لقاء كـ،ـ،ـ،ـارثي
تقي…..هيحصل ايه بس متخافيش احنا معاكي و ياستي ممكن نخرج في اي مكان قريب يعني هنا او في التجمع و بعدين انتي ليه حاطه في دماغك انهم مراقبينك انا بيتهيألي هما مش هيقدروا يعملوا كده و كمان اكيد مش فاضين اربعه وعشرين ساعه عشان يشوفوا هتخرجي من المنطقه لوحدك امته
نغم…..انا اتوقع منهم اي حاجه اللي يعمل اللي هما عملوا ده مبيخافش من اي حاجه و بعدين الموضوع بقي في ضغط منهم و تهديد عشان اتنازل و نمشيها ودي
نسمه….حتي لو هددوا مش في محضر عدم تعرض ده مجرد كلام يخوفوكي بيه مش اكتر عشان تتنازلي
تقي….اللي عايز يعمل حاجه يا نغم بيعملها يعني لا قدر الله لو في دماغهم اي شر ليكي مش هيهددوا او يخوفوكي هتلاقيهم عملوا كده علي طول
نغم….معرفش بقي بس انا مش مرتاحه ليهم انتوا متعرفوش مريم دي ممكن تعمل ايه
نسمه…..بس انتي موقفك اقوي واكيد حقك هيرجع
نغم….يمكن موقفي اقوي بس هما نكروا حجات كتير و كدبوا حجات كتير مريم مش سهله و تقدر تطلع من اي مصيبه و بدأت احس اني مش هوصل لحاجه معاها
نسمه….ليه التشاؤم ده بس
نغم….مش تشاؤم بس حتي المحامي اللي معايا قال كل اللي عندوا وقدم كل حاجه و بيقول ان المحامي اللي معاها مش كويس و معاها كمان ناس في ضهرها حتي عيلتها كلها كلامهم و شهادتهم كانت ضدي انا و حتي تيته اللي توقعت انها لما تعرف كل ده بالتفاصيل دي تقف معايا
تقي….طيب افرضي يا نغم اللي بتقوليه ده اللي حصل فعلا هتعملي ايه
نغم….هعمل ايه يعني خلاص حقي و حق اختي هاخده بس عند ربنا
تقي…..طيب و تفتكري لو ده حصل هما هيفضلوا وراكي
نغم….مش عارفه بس ممكن لا لان اللي هما كانوا عايزينوا اني مفضحهمش بس انا فضحتهم و للاسف هما مش من نوعية الناس اللي الفضيحه تهدهم او تخليهم مش قادرين يبصوا في عين اي حد تقدري تقولي كده انهم مبقاش يهمهم اكتر
نسمه……طيب لو كلامك ده صح ليه بيهددوكي وليه عايزين يدوكي فلوسك و فلوس اختك و عارضين زياده كمان عشان تتنازلي بيتهيألي لو زي ما بتقولي مش هيفرق معاهم ادام فضحتيهم و مش هيدوكي فلوسك اصلا
نغم….بالعكس عشان مريم عندها شغلها ودنيتها و هي شايفه ان حوارات النيابه و المحاميين و كل ده تضيع وقت و هي عايزه تخلص عشان تشوف حياتها من الاخر بتشتري راحتها بالفلوس
