عشان السبت تبقي في شغلها شويه شويه بقيت اشوفها كل اسبوعين مره كل ثلاث اسابيع مره ولما بابا كان يرجع من السفر اجازه اقضي معاهم يوم او اتنين و باقي الاسبوعين هما يقضوا سوا و بس كبرت علي كده و بعدين دخلت المدرسه عند تيته بردوا و بقيت عايشه معاها خلاص و لما كبرت و انفصلوا ماما سافرت تبع شغلها بين الامارات وفرنسا و بابا طبعاً في المغرب متجوز وبس

ريهام…..هو كان متجوظ يعني ولا اتجوز بعد الانفصال

نادين….لا هي ماما اكتشفت انه متجوز و عنده طفل خمس سنين فا صممت علي الانفصال و بعدها سافرت و هي كمان اتجوزت من مديرها و كل واحد عاش حياته

ريهام….طيب وانتي ليه محدش فيهم خدك تعيشي معاه

نادين….بابتسامه سخريه انا معشتش معاهم وانا لسه متماش الشهر هعيش معاهم بعد ما كل واحد.قرر يعيش حياته بطريقته كان صعب و اصلا محدش فيهم عرض عليا حاجه زي دي

حنان…..بنظره حزن طيب و الموضوع ده اثر عليكي يل نادين

نادين….كتير بس في البدايه بعد كده اتعودت

حنان….طيب علاقتك بيهم ايه ؟

نادين…..عاديه يعني بكلمهم كل فتره و هما كمان لما بيبقوا فاضين بيكلموني

ريهام…..بتشتغلي لسه في مجال التسويق

نادين…..انا مش في الشركه الوقت بس لو حصل و طلبوني في اي حاجه ليها علاقه بالاعلان او الدعايه مش بتأخر طبعاً لانهم ليهم فضل كبير عليا بس حالياً انا عندي بيزنس خاص يعني بشتغل بردوا في مجال التسويق بس للبراندات الكبيره و لشي إن بجيب شحنات من بره و ببيعهم هنا عن طريق بيدچ الحمد لله تخطت المليون ودي شراكه بيني و بين واحده من البنات صحابي كمان بشتغل في مجال العقارات والتسويق العقاري يعني بردوا شراكه بيني و بين البنات عندنا الوقت الحمد لله ثلاث شقق في نطاق التجمع هنا بنأجرهم مفروش للسياح للعرب كده يعني كمان بسوق لشقق و محلات اراضي يعني اللي عايز يبيع بيكلمني اللي عايز يأجر بأجرها ليه و كمان في مطعم بردوا شراكه في مدينتي و اهو بحاول الحمد لله

حنان….براڤو عليكي شكلك شاطره

نادين….الحمد لله يمكن تجربتي العائليه كانت مش قد كده بس كان ليها فضل كبير اني اوصل للي وصلتلوا

ريهام….بابتسامه طيب هسألك سؤال ومن غير كسوف يعني ايه اللي عجبك في ميدو

ابتسمت نادبن بهدوء و بصت بعيد بتوتر و بعدين بصتلهم تاني

نادين…..اااا يعني حجات كتير اهمهم طريقه تعاملوا مع البنت او الست بوجه عام احترامه للست لفت نظري كمان طريقته في الكلام عن حضرتك يا طنط و لما حكي حكايته و قال قد ايه انتي في حياته كنتي زي طوق نجاه ليه حبيت حبه ليكي و حبيت انه مقدر اوي التضحيات و كل حاجه عملتيها عشانه و اكتشفت فيه حجات حلوه كتير بس انا في موضوع حابه اتكلم مع حضرتك فيه او موضوعين كنت حابه اشوف رد فعلك فيهم و بيتهيألي اول واحد شوفت رد فعلك فيه و هو ظروف حياتي و علاقتي بأهلي و قعدتي لوحدي

حنان….و دول فيهم ايه ؟

نادين….يعني عندي فضول اعرف تعليقك علي ظروف حياتي

حنان….مفيش تعليق لان محدش فينا بيختار اهله و محدش فينا بيتولد و بيختار الطريق اللي هيمشي فيه احنا بنكبر يا نادين و بيتفرض علينا حجات كتير واحنا اللي بنحدد الطريق اللي اتفرض علينا ده هيبقي عامل ازاي بعد كده

يعني اللي انا شيفاه انك انتي كمان كنتي قويه و نجحتي في حياتك زي ما انا كمان اتفرض عليا حياه و قدرت الحمد لله اني انجح فيها

نادين…..الحمد لله

حنان…..طيب ايه الموضوع التاني

نادين…..بتوتر بصتلها ااااا انا مش عارفه ميدو اتكلم مع حضرتك ولا لا بس يعني الموضوع اللي بتكلم عنه هو فرق السن بينا

بصتلها حنان بابتسامه هاديه

حنان…..ماله فرق السن

نادين….بصي يا طنط انا طول عمري مش بحب فرق السن بين الراجل والست تقدري تقولي كانت عقده لان امي كانت اكبر من ابويا بسنه و لما حصل الانفصال و خالو قال لبابا طيب ليه اتجوزت من وراها و خلفت و انتوا كان بينكم قصه حب حلوه من ضمن اسبابه اللي قالها انه شاف نفسه غلط لما اتجوز حد اكبر منه و حس بالفرق بعد سنين جواز و كمان اللب اتجوظها كانت اصغر منه بثمان سنين فكان بالنسبه ليه ان هي اصغر بكتير من ماما فا انا الفكره نفسها بالنسبالي كانت مرفوضه

خوفت لان انا مش حمل وجع انا عايشه طول عمري لوحدي فا مش بعد ما ادب امان واحب و ارتبط يجي بعدها يحس انه اتسرع او انا كنت غلطه وقتها هتكسر و يمكن الكلام ده انا قولته لميدو و لما بدأت احس بمشاعر حلوه نجاه ميدو خوفت اكتر و بقيت ابعد و اهرب منه بس هو كان مصمم و فضل بقرب اكتر صدقيني انا عارفه ان في امهات كتير مش بتحب ولادها يتجوزوا حد اكبر و حاولت والله بس هو صمم و انا أستسلمت للفكره نفسها

حنان…..ومن امته فرق السن مهم يا نادين و ليه اصلا شايفه ان كل الناس زي بعض كل واحد ليه تجربه
و متزعليش مني اسباب بباكي مكانتش سبب دي كانت حجه هو مقالش مثلا انه عايز يتجوز او حاسس بالفرق ده غير لما كان اتجوز اصلا و عنده طفل كبير يعني لو فرضنا انه وقت انفصاله عن مامتك كانت اربعين سنه وقتها هو كان عنده طفا خمس سنين و سنه جواز مثلا يعني والدتك كان عندها اربعه وثلاثين سنه يعني مش كبيره دي لسه في عز شبابها

ريهام…..هو الفرق بينكم قد ايه يا نادين اصل بصراحه بتخيل شكلوا وهو قاعد جنبك من شويه مش ملاحظه الفرق ده خالص بالعكس يعني شكلكم قد بعض او هو اكبر كمان انتي جنبه مش باينه و صغننه خالص

نادين…..بابتسامه بسيط ااا انا اربعه وثلاثين وميدو داخل علي الثلاثين

حنان….وليه حسستيني ان الفرق بينكم عشره 15 سنه زي ما ريهام قالتلك انتي صغننه خالص جنبه و مش باين عليكي اصلا

نادين….بابتسامه بصت لعينها شويه يعني بجد حضرتك مش عندك اعتراض علي موضوع السن ده ؟

حنان….والله لو عليا انا اكيد مش معترضه لان مفيش سبب اعترض عليه و لو علي ميدو فا انا عارفه ابني كويس عمره ما فكر بالطريقه دي و الاهم من كل ده حتي لو فيكي سبب يخليني اعترض هنصح مس هعترض او أجبر لان انا ابني راجل و مسؤول عن اختياراته و تصرفاته وارد يتجوز واحده طباعها مش حلوه و مش عجابني بس يمكن لما يعاشروا بعض تتغير عشانه و تبقي
كويسه ووارد يتجوز واحده انا حباها وشايفه انها بنت مفيش زيها و لما يتجوزوا يظهر فيها طباع مش حلوه و يا اما ينفصلوا و يخربوا بيتهم يا اما يعيشوا حياه مش حلوه

فا اللي عايزه اقوله ان الام واجبها تنصح و بس لا تجبر ولا تحكم رأيها و انا واثقه ان ابني راجل و مسؤول و قد اختياراته و قراراته و انتي جميله يا نادين و لو انتي شايفه ان عيبك هو فرق السن يا بقي يارب كل عيوب البنات تيجي في سنها مش طباعها

نادين…..بابتسامه جميله واضح ان ميدو كان معاه حق في كل حاجه قالها عن حضرتك بجد انتي جميله اوي وياريت كل الناس زيك

حنان….انا مش مثاليه يا نادين انا ست تعبت كتير في حياتها و تقدر تحس بغيرها و اقدر اميز بين الحلو والوحش و لو فرق السن بينكم اكتر من كده بكتير اللي يهمني هو انتي مش سنك المهم سيبك بقي من كل ده مش حابه تعرفي اي حاجه عن ميدو

نادين….بابتسامه يعني ايه ؟

حنان….يعني اي حاجه عنه اقولهالك كده في السر عندك مثلاً فضول تعرفي اي حاجه مع اني واثقه ان ميدو صارحك بكل حاجه تخصه

نادين….بابتسامه صراحه هو قالي كل حاجه عنه بس يمكن عندي فضول اسأل حضرتك سؤال يهمني اعرفه

ريهام…..بضحك خير بدأتوا تحطوا راسكم في راس بعض علي ميدو الغلبان

نادين….بضحكه جميله لا ولله مش كده بس بصراحه عندي فضول اعرف هو ميدو بجد هادي مش بيتعصب خالص و علي طول حنين يعني مش عنده اي رد فعل وقت عصبيته

ريهام…بضحك مين قال كده لا بصي اوعي يكون بيضحك عليكي ميدو عصبي جداً وربنا يقدرني علي فعل الخير

نادين….بضحك بجد

ريهام….بضحك و الله عصبي بس ميمنعش انه طيب

بصت حنان لريهام بإبتسامه

حنان….طيب قوليلها مواقف عن عصبيته يعني قولي كده علي موقف حصل بينكم واتعصب عليكي فيه

ريهام….انا لا مستحيل بصراحه عمره ما اتعصب عليا

حنان….طيب علي سلامه و مصطفي

ريهام….هما بيتخانقوا كتير من وهما صغيرين بس خناقات اخوات شباب اللي هو مثلاً يدخل مصطفي علي ميدو الاوضه بتاعته و هو نايم يفتح النور يفضل يخبط و يرزع يرش من البرفيوم بتاعه و يخنقه وهو نايم فا يقوم عسال يقفشوا من قفاه ويطلعوا يتخانق مثلا مع سلامه عشان لبسه لان سلامه بصراحه فظيع مش بيسيبلوا اي حاجه مكويه

ابتسمت نادين بهدوء و افتكرت نفس الكلام ده ميدو كان حاكي ليها نفس التفاصيل

حنان…..طيب يعني مش عصبي اهو يا مفتريه

ريهام….بضحك لا انا قولت خناق عادي بين شباب بس الطبيعي يعني انك تشهدي لسي ميدو

حنان….بابتسامه هاديه اهو شوفتي يغيروا بس لما ادافع عنه بس دي حقيقه هو مش عصبي يعني نقار عادي

نادين…..هو انا بصراحه مكنتش اقصد كده يعني مثلا انا مفيش موقف قوي حصل بيني و بين ميدو بس في مواقف بسيطه بيتهيألي ممكن تعصب شباب كتير لكن ميدو لا و لما اتكلمت معاه قال ان عصبيته مش اوڤر

حنان….صدقيه لان دي حقيقه ديماً بقول ان عصبية ميدو بتخلي الشخص اللي واقف قدامه يتكسف منه ويحس بغلطه من غير اي مجهود هو في العموم عصبيته مش رخمه مع ان ميدو شخص عصبي لدرجه متتخيليهاش بس عمره ما يتعصب علي بنت هو حنين اوي والله

ريهام…..بس خدي بالك لما بتروح منه ممكن يتهور و ينسي نفسه لكن مش علي اللي منه يعني مثلاً موقف في الشارع او لو حد ضايق حد فينا ميدو وقتها بيتحول

ابتسمت نادين و افتكرت عصبيته و ضربه لهادي و دي كانت اول مره فعلاً تشوفوا عنيف بالشكل ده

حنان…..بس مش من النوع اللي ممكن يستقوي علي شخص ضعيف حتي لو شاب او راجل يعني مش شرط بنت و علي فكره سلامه كده كمان يمكن يبان علي سلامه انه بيظهر عصبيته شويه بس هو كمان حنين و اللي واخد من ميدو اوي رغم ان شكلوا ميديش كده مصطفي يعني ده بقي مصيبه و بتاع مشاكل بس في نفس الوقت بيعرف يتحكم في اعصابه من الاخر هو مكدبش عليكي ده طبعه فعلاً

نادين….انا مصدقاه والله مش بكدبه بس يعني لما حضرتك سألتيني دي اكتر حاجه جات في بالي لان كان عندي فضول اعرف شخصيه ميدو اكتر اللي هي معاكم او في شغلوا او في حياته العاديه

حنان…..هو نفسه اللي عرفتيه نفس الشخص اللي عايش معانا و في شغلوا و في حياته العاديه قوليلي بقي عندك فضول تعرفي ايه تاني عنه

نادين…..بابتسامه بصراحه مفيش غير السؤال ده انا بحس ان ميدو كتاب مفتوح و يمكن اتأكدت اكتر الوقت كلامكم عنه نفس اللي هو حكاه ليا بالظبط فا معنديش حاجه تاني حابه اعرفها عنه

حنان….طيب ميدو قالك اكيد انه عايز ياخد خطوه رأيك ايه

نادين….بصراحه لما قالي انا مرفضتش بس يعني حسيت انه مستعجل شويه بيتهيألي ميدو محتاج يعرفني اكتر

حنان…..بس من كلامه هو عارفك كويس و عارف كل حاجه عنك يعني التأجيل ملهوش لازمه

نادين….صح انا حكيت لميدو كل حاجه عني بس انا بخاف من الاستعجال انا شرحت لحضرتك ظروفي و خايفه ميدو يكون مستعجل و يرجع يندم و انا عمري ما هقدر امنعه لو حسيت انه ندمان و عايز يبعد بس وقتها انا اللي هتوجع يمكن انا قولت لميدو في مره اني بدأت احس ان وجوده جنبي ديماً فارق معايا بشكل مش طبيعي و ده لاني عمري في حياتي ما شوفت اهتمام بكل تفاصيلي من اي شخص قد ميدو و مش هكدب علي حضرتك أهتمامه ده خلاني حاسه اني عايشه بجد و صعب اوي انك تخلي بني ادم يحس انه عايش وفجأه تنسحبي من حياته فا خوفي طبيعي ميدو لو قرر مع الوقت يعمل كده انا هتعب اوي عشان كده عبزاه ياخد وقته

حنان…..بهدوء بصي يا نادين انا مقدره كلامك و حقك تخافي و حلو جداً انك تدي للي قدامك مساحه ووقت في التفكير و اخد القرارات و حلو انك تنصحيه ميستعجلش بس هرجع و اقولهالك تاني انتي لسه متعرفيش ميدو كويس يمكن انتي عرفتي كل حاجه عن حياته و هو كمان بس لسه معرفتيش الجزء اللي هو بتاع لو ميدو مصمم علي حاجه فا هو مصمم عليها ليه ؟ جايز يجي في بالك ان هو حبك كا شكل كا طبع وجايز تفكري انه مع الوقت ممكن يندم بس انا امه يا نادين و بقولك ان ميدو عمره ما اخد قرار سريع في حياته قد قراره في ارتباطه بيكي

وده ان دل فا يدل علي صدق مشاعره تجاهك ميدو عارف هو عايز ايه عارف انه مستحيل يندم كان ممكن اقولك احتمال مع الوقت يحس ان مشاعره دي بتقل لو مثلاً فضل في علاقته معاكي من غير ارتباط رسمي او لو مثلاً قالي نلبس دبل بس ميدو لما فاتحني في الموضوع يا نادين اتكلم في جواز و كتب كتاب و خدي بالك هو مستني الوقت اني اخلص معاكي الكلام في موضوع كتب الكتاب يعني من الاخر لازم نتفق ونخلص من الموضوع ده عشان هو مش متحمل

ابتسمت نادين بكسوف و كانت طايره من السعاده.

حنان…..وفي حاجه مهمه اوي عايزه الفت نظرك ليها و عيزاكي لما تقعدي مع نفسك تفكري فيها بقلبك و عقلك و تفهمي كويس اوي النقطه دي ميدو بعد كام يوم من معرفته بيكي قرر يهاديكي بدهب امه اللي هو كان اغلي حاجه عنده و الذكري الوحيده الباقيه من امه الله يرحمها

حطت نادين ايدها علي السلسله و وشردت بابتسامه خفيفه

حنان…..هو عمره ما عملها مع اي بنت حتي اللي عرفهم فتره اكبر من الفتره اللي اتعرف عليكي فيها ودي كمان نقطه لازم تقفي عندها انتي مهمه اوي يا نادين عند ميدو

هزت نادين راسها بإبتسامه جميله و لمعه بسيطه في عينها

كملوا قعدتهم و فضلوا يتكلموا كتير مع بعض .

……………

في منزل أميمه اخت ليله.

اميمه….بابتسامه جميله هتتجوزي يا ليله

ليله….بإبتسامه ايه عايزه ترجعي في كلامك مش كنتي هتتجنني عشان اعملها زيكم

اميمه….لا يا ستي مش هرجع في كلامي و ربنا يعلم فرجة قلبي بيكي عامله ازاي انتي عارفع كويس اني مستنيه البوم ده بفارغ الصبر من يوم ما امك ماتت

ليله….الله يرحمها يارب.

قمر….طيب ايه هيجي امته بقي؟

ليله….مش لما تتفقوا انتوا مع بعض ايه يا احمد قولت ايه انت و سامح و وليد

احمد…..انتي عارفه يا ليله ان كلنا مستنين اليوم ده بس وليد اخوكي وهو اللي يحدد

وليد….ما انت كمان اخوها يا احمد انت وسامح و بعدين يعني انا عن نفسي معنديش مانع يجي اي وقت حتي لو بكره بس الاول هي القاعده دي هتبقي تعارف يعني و لا اتفاق ولا ايه بالظبط وهتبقي فين ؟

اميمه….فين ده ايه اكيد هنا

احمد….طبعاً بما ان انا الكبير يبقي هيجي هنا طبعاً و اكيد هتبقي قاعدة تعارف و لو حصل اتفاق يبقي نتفق علي كل حاجه في القاعده دي مفيش مشكله بس الاتفاق هيتوقف علي هو جاي لوحده و لا مع حد من اهله يعني لو لوحده يبقي تعارف عادي و نبقي نتفق معاه انه يجيب اهله المره التانيه و نتفق بس لو معاه والده حد من اهله و اتعرفنا نتفق عادي مفيش مشكله

سامح…..هو قالك هيجي مع مين يا ليله ولا جاي لوحده

ليله…..رفعت حاجبها و ابتسمت صراحه انا مسألتهوش وهو مقالش يعني كل اللي قاله اني اخد معاد منكم و من وليد

قمر…..خلاص هنسبق الاحداث ليه الراجل جه لوحده نتعرف عليه ويتعرف علينا و تسألوا عنه و عن اهله لو ناس محترمه بجد يبقي علي خيرة الله نحدد معاد تاني و يجوا و نتفق جم معاه من الاول شوفوا بقي هتتفقوا علي طول ولا هتقولوا محتاجين وقت تسألوا

وليد….شكل موضوع السؤال ده مش جاي علي هواء ليله

ليله….لا مش كده بس بيتهيألي مش محتاجه أسأل عنه انا عارفه كل حاجه عنه

احمد…بس ده حقك و افضل ليكي و يمكن يكون شخص كويس قدامك بس اللي الناس تعرفوا عنه مش حلو فا وقتها يبقي افضل ليكي انك عرفتي و جايز اهلوا يبقوا ناس صعبه انا اعرف يعني ان جماعة البدو والعرب طباعهم صعبه جداً و بعدين انتي بتقولي امه صعيديه يعني انتي هتناسبي طباع مختلفه عنك تماماً

سامح….احمد بيتكلم صح و المشكله ان انتي نفسك صعبه يا ليله يعني مستحيل ترضي بأي تصرف او ان حد يجبرك علي عادات و تقاليد

ليله….اكيد بس حتي دي انا مطمنه ليها لان زي ما قولتلكم هما عمرهم كله عايشين هنا و متفتحين جداً و مش اللي هو ماشين علي العادات بشكل مبالغ فيه اصلا اللي كنت اعرفه عن جماعة البدو والعرب انهم مش بيتجوزوا بره بعضهم و دي مش موجوده عندهم كمان في حاجه مهمه بالصدفه تامر اخو سلامه يا أميمه انتي عرفاه انتي وقمر

اميمه….اه طبعاً ماله

ليله…..طلع صاحب اخوات عشري اللي اصغر منه و صاحبهم جداً و قال في حقهم كلام حلو لما سلمي سألتوا قالها عيله كبيره و محترمه و الكل بيعملهم حساب و شكر فيهم اوي يعني لو كان في حاجه كان قالي بلاش علي الاقل طباعهم مش شبهك كمان هما امبارح في خطوبه ايمي اتعرفوا علي بعض لان تامر كان يعرفوا من بعيد يعني مش قربب منه فا موضوع السؤال عنهم بالنسبالي ملهوش لاذمه اوي بصراحه

احمد…..بصي اللي يريحك لو متطمنه وواثقه يبقي علي خيرة الله انا بس قولت ده ضمان ليكي و احنا لسه علي البر بس ادام تامر طلع يعرفهم و عارف العيله كويس و شكر فيهم خلاص زي ما تحبي

سامح….عموماً لما هنقابلوا كمان و نتعرف عليه هيبان عليه سواء هو او اهله هيبان كمان من الاتفاق و هنشوف الدنيا فيها ايه

ليله….تمام طيب اقولوا امته

احمد….لا متقوليش طبعاً انتي بس عرفتيه انك اتكلمتي معانا واحنا مرحبين بيه في اي وقت

اميمه….ايوه صح متحدديش معاد احسن يفكر اننا مدلوقين ولا حاجه

ليله….لا مش كده انا عشانكم بس عشان الوقت يكون مناسب ليك انت وسامح و وليد

وليد….انا اي وقت هتقولولي عليه هاجي

سامح…. انا كمان معنديش اي مشكله.

احمد….و انا زيهم ينور هو واللي معاه في اي وقت

ليله….خلاص تمام انا هعرفوا و هشوف هو هيقولي ايه و اكيد هبلغكم كملت بأبتسامه بس بقولكم ايه لو بباه كان معاه اوعوا تنادوه بعشري لان عشري ده اسم بباه هو محمد وبس

احمد…..بابتسامه لا متقلقيش انا فهمت خلاص

وليد…..طيب ليه بتنادوا بعشري صحيح

ليله….هو وصحابه كاهم اسمهم محمد فا بينادوا علي بعض باسامي ابهاتهم او جدهم او لقب العيله عشان يفرقوا بعض فا خدنا علي اساميهم كده

اميمه…..بسعاده ان شاء الله يطلع شخص كويس و يكملك علي خير عموما انا متفائله لان انتي عمرك ما اتحمستي كده غير لو متأكده من مشاعرك

ليله….بابتسامه اطمني يا اميمه

قمر…..خير ان شاء الله صاحبه دخل البيت من بابه امبارح و هو كمان اهو عايز يدخل البيت من بابه يعني بدايه مبشره

احمد….ربنا يقدملهم اللي في الخير يارب

ليله….بابتسامه يارب.

……………….

بعد ما رشيد خدهم يتفرجوا علي البيت وصلوا ماريز و امنيه و رجع رشيد بايمي علي المطعم بتاعها كانت الساعه سبعه..

طلعوا علي المكتب اللي في الدور الثاني للمطعم و ده مكتب خاص بالبنات

دخلت ايمي و دخل رشيد وراها وقفل الباب.

رشيد….اااااه مش قادر

ايمي….ايه تعبت من اولها يا عريس

رشيد….بابتسامه لا متعبتش بس مصدع اوي و عايز اشرب قهوه

ايمي….لما نتغدي الاول

رشيد….لا غداء ايه اطلبيلي قهوه

ايمي….انا طلبت خلاص الاكل و بيجهزوا تحت لما ناكل ابقي اشرب قهوه.

رشيد….طيب سيبك من الاكل و القهزه الوقت قوليلي ايه رأيك في البيت

ايمي….ما انا قولتلك يجنن مش باين عليا ولا ايه

رشيد…لا باين يا ستي بس عايز اطمن اكتر لا تكوني قولتي كده قدام زوزو وامنيه و خلاص

ايمي….لا طبعاً يجنن والله و هما كمان عجبهم اوي اصلا انت موصفتش البيت كده يعني انا تخيلت انها مجرد شقه عاديه في بيت مش دور أرضي

رشيد….هو انا فعلاً مقولتش بس مجاش في بالي خالص هي دوبلكس دور ارضي ايه مش حابه انها تبقي دور ارضي

أيمي….بالعمس دي تجنن و اللي عحبني اكتر ان هي ليها جنينه زي بيتنا كمان هي من جوه كبيره اوي حتي الاوض كلها كبيره و بجد عجبتني و منظمه جداً بس علي فكره هي خمس اوض مش اربعه

رشيد….لا اربعه اتنين تحت و اتنين فوق

ايمي….لا في ثلاثه تحت في واحده صغيره دي اصغر واحده فيهم

رشيد….اه تقصدي الاوضه اللي جنب المبطخ؟

ايمي….ايوه

رشيد….لا دي صغيره دي مش اوضه

ايمي….امال دي ايه ؟ و هيتعمل فيها ايه؟

رشيد…..بصي يا ستي دي براحتك اعملي فبها اللي يعجبك عيزاها تبقي مكان لخزين المطبخ انتي حره عيزاها مكان لتخزين اي حاجه مش محتجاها اوي في البيت بردوا براحتك عيزاها مكان للغسيل تمام عيزاها تبقي فيها مكتب او حاجه لشغلك و شغلي تنفع بردوا عيزاها مكان او قاعده رايقه بردوا براحتك يعني تقدري تعملي فيها اللي يعجبك

ايمي….بصراحه هي يتعمل فيها افكار كتير اوي بس خلبنا نستبعد فكره المكتب دي لان لا انا ولا انت محتاجين حاجه زي دي و اصلا طول ما انت معايا في البيت لا انت هتشتغل ولا انا الشغل بره البيت وبس البيت ده لينا احنا

رشيد….بابتسامه طيب عايزه تعملي فيها ايه

ايمي….بصراحه مش عارفه بس خلبنا نستبعد كمان فكرتين

رشيد….ايه هما ؟

ايمي….يعني انها تكون مكان لتخزين اي كركبه لان انا مش هسمح بكركبه في البيت يعني من الاخر اي حاجه هتتحط في البيت هيكون ليها لازمه كمان فكرة قاعده رايقه هي مش هتبقي حلوه لان هي طويله شويه يعني الريسيبشن بره كبير و هيتعمل فيه اكتر من قاعده هو تقريباً الريسيبشن اربع قطع مفتوحين صح

رشيد….اه اربع قطع كبار يعني يتعمل فيهم حجات كتير سفره وقاعده كبيره و صالون

ايمي….لا مليش انا في الصالون ده اصلا كل اللي هيجي عندنا ناس مننا يعني صحاب اهل مفيش داعي للصالون والرسميات دي مش دماغي هي قاعده كبيره و سفره و هنعمل قاعده رايقه كده في الجنب اللي قدام الجنينه يعني نعمل حاجه هاديه كده سيبها دي عليا انا

رشيد….انا هسيب عليكي كل حاجه اللي انتي عيزاه اعمليه

ايمي….طيب يعني عمزما هيبقي في مكان خاص بيا انا وانت جوه كمان الجنينه بره انا في حاجه كده في دماغي حابه اعملها اوي

رشيد….عايزه تعملي زي زوزو ولا ايه زرع بقي و مرجيحه وكده

ايمي…..بابتسامه هو مش بالظبط بس بصراحه حابه اخلي الجنينه شبه الكافيه

رشيد….بابتسامه ازاي

ايمي…يعني نعمل قاعده جميله كده تربيزات و كراسي المكان الخاص بالمطبخ والشوي اللي بره هنعمل عليه رخامه كبيره و قاعده بار شكلوا حلو و حابه المطبخ بره يكون مش مطبخ بالمعني بس حباه يكون شكل اي كافيه بنروح فيه عابزه احط كرسي مرجيحه عايزه علي جنب كده نعمل ركن خاص عشان المجانين بتوعي بيحبوا يتصورا كتير

رشيد….بضحكه جميله اه فهمت يعني عايزه في كل ركن كده زي سيشن شبه المافيهات الشبابي شويه

ايمي….بأبتسامه بالظبط من الاخر يعني اما نتجمع نبقي كأننا خارجين في مكان حلو مش في بيت

رشيد….طيب والاوضه هتعملي فيها ايه؟

ايمي….يعني بقول بما ان المطبخ جوه مفتوح علي الريسيبشن فا انا مش حابه المنظر يكون اوڤر عيزاه مطبخ هادي و رايق فا الاوضه دي هتكون خاصه بالخزين بتاع المطبخ

رشيد…..بصي يا قلبي انتي قدامك لحد بكره بليل تكوني استقريتي علي نظام البيت و تعرفي عايزه ايه هنا وعايزه ايه هنا تستقري علي لون الدهان و بعد بكره تكوني مقرره عشان ابدأ علي طول بكره اشوف الناس اللي هتشتغل في البيت و بعد بكره بأمر الله يكونوا موجودين و بيشتغلوا وانتي هاخدك من ايدك و كل حاجه هتبقي استقريتي عليها ننزل نختارها

ايمي….طيب ما نستني علي الحاجه الوقت علي الاقل اسبوع افرض الحاجه لاقيناها زي ما احنا عايزين و موجوده هناخدها نحطها فين و العمال شغاله

رشيد….اولا مستحيل اسبوع دي لان احنا قدامنا اسبوعين و اصلا لما ننزل بيتهيألي مستحيل نلاقي كل اللي في دماغك يعني هنلف شويه و لو زي ما بتقولي لاقينا اللي عايزينه هندفع الفلوس و هنعرفهم ان الحاجه تجهز لحد ما البيت يخلص يعني نديهم مهله مثلاً للاستلام اسبوع ايام كده يعني اطمني هندفع تمن كل حاجه هنختارها و مش هنستلم غير لما العمال يخلصوا وهما بامر الله هيخلصوا في اربغ ايام بالكتير البيت مفيهوش اي تكسير زي ما شوفتي البيت منظم وكل حاجه زي ما انتي حابه يعني بس دهان

ايمي….طيب قولي صحيح انت بتقول العمال هتجيبهم بعد بكره يشتغلوا علي طول انت هتروح فين ؟ و الحاجه اللي في البيت هتوديها فين

رشيد….انا هقعد مع حسان و الحاجه اللي في البيت هما اوضتين و مطبخ و شوبه كركبه ملهاش لازمه كل ده هيتفك بكره و انا هتصرف فيه عشان البيت يكون فاضي

ايمي….طيب ليه هتقعد مع حسان ليه مش هتروح لطنط

رشيد….عشان اكون قريب من البيت و افضل رايح جاي علي العمال معقول اروح الهرم و ارجع علي مدينتي غير الشغل مش هلحق

ايمي….اممم طيب هتعرف تقعد مع حسان

رشيد….اه طبعاً

ايمي….هو عارف بقي و لا لسه هتقولوا

رشيد….هو اللي أقترح عليا اصلاً يعني متقلقيش عليا كل حاجه هتبقي تمام و بكره هتبقي اخر ليله ليا في البيت و بعد بكره هروح لحسان و مش هنام في البيت غير وانت معايا بأذن الله

ايمي….بابتسامه جميله أقولك علي حاجه حساها و متضحكش عليا

رشيد…..بحب قولي يا عمري

ايمي…..حاسه اني متوتره كأني اول مره اتجوز

رشيد….بابتسامه عارف و حاسس بيكي من غير ما تقولي و هتبقي اول مره تتجوزي بجد يا ايمي

ايمي….بحبك يا رشيد بحبك اوي

رشيد…و انا بموت فيكي و عايز اشوفك ديماً مبسوطه

ايمي….انا مبسوطه عشان انت جنبي

رشيد….هفضل جنبك و مش هسيبك لحظه و عايزك تتبسطي بكل حاجه هنعملها كأنك بتعمليها لاول مره عايزك تختاري كل حاجه نفسك فيها عايزك تختاري كل حاجه في البيت علي ذوقك انا مش هختار اي حاجه خالص اولاً لاني واثق في ذوقك ثانياً ده بيتك ولازم تكوني مقتنعه بكل حاجه فيه و عايزك كمان تعملي كل حاجه نفسك فيها تكون هتبسطك من الاخر انا عايز أشوف ابتسامتك و ضحكتك طول الوقت

ايمي…..مش محتاج انك تقولي لاني بجد مبسوطه اوي و علي قد ما كنت معترضه علي المعاد و حساه قريب اوي علي قد ما انا نفسي الوقت يمر بسرعه و ابقي معاك

رشيد….هيعدي يا عمري هيعدي بصي بقي من اول بعد بكره انا هتعبك معايا اربع خمس ايام كده لحد ما نلاقي كل حاجه في الفرش و العفش و نتفق و ادفع العربون و كل حاجه و كمان هتعبك في يوم هنروح البيت و تعرفي العمال كل حاجه انتي عيزاها بعد الاربع ايام دول هتبدأي تشوفي اللي ناقصك انتي يعني لبس حاجتك الشخصيه كل حاجه عشان قبل معاد الفرح بكام يوم تكون كل حاجه وصلت و اتفرشت تيجي بس انتي و البنات تحطي حاجتك و حاجتي بعدها ترتاحي يومين قبل معاد فرحنا

ايمي…بقولك ايه فرحنا دي

رشيد….بضحكه جميله يا ستي جوازنا انا مش فاهم الجمله دي بتضايقك ليه

ايمي….مش بتضايقني بس حوار فرح دي مش جايه معايا

رشيد….افرضي قولتلك عايز اشوفك بفستان ابيض

ايمي….بضحكه جميله بس كده هلبسلك يا عمري فستان ابيض بس ابيض عن ابيض يفرق

رشيد….عموماً اليوم ده سيبيه عليا انا

ايمي…..مش عارفه ليه قلقانه منك وحاسه انك هتفاجئني

رشيد….بقولك ايه انا لحد الوقت بحايلك في موضزع الفرح ده و قولتلك اللي انتي عيزاه هيتعمل بس خدي بالك انا من حقي افرح بيكي بطريقتي يعني لو زنيتي كتير و الله يا ايمي لا هعمل فرح و هعملك احلي زفه

ايمي….بضحكه جميله لا خلاص الطيب احسن سكتنا يا عم رشيد

رشيد….طيب تعالي هاتي بوسه وانتي قمر كده

ايمي….بضحك بعينك

رشيد….هي بوسه متبقيش قاسيه كده

ايمي….و اجي انا ليه ما تيجي انت

رشيد….يا اوزعه بقولك مصدع

ايمي….بحب قامت وراحت وقفت وراه وهو قاعد علي الكرسي ضمته من ضهره و هو قاعد وباسته من خده اي خدمه يا سيدي

مسك كفها باسه بحب رفعت ضهرها و حطت ايدها الاتنين علي راسه و فضلت تعمله مساج خفيف عشان الصداع يروح

رشيد….ااااااا دماغي هتنفجر والله مش كنتي طلبتيلي قهوه

ايمي….دماغك هتنفجر عشان مكلتش من بدري و كمان انت ملحقتش تنام و خد بالك الفتره الجايه لازم تنام بدري لانك هتتعب اوي و تاكل كويس كمان و عشان اضمن انك مش هتنسي نفسك تيجي كل يوم هنا و انا هأكلك بنفسي

رشيد….اطمني هاكل وهنام و بعدين الكام يوم الجايين هتبقي معايا يعني هاكل انا وانتي مع بعض

ايمي….ماشي اما نشوف

رشيد….دوسي دوسي هنا

ايمي….بحب سلامتك يا عمري بقولك ايه قوم كده معايا

مسكته من ايده تشده

رشيد….علي فين انا مش قادر

ايمي…..تعالي بس اقعد هنا علي الكنبه دي ريح شويه و انا هنزل تحت اشوف الاكل و اجيلك تاني

رشيد…ماشي يا قلبي و القهوه عشان خاطري

ايمي…حاضر المهم التكييف بارد عليك ارفعه شويه

رشيد…لا لا كويس كده

ايمي….الجو برد شويه

رشيد….لا كويس والله خليه

ايمي…اوك يا حبيبي يلا مش هتأخر عليك

رشيد….ماشي يا حبيبي

……………

في تمام الساعه السابعه و النصف وصل حسان بيت سلمي و معاه هنا

فتح احمد الباب و استقبلوا هو و تامر و سلمي.

حسان….مساء الخير

احمد….اهلاً يا حسان نورت البيت اتفضل

حسان….منور بصحابه ازيك يا تامر

تامر….بابتسامه اذيك يا حسان اخبارك ايه

حسان….الحمد لاه تمام

مد ايده حسان بالحاجه اللي.كانت معاه لتامر

تامر….ايه اللي انت عامله ده بس تعبت نفسك ليه

حسان….دي حاجه بسيطه متقولش كده ابتسم بهدوء اذيك يا سلمي

سلمي…بابتسامه إحراج ااا اذيك يا حسان ايه ده هي فين هنا؟

حسان….بإبتسامه بسيطه روحت

احمد….ليه مش قولتلك تيجي معاك

ابتسم حسان شاور بعينه علي جنب الباب

ابتسم احمد وهز راسه

احمد……تصدق زعلت كنت مستنيها عشان نلعب سوا و نعمل سحر مع بعض مد راسه لبره و قفشها

هنا….بضحكه جميله جدووووو

احمد….بابتسامه واسعه اهلاااا حبيبه جدو القمر انتي مستخبيه

سلمب….بضحكه جميله طلعنا بتوع مقالب زي سلامه

حسان…..هي قالتلي عايزه اعمل مفجأه

احمد….مفجأه قمر زيها

سلمي…..هنا تعالي

قربت منها هنا شالتها و باستها

تامر…..بابتسامه لعب في شعرها اذيك يا هنا

هنا…..الحمد لله ايه ده عندكم كلاب

تامر….اه ايه رايك حلوين ؟

هنا…..اه حلوين خالص

تامر….بتخافي منهم ولا بتلعبي معاهم

هنا…..لا مش بخاف دول صغيرين

سلمي….الوقت نلعب معاهم كتير لحد ما تزهقي

هنا….اوك.

احمد…..تعالو يلا اتفضل جوه يا حسان

دخل حسان معاهم و قعدوا كلهم في الصالون البيت كان شيك و هادي لكن في روح الاسره و الدفئ حس حسان براحه و هدوء جميل بس كان لسه باين عليه التوتر

احمد….ايه الاخبار يا حسان

حسان….كله زي الفل الحمدلله

احمد…البيت مش بعيد عليك صح

حسان….لا خالص يعني تلت ساعه او نص ساعه بالكتير استاذه هنا بس اللي اخرتني كانت عامله فيها موديل و عماله تغير في اللبس

احمد….هنا تعمل اللي علي مزاجها المهم تبقب مبسوطه

تامر….افرحي يا ست هنا جدو واقف في صفك

ابتسمت هنا ببراءه

احمد…..ايه يا سلمي مش هتشربينا حاجه

سلمي….اكيد قامت وقفت طيب تشربوا ايه عصير ولا قهوه و لا ايه بالظبط

احمد…..هاتي العصير الاول و بعدين اعملي قهوه

سلمي…..ماشي تيجي معايا يا هنا

هنا….بصت لحسان بابي اروح

حسان….بإبتسامه طبعاً روحي

احمد….ربنا يحفظك يا حبيبتي

راحت سلمي هي و هنا مع بعض علي المطبخ وسابتهم كلامهم كان عادي لسه و متكلموش في اي تفاصيل.

………….

عند نادين الكلام سرقها مع حنان و ريهام اندمجوا جداً لدرجة انها نسيت التوتر و بقت تتعامل بطبيعتها يمكن اكتر من طريقتها مع عسال نفسه ضحك و هزار مع ريهام و كلام هادي و نقاش مع حنان اتكلموا في كل حاجه تقريباً اتعرفوا علي بعض اكتى فتحت نادين قلبها لحنان و حنان كمان فتحتلها قلبها

و كسرت الحاجز اللي كان جوه نادين حكيتلها عن طفولة عسال وعن مواقف كتير جميله جمعتهم ببعض كلمتها في فكرة تصميم عسال علي كتب الكتاب و عرفت من نادين حكايتها مع هادي و السبب اللي خلاها تخبي وهو خوفها علي ميدو كلمتها عن علاقه امها وابوها و ازاي مع الوقت قدرت تتخطي كل ده و تشغل نفسها بشغلها كلمتها عن علاقتها بالبنات و اتكلمت كتير اوي عن أيه و خدت وقت طويل في حكايتها كانت حابه تفتح مجال لمعرفتها بأبه كمان عشان علاقتها بسلامه تكمل بسرعه شالت العصير و عملت قهوه و ساعدتها ريهام و خدت راحتها نادين علي الاخر و راح التوتر وخلصوا كل كلامهم في قاعده واحده و كانت قاعده بتحمل معاني كتير اوي واخيراً وصل عسال.

رن الجرس قامت نادين تفتح الباب اول نا فتحت لاقته واقف قدامها و شايل في ايده بوكس كبير شويه

نادين…..بإبتسامه انت ايه اللي جابك الوقت

عسال…بضحكه جميله الله كمان مكنتيش عبزاني اجي لا ده واضح ان في تطورات كبيره

نادين….ايه اللي انت ماسكه ده

عسال…وسعي بس سيبك من اللي انا ماسكه و اياكي تفتحيه الا لما اروح و اكلمك ڤديو نفتحه سوا المهم بقي تعالي احكيلي

نادين….بإبتسامه إحراج سيب ايدي هيشوفونا

عسال….بحب تعالي بس

نادين….ميدو ميدو سيب

راح ميدو علي حنان و ريهام وهو قابض علي كفها وهي هتموت من الكسوف سحبت ايدها بسرعه و رجعت ايديها وراء ضهرها ووقفت

عسال…..بحب ايه الاخبار يا ست الكل

حنان….بسعاده كله تمام جيت قطعت كلامنا بس يعني تقدر تقول اننا اتكلمنا خلاص

عسال….الله هو في ايه بقي هي تقولي ايه اللي جابك و انتي تقولي جيت قاطعت كلتمنا خلاص بقيت عزول بينكم

ريهام…..صراحه اه و بتيجي في اوقات رخمه كمان

عسال…..ماهو انا بقي لاقيتكم طولتوا كل شويه اقول هيتصلوا و يكلموني عشان اجي مفيش زهقت من القاعده لوحدي قولت اطلع اشوف ايه الحكايه

نادين….بإبستغراب تطلع ليه هو انت كنت تحت

عسال….بإبتسامه بعنب كنت قريب قعدت كده علي كافيه و بس

نادين….انت مش قولت عندك مشاوير و شغل

ريهام….بضحكه جميله لا كان بيشتغلك عشان ينزل

نادين…بأبتسامه صدمه بقي كده

عسال….طيب اعمل ايه كنت عايز اسيبكم براحتكم عشان تتكلموا و كنت عارف اني لو فضلت مش هتتكلمي خالص فا قولت انزل المهم يعني اني شايف الدنيا زي الفل ايه يا ست الكل

حنان…ايه يا سي ميدو كل اللي اقدر اقوله يا بختك بيها و يابختها بيك مبروك يا حبايبي ربنا يتمملكم علي خير ويلا بقي عايزين نفرح بيكم

ابتسمت نادين بإحراج و بعدت عينها بسرعه عن ميدو

عسال….بسعاده مس بقولك شايف ان الدنيا زي الفل الله يبارك فيكي يا حبيبتي و يخليكي لينا يارب و قريب اوي نفرح بسلامه كمان

حنان….نادين حكيتلي كتير عن ايه و شوقتني اشوفها و اتعرف عليها

عسال…..قريب ان شاء الله هتحبيها اوي و هتجننك زي ما كلنا مجننينك كده و من الاخر عشان بس تكوني في الصوره هيبقي معاكي بدل اربع ولاد هيبقوا سته خمسه منهم هبجننوكي و نادين بس اللي هتريحك عشان هي اهدي واحده فينا

ريهام….نعمممم مين ده

حنان…بضحكه جميله لا انت شكلك لسه متعرفهاش كويس بقي هي مش هاديه اوي يعني و من الاخر انتوا السته هتجننوني

عسال….بضحك لا هو في سر لازم اعرفوا الكل مجتمع علي انك مش هاديه وخدي بالك عيب في حقي

ضحكت نادين و هي وشها احمر و بعدت عينها عنه

عسال….ماشي اضحكي اضحكي هنشوف الموضوع ده بعدين

نادين….طيب قولي تشرب ايه

عسال….لا ولا اي حاجه اشرب ايه ده انا شربت حجات قد كده بقالي كتير في الكافيه احنا نمشي بقي عشان هوصلهم و هروح المعرض في السريع كده و في واحد هقابلوا هيفرجني علي محل لمصطفي يارب يطلع حلو

ريهام….بقي بالذمه مش مكسوف علي دمك يعني معاك نادين و رايح تسأل حد عن محل

نادين…..شوفتي بقي يلا براحته

عسال….بضحكه جميله ايه لحقت سخنتك عليا ما انا قولت قدامك لو كان في حاجه معاكب كنتي قولتيلي و بعدين محبتش اتعبك و اسغل بالك

نادين….انت قولت بس مطلبتش و عموماً شوف المكان لو عجبك اوك معجبكش عندي مكانين حلوين اوي واحد دور ارضي عادي و واحد دور ارضي علوي و منفصل تماما عن باقي المحلات اللي جنبه و ليه سلم خاص بيه و بيتهيألي ده هيعجبكم اوي

عسال…..طيب خلاص هكنسل اصلا المشوار ده و خلينا نشوف اللي عندك بس هما فين؟

نادين…..واحد في مصر المهندسين اللي هو الارضي و التاني هنا في التجمع

عسال…..بيتهيألي المهندسين بعيد عليه شويه خلينا نشوف اللي هنا جنبك

ريهام….خدب بالك هو لا بعيد ولا حاجه بس من الاخر ميدو هيعملها حجه عشان يبقي جنبك عارفه انا الحركات دي

ضحكوا كلهم و بصلها عسال و هو بيصربها بالكف

عسال……بحب قلب اخوكي انتي فضيحه

ريهام….بضحك عيب عليك كشفاكم كلكم

عسال….بضحك طيب يلا يا مصيبه اوي يلا يا ست الكل

حنان….يلا يا حبيبي

نادين….طيب خليكم شويه هو انت ليه محلصتش مشاويرك و بعدين جيت

عسال…..تصدقي انا غلطان انا قولت هطلع الاقيكي ميته في جلدك و مش عارف تقزلي كلمتين علي بعض قولت الحقك

حنان….لا اطلع انت منها احنا بقينا صحاب.

عسال…..ماشي يا ست الكل هطلع منها

حنان…..نادين حبيبتي مبسوطه اوي اني اتعرفت عليكي و بجد كان وقت جميل اوي و يمكن بقالي فتره طويله مقعدتش قعده حلوه زي دي

ريهام….شوف النصب بقي كل يوم عاملين في البيت مسرح العرايس و مظبطينها

عسال….بضحك يا بت خلي حد يقول كلمه حلوه

نادين…..بضحك نسخة ايه وسلامه والله

حنان….سيبك منها والله كان يوم جميل قربت منها وضمتها تسلم عليها

نادين…..والله يا طنط انا اللي مبسوطه اوي و الوقت جري و حضرتك حد جميل و شكراً علي تعبك و زيارتك ليا

حنان….ان شاء الله هتتكرر تاني و المره الجايه عندنا

نادين….ان شاء الله

ريهام…..مبسوطه اني اتعرفت عليكي و اخيراً و بعد طول انتظار بقي عندي اخت بنت

نادين….انا اللي مبسوطه اكتر والله ياريهام و شرف ليا طبعاً اني ابقي اختك ضمتها نادين بحب وسعاده

عسال…..ان شاء الله قريب اوي هيبقي عندك بدل الاخت اتنين

ريهام….ان شاء الله يا حبيبي

حنان…..يلا يا حبيبتي خدي بالك من نفسك سلام عليكم

نادين….بإبتسامه حاضر و عليكم السلام

ريهام….باي يا نودي

نادين….باي يا ريهام

عسال…..بلا يا حبيبي محتاجه حاجه

بصت بعينها عليهم كانوا واقفين قدام الاسانسير

نادين…لا شكراً

مسك كفها باسه بصتلوا نادين بصدمه و هي مكسوفه

نادين….بهمس ميدووو

عسال….بنظره تجنن قلب ميدو

غمضت نادين عينها وهي نفسها الارض تتشق و تبلعها صوته عالي و مش مكسوف وهي هتموت من الكسوف

عسال….ليله مش جايه صح

نادين….بتوتر اااا لا هيروحوا خلاص

عسال….طيب تقفلي علي نفسك كويس بمجرد ما اقفل الباب و لو في اي حاجه كلميني

نادين…..حاضر بصت عليهم كان الاسانسير وصل و هما بيدخلوا ميدو ممكن لحظه

عسال…..اوك ريهام ثواني جاي وراكم

ريهام…..اوك هننزل طيب وتعالي انت

عسال….تمام

قربت نادين منه بسرعه و مدت ايديها بمفتاح

نادين….ممكن تخليه معاك

عسال…..بأستغراب ده مفتاح ايه ؟

نادين….بتوتر ااااا لعبت في شعرها و هي بتلف ضهرها و بتبص شمال و يمين مسكها من درعها و لفها ليه تاني و هو مبتسم

عسال…..ده مفتاح البيت هنا صح

بصتلوا نادبن بإبتسامه بسيطه و هي بتعض علي شفايفها من الكسوف وهزت راسها

ابتسم عسال بحب وباس راسها

عسال…..طيب تمام انا هاخده اكيد بس عندي فضول اعرف ليه ؟ ولا مش عايزه تقولي

نادين…ااااااا صدقني مش عارفه بس للحظه حسيت اني عايزه اعمل كده يمكن انا بثق فيك و اكيد بحبك بس بعد ما قعدت مع مامتك حبيتك اكتر و ثقتي فيك بقت اكتر بكتير و حابه يكون المفتاح ده معاك حتي لو مش هتعمل بيه حاجه بس يعني و جوده معاك هيخليني احس بالامان اكتر و هيخليني ابقي متطمنه لو حصل معايا اي موقف هتقدر تجيلي و تلحقني

عسال…..حط كفه علي خدها وبصلها بحب وانا طول ما انا جنبك و عايش و بتنفس مفيش مخلوق في الدنيا ممكن يقرب منك او يأذيكي فهمتي

ابتسمت نادين وهزت راسها

عسال….المفتاح هيفضل معايا و انا واثق اني مش هحتاجه لان في اقرب وقت هتبقي في حضني

ابتسمت نادين بنظره تجنن

نادين…..بحبك اوي

عسال…..وانا بحبك اكتر يا احلي تويتي في الدنيا يلا حبيبي ادخلي و اقفلي عليكي كويس واياك تفتحي البوكس الا لما اكلمك

نادين….بسعاده مش هفتح اي حاجه غير لما توصل

عسال…..تمام يلا يا عمري اقفلي

نادين…طيب هشوفك لحد ما تركب الاسانسير

عسال…اقفليييييي وروحي بصي من البلكونه

نادين…حاضر

قفل عسال الباب وراح يشد الاسانسير فتحته هي بهدوء و بصت و هي مميله راسها و بتضحك

عسال….بضحكه جميله اقفلي واسمعي الكلام يلا الاسانسير طلع

نادين….حاضر باي

عسال….باي يا حبيبي

قفلت نادين و فضل ماسك باب الاسانسير لحد ما سمع صوت قفل الباب نزل وهي جريت علي البلكونه تشوفوا قرب عسال منهم وفتحلهم الباب و راح يركب و قبل مايركب رفع راسه وبصلها

ابتسمت نادين ورفعت ايدها رفع عسال ايده بحب و شاورلها و بعدين ركب و مشي.

…………….

طلعت ايمي علي فوق و هي معاها شاب شايل الاكل فتحت براحه لمحت رشيد نايم في سابع نومه شاورت للويتر بهدوء راح حط الاكل براحه علي التربيزه و دخل ويتر تاني معاه باقي الحاجه حطوا الاكل ونزلوا

قفلت ايمي وراهم الباب وراحت لرشيد قعدت علي ركبها قدامه وحطت ايدها علي خده بحب وهي بتمشي ايدها علي وشه

ايمي….رشيددددد حبيبي

رشيد….امممم

ايمي….يلا اصحي عشان تاكل يا قلبي التكل طلع

رشيد….بصوت نايم فين القهوه

ايمي….يا خرابي علي القهوه و سنينها لما تاكل هجيبهالك يلا قوم بقي

رشيد…..مش قادر والله يا ماما انا مصدع اوي

ايمي…..عشان مكلتش يلا قوم كل و هديك مسكن و بعدها تشرب القهوه قوم بقي متبقاش رخم

رشيد….طيب يلا ااااااه

ايمي…..احيه علي العريس اللي داخل علي جواز و مش قادر يصلب طوله

بصلها رشيد وضحك و رفع حاجبه

رشيد….لا انا جامد اوي اتلمي متخلنيش اتجنن كلها شويه صداع وقلة نوم

ايمي….بضحكه جميله ماشي يا سيدي مصدقاك يلا قوم بقي كل

رشيد….يلا بينا يا حبيبي

………..

عند نعيمه اتصلت علي فضل

نعيمه…..الوووو

فضل….ها يا حبيبي

نعيمه….بقولك ايه

فضل…..خليكي معايا وش فيك انت مالي خلج والله لهدراتك بطجك عراسك يا عدي يلا احط من وچهي

عدي….. بضحك ترا والله ما تجدر هذا هدر فاضي

فضل…..بضحك طيب تع ايش بيك واجف بعيد

عدي….بضحك والله بهوانب يچي صوبي

فضل….والله إذا چيت صوبك ما بترك فيك عرق سليم يلا أحط من وچهي كمل بإبتسامه ايه يا حبيبي معاكي

نعيمه…لا وعلي ايه روح كمل هزار وسيبني علي الخط كده بس انا غلطانه المفرض كنت قفلت في وشك

فضل….طيب وانا موافق يا ستي بس تقدري تعمليها

نعيمه…..بإبتسامه اه اقدر عادي يعني

فضل…..طيب يلا جربي

نعيمه….بضحك طب استني لو عملتها هتعمل ايه

فضل….مالك ومالي بقي مش قلبك جامد و تقدري يلا جربي

نعيمه….ايوه يعني هتعمل ايه مش فاهمه بتهددني مثلا

فضل….ياستي و اهددك ليه انتي خليكي قد قولك و نفذي و اللي انا هعملوا بتاعي بقي

نعيمه….بضحك لا خليني انا الكبيره مش هعمل عقلي بعقلك

فضل….وماله الجبن ليه ناسه بردك

نعيمه….بضحك لا بقولك ايه اتلم و متسخنيش بدل ما ارزع السكه في وشك

فضل…..يمين بالله تلاجيني اسرع من سوبر مان و معلجك من رجابتك

نعيمه….بضحك لا استني بس اهدي مش كده يا شيخ العرب انا بضحك معاك

فضل….اي وماله اضحي الضحك زين وحشتني يا بطل

نعيمه…..ميرسي

فضل….ميرسي ااااه تَعرف ياواد يا عدي مره واحده جالتلي ميرسي من يومها مشافتِش ضو

عدي….بضحك العيب عالزلمه اللي لا مهابه ولا وقار

ضحكت نعيمه من قلبها

فضل….بضحك اغرب عن وچهي والله بدفنك بأرضك بتضحكي

نعيمه….بضحك احسن جبته لنفسك هو ده اخو عشري

فضل….اه عدي الواطي فينك انتي

نعيمه……لسه مخلصه شغل و بفكر اروح اشوف اخواتي

فضل…..لسه بتفكري يا تروحي يا متىوحيش الساعه 8 ونص

نعيمه….مالها يعني ما لسه بدري

فضل…بدري من عمرك علي ما تروحي فيها ساعه و اسه هتقعدي و لسه هترجعي لو رايحه اخلصي

نعيمه….متزعقش

فضل…..مبهزرش انا خلصي لو هتروحي

نعيمه…..لا خلاص مش راحه انا مش قادره

فضل….طيب و لزومه ايه النكش

نعيمه….بضحك عادي بضايقك

فضل….وتضايجيني ليه بس يابت الحلال

نعيمه……هو كده يا شيخ العرب عاجبك ولا لا

فضل…اي وماله عاچبني

نعيمه…..فضل

نعيمه….عيوني

نعيمه…..وحشتني

فضل….الللللله ده بجد

نعيمه…..امممممم

فضل…..وانتي كمان وحشتيني يا قلب فضل

نعيمه…..فضل

فضل….عمر فضل

نعيمه….بحبك

فضل….بضحكه جميله وانا بموت فيكي

نعيمه…..فضل

فضل…..بضحك لا بنقولك ايه انا كده مش هنقدر نقف علي رجلي

نعيمه…بضحك هو انا عملت ايه بس انا بنادي عليك

فضل…..عملتي كتير وانتي مش داريه ومش عذلك خير قلب فضل

نعيمه….خلاص مش عايزه انا مروحه

فضل….احسن بردوا شكلك مش علي بعضك و قعدتك في الشارع خطر عليكي

نعيمه….بضحك احترم نفسك و خليك مؤدب

فضل….حاضر يا ست البنات خليني مؤدب يلا روحي و لما توصلي طمنيني

نعيمه….بدلع فضل

فضل……شوفي اظبطي روحك عشان اليوم يعدي

نعيمه….بضحك هو انا كلمتك طيب

فضل….عايزه ايه

نعيمه…بقولك وحشتني

فضل….وانتي وحشتيني والله بس قوليلي فيه ايه بالظبط قولي اللي عيزاه

نعيمه……امممم هتوافق

فضل…الللللله انا قولت في حاجه خير

نعيمه….عايزه اشوفك

ابتسم فضل و سكت ثواني

نعيمه….امممممم عندك شغل مشغول و كده كده موحشتكش اوي عشان كنت لسه شايفني امبارح يعني ملحقتش اوحشك زي ما انت وحشتني

فضل…..قطع كلامها و هو بيحط المفتاح في العربيه حالا هكون عندك

عدي دير بالك مشزار وراچع

سمعت صوت نغمه شبه الانذار في العربيه و هو بيرجع لوراء ابتسمت بصدمه

نعيمه….ابتسمت بصدمه فضل انت جاي بجد؟

فضل….بابتسامه نفخ دخان سيجارته طلعت بالعربيه قوليلي مكانك او اقولك روحي اركني و انا هجيلك علي البيت

نعيمه….بضحكه جميله لا استني خليك عشان شغلك و الله كنت برخم عليك و اشوفك هتقول ايه

فضل…..انا طلعت خلاص يلا اركني و هجيلك

نعيمه….بتنهيده وصل صوت نفسها ليه انا بحبك اوي

فضل….بابتسامه وانا بموت فيكي مش هتأخر عليكي

نعيمه….بحب وسعاده ماشي..

وللحديث بقيه……