لقاء كارثي

مها…..انت غيران عليها يا وليد

وليد….والله مش عارف يا مها انا بحب عشري والله و مبسوط عشان اختي بتحبه بس عندي احساس كده ان في حد سرق مني روحي ليله مش اختي يا مها ليله بنتي بنتي الصغيره اللي تاعبه قلبي و مجنناني بنتي العنيده اللي راسها ناشفه و علي طول بتخانق معاها بس بحبها و قلبي بيحبها وروحي بتحبها

انا طول عمري متعلق بيها من وهي صغيره كانت جميله يا مها كنت اوقات كتير بحس انها لعبتي اللي مينفعش حد ياخدها مني الله يرحمها امي لما كنت تزعقلها او تمد ايدها عليها كنت بتعصب لدرجه اني بمسك نفسي اوي عشان مزعلش امي مني و اتحاسب علي صوتي العالي في وشها طول عمري بعتبرها بنتي و بحبها بجد و هي عارفه اني بحبها انا وقت ما اميمه و قمر اتجوزوا فرحتي بيهم و انهم راحوا بيتهم كانت واصله للسماء بجد كنت فرحان اوي اني بجوز اخواتي واسترهم في بيوتهم و حاسس اني عامل دوري علي اكمل وجه اب واخ

بس ليله علي قد فرحتي فيها علي قد ما حاسس والله ان في حاجه وجعاني اوي

مها…..لا يا حبيبي افرحلها متقولش كده هي كمان راحت بيتها و بتبدأ حياتها

وليد….عارف و فرحان والله العظيم بس وحشتني بنت الجزمه ام لسان طويل هتصدقيني لو قولتلك ان حتي خناقها معايا و طولة لسانها و عندها كنت بحبهم متمرده طول عمرها بس بحب تمردها و قوتها بحبها يا مها

مها….بأبتسامه و انا كمان بحبها اوي ليله طيبه اوي و جميله و بتحبك من قلبها بس افرحلها و اوعي الاحساس ده يسيطر عليك انت بس اول ما تكلمك و تسمع صوتها فرحان هتفرح لفرحتها

وليد…..اكيد والله بس تتصل

مها….هتتصل مستعجل ليه سيبها تعيشلها يومين ما احنا عملنا زيها لما اتجوزنا

وليد….يومين وانا لسه هستني يومين و الله اروح انا اجيب عشري من رقبته

ضحكت مها و هو بصلها وضحك

وليد…. والله بحبه بس برضوا مش طايقه

مها…..لا ادعيلهم ربنا يسعدهم و يفرحهم و يبعد عنهم اي حاجه وحشه

وليد…..يارب اللهم امين

………………..

نادين كانت قاعده زهقانه نعيمه مكتئبه و اللي جاي عليها بالنوم قامت نادين دخلت اوضه ليله بهدوء وراحت قعدت علي سريرها كانت حاسه ان البيت من غيرها دمه تقيل و ملهوش روح حتي الاوضه اللي كانت بتنام مع ليله فيها و في حضنها مفيهاش روح رغم ان يعتبر حاجتها كلها فيها مسكت الموبايل و اتصلت علي عسال.