لقاء كـ،ـ،ـ،ـارثي
الدكتور….مش يمكن الرؤيه وضحت ليكي اكتر و دي الصوره اصلا اللي كانت في بالك
نعيمه….مش عارفه بس صدقني مشاعري نجاهه عكس اللي جوايا ليه اللي جوايا ليه كنت خايفه يكون غير انه اخ او صديق بس اتأكدت انها كده بجد مشاعري ليه كان فيها لغبطه بين اول انطباع و الاحداث اللي كانت بتحصل بعد كده بس اللي انا حساه الوقت حالا لا مش هو اللي كان بيجي في بالي و لا هو الشخص اللي سيبت حياتي كلها عشان انساه و اختارت البعد عشان خوفت اعمل حاجه غلط بالعكس هو فضل موجود و لما اتكلمت معاه كنت بتكلم عادي مش بمثل علي نفسي
الدكتور…..مكالمتكم كان فيها ايه
نعيمه….كانت كلها عن فضل
الدكتور….عاتبك
نعيمه….عاتبني و حاول يفهم مني بس بصراحه يعني مكانش متحيز لفضل عشان قريبه كان بيتعامل عادي هو عايز يظبط الدنيا بينا و اكيد صعبان عليه فضل
الدكتور…..في عتاب او نبره منه ضايقتك
نعيمه….لا خالص بالعكس عشري شخص محترم و طيب و بيتعامل معانا كلنا علي اننا واحد يمكن في كلمه قالهاهي بس اللي شوشتني اوي
الدكتور…..كلمه ايه
نعيمه….كنا بنتكلم و قولتلوا والله كلكم وحشتوني اوي قالي احنا بس كان يقصد فضل و الحقيقه ان الكلمه دي وقفت عندها لاني بجد مفتقداه و وحشني اوي و يمكن كمان مكنتش متخيله انه يفرق معايا بالشكل ده.
الدكتور…..وايه تاني
نعيمه…مفيش في نفس اليوم هما اتجمعوا عند ليله وعشري و فطروا معاهم و حصل بقي الاحداث دي و الدنيا هنا باظت اتصلوا بيا و اطمنوا
كلهم كانوا بيكلموني و الحقيقه اني في الوقت ده كان المطار قدامي من الشبابك متدمر و النار و الدخان كتير و قبلها الصوت اللي سمعتوا خلاني موت في جلدي صوت الانفجار او الضرب و طول الوقت كان في صوت طيران غير الرسايل اللي بتيجي تحذر كلها تقلق في الحقيقه كنت مرعوبه و انا بتكلم معاهم و خوفهم عليا اتنقللي و خوفني اكتر و قبلهم امي و اختي و ابويا كانوا بيكلموني و مرعوبين فا التوتر عندي كان فوق طاقتي و في وسط ماهما بيكلموني لاقيته جه وقف وراهم و بص عليا
الدكتور….حسيتي بأيه وقالك ايه
نعيمه….هو وقف مقالش بس كان باصص عليا حسيت وقتها اني عايزه اقفل مش قادره اشوفوا خوفت منه عارف لما تبقي عامل حاجه غلط في حق حد وفجاه تلاقيه قدامك اكيد بتتلغبط و تتوتر و تخاف وقلبك يدق جامد و كل ده كوم واني اشوفه و انا مفتقداه كوم تاني و يمكن وقتها لا شوفت عشري بقي ولا البنات و لا حد عيني كانت عليه هو شويه و لاقيت الموبايل في ايده هو و باصصلي و بيتكلمني قالي متخافيش و مش فاكره يعني قالي ايه تاني انا كنت بصاله و مردتش معملتش حاجه غير اني قفلت بسرعه
