لقاء كارثي
((لقاء كارثي))
لقاء كارثي
أميره أسامه
صاحبة البطل الواحد
~° البارت الثالث°~
……..
عسال…..ابتسم طيب انا شايف أن قبل الاكل في حاجه اهم لازم نعملها
ليله….ايه هي ؟
عسال….يعني أننا نتعرف علي بعض مش معقول نقضيها ده و دي و استاذ و انسه ولا ايه
ايمان……اه احنا متعرفناش صحيح
رشيد….يبقي انتوا الاول اتفضلوا
ليله….بصت لعشري و رفعت حاجبها وابتسمت لا متجيش انتوا ضيوفنا
عشري…..بأبتسامة غيظ معلش هما مش بيقولوا ladies first
عسال….بضحك اه هنقضيها كده بقي انتوا صفيتوا قلوبكم خلاص
عشري…..والله يا ابني انا ما كلمتها هي اللي مستقصداني
ليله….انا محصلش
عسال….طب خلاص امسحيها فيا يلا عرفينا انتي علي نفسك في الاول
ليله….انا ليله
عسال….ليله اسمك ليله و لا الدلع
ليله…..لا اسمي ليله بس صحابي بيقولولي لولي
عشري….نفخ دخان سيجارته و ابتسم !
ليله….ايه مش عاجبك؟
عشري…..لا حول ولا قوة الا بالله انا اتكلمت
فضل….اسمك حلو علي فكره
ليله….ميرسي
عسال….طيب و الاستاذه
سلمي…..انا اسمي سلمي
عسال….و حضرتك
ايه….انا ايه وده ميلو
عسال…..بابتسامه أهلاً استاذ ميلو هناعب مع بعض كتير طيب و الاستاذه
نعيمه….انا نوني
عسال…..نوني اكيد ده دلع صح
ابتسموا صحابها و كتموا ضحكتهم
فضل…..نوني ايه هو في حد بيتسمي نوني
نعيمه……اه مالوا نوني
فضل….بضحك حلو يا ستي مالك زعلتي كده ليه بس مفيش حد اسموا نوني و بعدين صحابك ضحكوا واضح أنك مش بتحبي اسمك
نعيمه…..لا إله الا الله يا سيدي اعتبرني اسمي نوني مالك ومال أسمي بس
فضل…..بضحك طب انا كبرت في دماغي بقي وعايز اعرف أسمك قولي انتي يا ليله
ليله….بضحك لو قولت هتعلق وانا مش مستغنيه عن عمري
عشري…..ما انتي طلعتي بتخافي اهو
ليله….انت بتستفزني عشان اقول اسمها صح طب مش قايله هي عندكم اهي عايزه تقول تقول هي حره وانت أهدأ علي نفسك شويه ماشي
عشري…..بضحك حاضر ههدأ
فضل…..ها مش هتقولي
رشيد….يا ابني انت رخم ليه هي مش عايزه تقول سيبها براحتها
فضل…..الله احنا مش بنتعرف و بعدين واضح أن في مشكله في الاسم و عايز اقولها يعني أن الاسامي كلها حلوه عادي
ايمان….بابتسامه وهي بتبص لنعيمه انا هقولك اصل هي مش بتحب اسمها خالص عشان كده مش بتحب تقوله فهمت
فضل…..بضحك طب علي فكره انا رخم و بجد بقي عندي فضول اعرف أسمك
نعيمه….بضحك طب ليه الرخامه عليا ما تشوف غيري يا عم
فضل…..ماهما قالوا اسمهم ودلعهم و بعدين يا ستي عادي هقولك نوني ها اسمك ايه بقي
نعيمه…..امممم طب بص هقول بس وربنا اللي فيكم هيتريق لا هيخرج بره في الجو ده
سلامه….بضحك انا رأيي متقوليش عشان بعد الجمله دي انا اول واحد هضحك حتي لو الاسم طلع حلو
حسان…..يا جدع متبقاش رخم انت كمان
يا ستي انا اوعدك محدش هيضحك و اللي هيضحك انا هخرجه معاكي بره
نعيمه….ماشي اااا اسمي ننـ. اااا
فضل….هااا ايه
نعيمه….نعيمه اسمي نعيمه
سلامه…..بضحك طب والله حلو
رشيد…..انا لو منك أخرجه بره في المائه
نعيمه…..بأبتسامه المشكله أنه بيقول حلو وبيضحك
سلامه….انا بضحك عشان قولتي اللي هيضحك هخرجخ بره بس والله حلو عادي يعني ماله نعيمه
نعيمه….انا مش بحبه
فضل…..كل المناهده دي عشان نعيمه انا قولت اسمك فتكات ولا ام الهنا
نعيمه…..حرام عليك انا طليقه نعيمه عشان اطيق فتكات وام الهنا
رشيد….علي فكره اسمك حلو و مش مجامله والله العظيم
نعيمه….يا راجل عيب دي مجامله واضحه صرف
رشيد….والله أبداً اسمك حلو
فضل…..علي فكره بجد بعيداً عن الهزار والضحك انتي أولاً زي القمر ودي مش مجامله ولا معاكسه بس دي حقيقه ثانياً انتي لازم تحبي اسمك زي ما بتحبي شكلك و نفسك اقبلي شخصيتك واسمك و عيشتك زي ما هي و اوعي ترفضي اسمك اللي ربنا اختارك بيه و حبيه علي قد ما تقدري لأن طول ما انتي مش بتحبيه اللي قدامك لو مش بيحبك هيضايقك بيه و الاهم ان اسمك حلو و مميز في اسامي كتير قديمه بس حلوه و انتي اسمك معناه حلو انا صحيح مش شاطر اوي في معاني الاسماء بس بيتهيألي اسمك بيعبر عن نفسه.
نعيمه….بابتسامه يعني بجد حلو
فضل….والله حلو اوي
حسان…..بمناسبة معاني الاسماء اسمك مذكور في القرآن هو صحيح مش مذكور ذكر صحيح بس يعني معناه ليه علاقه بالنعم ربنا في كتابه العزيز قال إن الأبرار لفي نعيم ..
بيتهيألي مفيش احلي من كده وصف حبي اسمك عشان هو بجد يتحب
نعيمه….تعرف أن اول مره اسمع معني اسمي بالشكل ده بجد شكراً شكلي هبدأ احبه
عسال….طيب انا عندي فضول تاني خالص انتي اسمك اكيد علي اسم حد من أهلك صح
نعيمه….ايوه صح اسم جدتي نامت ببايا و سماني علي اسمها
فضل…..والله حلو و مع ذلك يا ستي هقولك يا نوني
ابتسمت نعيمه بسعاده و لاول مره تحس ان اسمها مش مسببلها عقده.
عسال….طيب نرجع تاني كده معانا ليله و سلمي وايه و الاستاذه بيتهيألي كلنا اتعرفنا بس مفيش مانع نتعرف تاني
نادين….بأبتسامه نادين
عسال…..بنظره جميله طب والله
نادين….بضحكه حلوه يعني صحابي بيقولولي نودي
عسال…..اتشرفنا يا نودي
نادين…..اااا ميرسي
عسال….اااا طيب و أخيراً نتعرف بقي علي الاستاذه
ايمان….ما قولنا من غير استاذه
عسال….ده مؤقتاً لحد ما نعرف الاسم بس
ايمان….ماشي يا سيدي انا ايمان و الكل بيناديني ايمي تقدر تقول ايمان أو ايمي اللي يريحك
رشيد….بأبتسامه و استفهام طيب معلش انا بقي عندي سؤال فضولي شويه
ايمان…..اتفضل
رشيد…..هو ايمان ده اسمك الحقيقي
ايمان….اه والله الدلع ايمي عادي يعني اكيد اسمي
رشيد…..لا أصل يعني شاور علي السلسله الاسم اللي مكتوب علي السلسله مختلف
ايمان…..بابتسامه مسكت بايدها السلسله اه تقصد ماريز لا ده اسم امي
عشري……ماريز !!
رشيد….اسمها ماريز ؟
ايمان….بابتسامه اه والله اسمها ماريز
رشيد….مصدقك بس يعني مستغرب الاسم
ايمان….ليه اول مره تسمعه؟
رشيد…..بإحراج اااا لا مش اول مره بس يعني اللي اعرفه ان اسم ماريز يعني
ايمان….بضحكه هاديه ايوه صح انا امي مسيحيه
سلامه…..يعني انتي مسيحيه ؟
ايمان…..بأبتسامه جميله انا اسمي ايمان محمد احمد محمود بابا مسلم و امي مسيحيه
سلامه….بابتسامه بجد دي قصة حب
ايمان…..وقصة حب قويه جداً كمان
رشيد…..بابتسامه انا اسف والله لو ضايقتك بس الاسم لفت انتباهي مش اكتر
ايمان….لا خالص بالعكس مضايقتش و هضايق ليه أصلاً انا ديماً لما بتعرف علي اي حد بتسأل نفس السؤال بسبب السلسله
عشري…..ربنا يخليهالك و يخلي والدك
ايمان….اللهم امين طب ايه مش هنتعرف عليكم بقي
بصوا لبعض الشباب وضحكوا
رشيد….ما بلاش
ايمان….ليه كارهين اسمكم انتوا كمان
عسال…..لا مش حابين نلغبطكم بس
ايمان….لا عادي قول
عسال….انا محمد
ايمان…..علي اسم ابويا يعني عاشت الاسامي يا استاذ محمد طيب و انت
رشيد…..بابتسامه محمد
ايمان…..اااه بردوا طيب و انت
حسان….بضحك محمد وعشان اختصر عليكي تلفي علينا احنا السته معاكي سته محمد و ربنا يستر من محمد
ايمان….بضحك بتخرج طبعاً
حسان….لا والله
ليله…..كلكم محمد فعلاً
عشري….ايه في اعتراض
ليله….بضحك يا سيدي هو سؤالي اللي وقف في زورك ما هو مش معقول كلكم محمد
عشري….وليه مش معقول والله كلنا محمد
نعيمه….وعملتوها ازاي دي
فضل…..لا دي بتاعت ربنا بقي
نعيمه….اقصد اتجمعتوا ازاي مع بعض يعني ليه مدخلش في شلتكم احمد محمود عباس حتي
فضل….بضحك والله صدفه احنا صحاب من سنين أصلاً
نادين…..ده بجد فعلاً
عسال…..بنظره جميله نوريكي البطايق لو مش مصدقه
نادين…..بنظره احراج ابتسمت وارتبطت اااا لا مش كده بس يعني صدفه غريبه
ليله…..ايوه بس انا عشان انادي علي واحد فيكم هتبقي لغبطه يعني لو قولت محمد انتوا السته هتبصوا هنحلها ازاي دي
سلامه…..شوفي يا ستي حلها مفيش اسهل منه أصلاً مفيش ولا واحد فينا بيتنادي بأسمه بننادي بعض باسم ابونا أو جدنا أو لقب العيله يعني عندك انا مثلاً بتنادي بأسم ابويا سلامه
فضل….و انا بتنادي بأسم جدي فضل
حسان….وانا بتنادي بأسم ابويا حسان
ايمان….و الاسم جه صدفه ولا علي اسم الشيخ محمد حسان
حسان….و الله ما اعرف بس ممكن
رشيد….وانا بيقولولي رشيد علي اسم جدي هو أصلاً كان من رشيد
ايمان….حلو و انت يا استاذ محمد مؤقتاً
عسال…..انا بينادوني بأسم عيلتي عسال و ده جد جد جدي كان بيتاجر في العسل و عنده مناحل كتير بيطلع منها العسال فا الاسم في العيله يعني
ايمان…..حلو يعني لو لينا عمر و خرجنا من هنا هتعزمني علي عسل طبيعي
عسال….بابتسامه والله عيني بس للاسف مبقاش حد مكمل في المهنه دي
ايمان….خساره دي جميله بجد
عسال…..اشتغلت فيها فتره كده يعني فضول و حبيتها اوي و كان عندي منحل صغير كده بس بعد كده سيبتها
ايمان….المهم انك بتفهم فيها
عسال….طبعاً اكيد و بالمناسبه اوقات كتير بيقولولي ميدو بردوا
ايمان…..ماشي يا ميدو
بص عسال نظره سريعه علي نادي و هو مبتسم وبسرعه نادين بعدت عينها عنه.
نعيمه….طيب والاستاذ
عشري…..انا عشري
ليله….بهمس بعتني بكام يا عشري
عشري….بضحك هز راسه ده ابويا هااا يعني بلاش
ليله….بضحك الله وانا قولت حاجه
ايمان….يعني كده عشري و عسال و رشيد و حسان و انت قولتلي ايه معلش
فضل….انا فضل و الاستاذ سلامه
سلمي….يعني انتوا محدش فيكم بيتنادي بمحمد خالص
حسان….لا كل واحد بلقب يعني عشان منزاولش بعض
عشري….طيب بقول ايه احنا قعدتنا شكلها مطوله خلينا ناكل و بعدين نرغي و نتعرف براحتنا
ليله…..في حد طلع طفس غيرك يا ايه
عشري…..اللهم طولك يا روح احنا طفسين يا ستي يضايقك في حاجه
ايه…..حرام عليكي هموت من الجوع
ليله….ماشي يا ستي قومي يلا كلي و انت يا استاذ عشري متنساش تفضي الشنط
عشري…..بابتسامه بس كده عيني
في الوقت ده رجع الرعد تاني بصوت قوي جداً الكل اتخض و البنات اتنفضوا من مكانهم و نادين صرخت وقامت وقفت بعيد
عشري….بااس باس متخافوش ده رعد
ليله….رعد ايه لا ده صوت جامد
عشري….رعد والله
رشيد…..راح عند الشباك رعد يا جماعه متقلقوش
عسال….بص علي نادين بقولك ايه ما تيجي معايا نحضر مع بعض الفطار
نادين…..ايه اااا انا
عسال….تعالي يلا سيبك من الصوت خالص و تعالي يلا
بصتلوا نادين وبصت علي الشباك و هي مرعوبه
عسال…..يلا اسمعي الكلام تعالي
راحت معاه وهي مش موزونه و مرعوبه و بتتلفت في كل مكان.
قربت ايمان جنب رشيد و بصت علي بره
ايمان…..رجعت تمطر تاني
رشيد……ربنا يستر متقلقيش هتعدي
ايمان….الصوت مرعب انا في العموم بحب الشتاء والأجواء دي بس بجد المرادي الجو يخوف
رشيد…..هو الجو مش مظبوط في حاجه غريبه خصوصا احنا لسه مدخلناش علي الشتاء
ايمان….هو بجد ممكن المايه تدخل علي الڤيلا هنا
رشيد…..مش عارف بس ان شاء الله لا يعني شويه كده لو السيول دي وقفت تاني عايز اخرج انا وحد من الشباب نشوف الصرف
ايمان….صرف ايه اللي هيسحب المايه دي كلها دي البلد غرقانه
رشيد….ايوه غرقانه بس علي الاقل تسحب شويه من المايه دي و بعدين هي غرقانه فوق لازم الصرف يتفتح عشان المايه تنزل
ايمان…..لا بلاش والنبي احسن يكون في كهرباء أو حاجه
رشيد….لا متقلقيش ما عشري خرج و راح لحد العربيات
ايمان….ربنا يستر
الكل بتاع ايه مكانش مبطل هوهوه
ايه….بخوف بس بقي يا ميلو اسكت شويه
سلامه….ايه مالوا زعلان ليه
ايه….مش زعلان بس خايف
سلامه….تعالي تعالي هنا قولتلي بقي اسمك ايه
ايه….اسمه ميلو
سلامه…..ميلو انت ولد طب ايه يا عم في راجل يخاف انشف كده
ايه…..صوت الرعد مرعب هو أصلاً مش مبطل هوهوه من واحنا في الطريق انا قولتلها أنه حاسس بحاجه بس مصدقونيش و بعدها بشويه شوفنا طيور كتير جداً بشكل مرعب بتطير في السماء بسرعه و بعدها بدأ الجو يبقي مرعب كده
سلامه….عشان الكلاب أو الحيوانات بشكل عام بتحس
ايه…..ايوه انا عارفه خصوصاً الكلاب لما تفضل تهوهو كده كتير تعرف أن في مشكله
سلامه….بتحبي انتي الحيوانات مش كده
ايه….اه جداً انا اصلا من حبي في الحيوانات عندي مكان للحيوانات
سلامه…بجد طب حلو بتبيعي يعني
ايه…..لا دهpet grooming يعني مكان لتنظيف الحيوانات اي حد عنده كلب قطه بيجبوا بنحميه و ننظفه و نقص شعره و ظوافره و في كمان صبغه لشعره
سلامه….بضحك كمان صبغه
ايه….طبعاً و كمان في جزء صغير كده استضافه يعني لو حد مسافر في اي مكان كام يوم بيجيبه و بيفصل عندي براعيه لحد ما صاحبه يجي ياخده
سلامه….والله براڤو حلو اوي طلعتي شاطره كمان مش بس بتحبيهم
ايه…..انا عشان بحبهم بقيت شاطره في شغلي
سلامه….طيب عندك كلاب تاني غير استاذ ميلو
ايه…..صراحه لا هو بس لكن بفكر يعني اجيبلوا عروسه
سلامه….يا بختك يا عم ميلو كمان هتتجوز
……………..
حسان….بجد اوعي تكرهي اسمك لانه حلو اوي
نعيمه….خلاص والله حبيته شويه
سلمي…..علي فكره نوني بجد اول مره احس انها مقابله النقاش في موضوع اسمها
حسان….للدرجادي
سلمي….اه اوي بجد
فضل…..امال بتتعاملي ازاي مع اسمك في اي مصلحه حكوميه
نعيمه….بضحك ده بيبقي يوم اسود لو روحت بنك ولا روحت اجدد بطاقه أو اي حاجه ليها علاقه بالورق و ينادوا علي اسمي
فضل….بضحك البسي نضاره وقولي لهم مش انا
نعيمه….بأبتسامه عرفت ازاي والله بلبس النضاره بس كله كوم بقي وايام المدرسه كان كوم تاني انا كنت ديماً بتعملي استدعاء ولي أمر عشان بضرب صحابي كانوا بيضايقوني و يفضلوا يقولوا اسمي
فضل….ما انا قولتلك طول ما اللي قدامك عارف انك بتكرهي حاجه هيضايقك بيها بس لو انتي حبيتيها وقولتيها عادي مش هتلفتي انتباه اي حد.
حسان….صح لازم تتعاملي في اي موقف فيه تنمر مش بس علي اسمك علي اي حاجه مضيقاكي بانك تتجاهلي و متبقيش شخصيه سريعة الاستفزاز لأن في ناس بتتعمد استفزاز الشخص السريع الغضب
نعيمه….انا مش سريعه الغضب والله في اي حاجه غير اسمي
حسان…..ما عشان انتي اللي اديتي الفرصه للشخص اللي قدامك يستفزك لكن لو اتعاملتي عادي خلاص هيبطلوا
نعيمه…..خلاص والله شكلي هحبه
فضل…..علي فكره مش شرط تحبيه اوي يكفي أن قدام اي حد بيضايقك أو بيتعمد ده انك تحسسين أنه ولا فارق معاكي صدقيني هتفرق معاكي كتير
نعيمه…..خلاص هجرب والله و انش اء الله تظبط بقي
………….
ليله…..علي فكره انا تقريباً فضيت الشنط كلها مع أن المفروض انت اللي تفضيها
عشري….بنظره ابتسامه جذابه انا لما بكون جعان مش بعرف اعمل حاجه قولتلك لما اكل انتي مستعجله بقي براحتك
ليله……ماهو عشان تاكل لازم تخرج الاكل
عشري…..والله دي حاجتكم احنا حاجتنا في الثلاجه ومش في شنط
ليله…..والله طيب كويس لما تخلص حاجتكم بقي شوف مين هيبقي يأكلك
عشري…..و لا يفرق معايا عادي
ليله….ايه هتعيش من غير اكل ؟
عشري…..مفيش حد يعرف يعيش من غير اكل
ليله….طيب يعني لو مكلتش هتموت اهو
عشري…..بصلها بنظره ثابته في عينها وابتسم بكل شموخ و في لحظه ظهر العرق البدوي لا تهابين هاذي شُغلتييِه انا بدوي و بعرف اكل
ليله….بنظره جذابه رفعت حاجبها ايه ده ايه ده انت قولت ايه
ضحك عشري و هز راسه و سكت
ليله……هو انت منين ؟
عشري…..من اي مكان تحبيه
ليله….بابتسامه بجد مش بهزر لهجتك اتغيرت فجأه هو انت مش من القاهره؟
عشري…..عايش في القاهره بس اصلي من بدو سيناء
ليله…..بإعجاب عرباوي يعني
عشري…..يعنيييي و وجت اللزوم بنجلب صعيدي
ليله….بصدمه و ابتسامه لا انت كده بتهرج
عشري….بابتسامه جميله خالص والله ابويا سيناوي و امي صعيديه و ده ميكس غريب و مش ديماً بيحصل
ليله….هو غريب فعلاً اللي اعرفه ان يعني البدو والعرب مش بيتجوزوا غير من بعض فا غريب شويه أنه يتجوز صعيديه
عشري….الحب بيعمل المستحيل زي ما بيقولوا بس بعيداً عن الحب كمان ابويا وأمي كان ليهم قصه مختلفه يمكن بسببها اتولد الحب ده
ليله….وايه هي بقي قصتهم
عشري…..جدي ابو ابويا و جدي ابو امي كانوا صحاب اوي اتعرفوا علي بعض في حرب علي ما افتكر نكسة 67 و الاتنين كان بينهم قصص و احداث طويله و متتنسيش يعني ازاي اتعرفوا علي بعض وازاي كانوا بيحموا بعض الأوقات الصعبه اللي عاشوا فيها و خوفهم علي بعض من الاخر اتولدت بينهم صداقه قويه جداً و لما خلصت الحرب فضلوا صحاب اوي و وقتها اصلا كانوا متجوزين و مخلفين ابويا و امي و طبعاً سنين عدت وهما مع بعض و ابويا و امي كبروا و هما يعرفوا بعض و اتولد بينهم حب كبير و بس اتجوزوا
ليله….بابتسامه هاديه طيب و انت عايش فين بقي و سط الميكس الحلو ده
عشري…..كلنا عايشين في القاهره و من زمان يعني تقدري تقولي شغلنا كله هناك و دراستنا كلها بس كمان لينا بيت كبير في سيناء و لينا بيت في الصعيد
و ديماً بنسافر الصعيد و بنسافر سيناء يعني حتي احنا منسيناش اصولنا بالعكس اغلب اهلي و صحابي في سيناء و ليا صحاب و معارف وأهل كتير في الصعيد
ليله…..بإعجاب حلو
عشري…..طيب وانتي بقي من القاهره
ليله….اه
عشري…..من فين و ايه حكايتك
ليله….مليش حكايه عادي يعني بقولك ايه انا هروح اساعد نادين
عشري….بضحك اااه بتهربي طب علي فكره كده مش حلو
ليله….بضحك مش بهرب والله بس يعني
عشري….لا لا خلاص الله يسهلك
ضحكت ليله و راحت بسرعه لنادين وعسال
ليله…..ايه تساعدكم
عسال….لا خالص كله تمام
ليله…طب قولولي اعمل اي حاجه
عسال….شوفي فين بس العيش و احنا تمام هنا
ليله…اوك
مشيت ليله من جنبهم شويه و قعدت علي ركبها في الأرض تدور علي العيش في الشنط قرب عسال من نادين
عسال…..انتي بتعملي ايه؟
نادين….انت قولتلي اعملي البيض
عسال……بابتسامه جميله بتكسريه بالمعلقه ؟
نادين…..بتوتر من نظرته ابتسمت ولعبت في شعرها امال اعمل ايه
عسال….اكسريهم في بعض
نادين…..لا مش بعرف بيقعوا مني و بيبهدلوا الدنيا
عسال….لا متخافيش امسكيهم كده
نادين….بلاش بكسرهم جامد والله
عسال….امسكيهم بس
مسكت نادين البيض قرب عسال أيده و حط أيده علي كفيها
نادين….لا بلاش هيبهدلوا الدنيا والله
عسال…..يلا قربي متخافيش
قربت نادين من البوتجاز و مسك عسال كل كف بعدهم و خبطهم براحه في بعض
نادين…ااااه لا ايه ابتسمت بسرعه اتكسرت واحده
عسال….بأبتسامه يلا سيبي دي بقي و اقسمي اللي اتكسرت دي في الطاسه
نادين…..بابتسامه لا مش للدرجادي يعني انا مش عبيطه انا بس مش بعرف اكسرها
عسال….مين قال انك عبيطه يلا اكسري التانيه
نادين….طب دي هكسرها في ايه
عسال….خدي واحده تانيه بس بسرعه عشان اللي اتحطت متستويش قبلهم
نادين….ماشي فهمت اكسر كل دول
عسال….اه يلا
نادين….بس ده كتير
عسال….لا مش كتير احنا كتير اصلا يلا بسرعه
فضلت نادين تكسر واحده في التانيه لغايه آخر واحده بصتلوا وهي رفعاهم قدامه و ضحكت
نادين…..اكسرها بالمعلقه دي بقي
عسال…..لا علي حرف الرخامه أو حرف الطاسه
نادين……هتقع
عسال….مش هتقع والله خبطه خفيفه تتكسر بس
نادين قربت من الرخامه و خبطتها براحه
عسال….اجمد شويه
نادين…..حاضر
كسرتها و برقت
عسال….بضحك يلا متخافيش اتكسرت حطيها بقي
قربت نادين من الطاسه كسرتها نصين و جزء بسيط من القشر وقع في الطاسه
نادين…..دي وقعت
قربت أيدها بسرعه تشيل القشره لقت عسال مسك أيدها بسرعه بصتلوا بتوتر و ارتباك
عسال…..ايدك هتتلسع انا هشيلها بالمعلقه
نادين….اااا طيب اوك
بعدت عينها بسرعه من عينه و كان باين عليها التوتر
نادين….ااا انا هطلع بس فوق لحظه ووو اااا هاجي تاني
عسال…..بأبتسامه جميله وهو باصص لعينها تمام روحي
خرجت نادين بسرعه من المطبخ و هي بتحاول متظهرش التوتر اللي جواها و بمجرد ما خرجت ابتسم عسال بهدوء و كمل اللي بيعملوا .
طلعت نادين علي فوق و قفلت الباب وراها و وقفت سندت ضهرها للباب و فضلت باصه قدامها و هي مصدومه علي وشها ابتسامه بسيطه و بصوت مسموع كلمت نفسها
نادين….انا ايه اللي جرالي ازاي أصلاً ارتبك بالشكل ده قدامه وليه أصلاً و ليه نظراته عملت فيا كده خدت نفس طويل و خرجته براحه اهدي يا نادين اهدي و اوعي تعملي كده انتي عمرك ما كنتي كده أصلاً عمرك ما ارتبكتي من نظره و بعدين انا معرفهوش أصلاً و كمان اللي بيحصل ده عبط العقلي يا نادين و ارجعي لعقلك واضح اوي أنه أصغر منك و انتي اكيد اعقل من كده اهدي اهدي و اتحكمي في اعصابك و مشاعرك انتي مش محتاجه تعملي كده أصلاً مش هو ده اللي بتدوري عليه ايه هتمشي تدوري علي الحب في عيون اي حد حتي لو كان اصغر منك بطلي هبل و فوقي متبقيش خايبه اللي بيحصل ده مش صح.
فضلت نادين قاعده تأنب في نفسها و تحاول تفوق نفسها و استنت شويه فوق لحد ما تقدر ترجع تاني و تهدأ
و أثناء ما هي بتحاول تفوق نفسها و تكدب احساسها كانوا خلصوا تحت الفطار و حطوا بره علي ترابيزه سفره صغيره
بص عسال بهدوء علي السلم منزلتش و فجأه صوت الرعد رجع مره تانيه بقوه و الثلج رجع نزل تاني يخبط في كل حاجه و يعمل صوت و من غير اي تردد سحب نفسه بسرعه علي فوق و طلعلها في نفس الوقت اللي طلع فيه هي خرجت بسرعه من الأوضاع و هي مرعوبه لاقيته في وشها.
نادين….اتصدمت لكن حست بالامان لما لاقيته اااا الصوت رجع تاني
عسال….شششش اهدي متخافيش اول ما سمعته طلعتلك تعالي يلا متخافيش يلا انا معاكي
بصتلوا نادين و فضلت واقفه في مكانها و لتاني مره يرجع صوت الرعد مسكت بسرعه في دراعه مسكها عسال من كفها
عسال…..متخافيش تعالي ننزل تحت
هزت نادين راسها ونزل معاه و لما قربوا تحت ساب أيدها
كلهم كانوا واقفين عند الشبابيك.
سلمي…..انا خايفه اوي بجد الجو مش بيهدأ لحظه
ايه…..السيول كتير اوي حاسه انها شويه و هتدخل علينا
رشيد….انا عايز اعرف بس الصرف شغال بره و لا لأ
عشري…..الصرف حوالين البسين كمان المفروض اه شغال
رشيد….ميتهيأليش المايه بتزيد مش بتقل
لازم نشوفه علي الاقل نضمن أن المايه متدخلش علينا
عسال…..طيب يلا تعالوا بقي وخلونا نفطر الساعه داخله علي أربعه العصر و مكلناش حاجه.
حسان….ايوه يلا خلونا نفطر و ابعدوا بقي عن الشبابيك كفايه توتر
نعيمه…..احنا هنقعد ازاي التربيه صغيره اربع كراسي
فضل…..تعالوا انتوا اقعدوا احنا هنقف عادي
نعيمه….لا تقفوا ايه مينفعش
فضل….اقعدي انتي بس كده احنا متعودين عايزين بس كرسيين كمان
عشري….اقعدوا اقعدوا احنا هنتصرف متقلقوش
قعدوا البنات كلهم معادا سلمي و ايمان
عسال….راح قرب كرسيين من بتوع القاعده اللي موجوده اتفضلي
سلمي…..شكراً
عسال….ايمي اتفضلي
ايمي…..تسلم يا ميدو بس هتاكلوا ازاي و انتوا واقفين كده
رشيد…..انا كده زي الفل اهو و هاكل
قرب رشيد جنبهم خد عيش و وقف ياكل
عسال…..كلي متشغليش بالك احنا بنتعامل انا عن نفسي لاقيت مكاني قعدت علي ايد الكرسي بتاع نادين
بصتلوا نادين بارتباك و ابتسامه بسيطه
عسال…..مضايقك كده ؟
نادين …اااا لا خالص
ليله….مسكت العيش و قربته من عشري اتفضل
عشري…..ايه رضيتي عني و وافقتي تأكليني
ضحكوا كلهم علي عشري
ليله…..بابتسامه مش اوي يعني بس العيش بعيد عنك خايفه تحيبه تقع عليا
عشري…..مصلحه يعني ماشي يا ستي مقبوله منك
حسان…..رشيد قرب الجبنه دي لحظه
سلمي…انت كده مش هتعرف تاكل
حسان…..باكل و كله تمام
فضل….علي فكره حسان من قبل ما تيجو و هو بياكل ديماً علي الواقف كده هو وسلامه
سلمي….بابتسامه اه يعني انتوا الاربعه كنتوا مسيطرين علي الكراسي و سايبنهم واقفين
فضل…..لا والله ده طبعهم بياكلوا بسرعه و هما واقفين عشري بيشبهم بالزرافه
سلمي….بضحك زرافه
ليله…..طبعاً ومين غيره يتنمر عليهم
عشري….اللهم طولك يا روح
سلامه….لا أصل انتي مش فاهمه فضل وعشرين بالذات صعب ياكلوا وهما واقفين متعودين أصلاً يقعدوا علي الارض كمان دي عادتهم كل العرب كده
ايمان….ايه ده انتوا من فين
فضل…..من بدو سيناء
ايمان….بتتكلم جد ؟
فضل….اه والله
نعيمه…..بس بتتكلموا عادي اللي اعرفوا أن ليكم لهجتكم ولا انتوا مش عايشين هناك
فضل….احنا عايشين في القاهره بس كمان ديماً بنروح سيناء ولينا بيت هناك كمان
نعيمه…..ليكم بيت هناك هو انتوا اخوات؟
ليله….لا يا غبيه قالك اسم بباه فضل و هو اسم بباه عشري
فضل….هاد ابن عمتي بس كيف اخوي
ايمان….ايه ده الله انتوا قرايب يعني
فضل….ايوه قرايب
سلامه…..عيزاهم بقي يتكلموا بلهجتهم شوفيهم و هما بيتخانقوا و بيتناقشوا بعصبيه بسيطه مع بعض كمل بضحك شوفتي خناقة الديوك
ايمان….بضحك بتهزر
سلامه….لا والله و كمان وهما بيتكلموا اهلهم في الموبايل بحس اني غبي اوي
ايه….انتوا مش بتفهموهم ؟
سلامه…..في كلام كتير بقينا نفهمه و في كلام لا يعني علي حسب الحوار
ايه….ايه ده الله بجد انا بحب طريقتكم اوي
نعيمه…..طب ايه نعصبكم يعني عشان تتكلموا
فضل…..بضحك بلاش عصبيتنا وحشه خلينا كده احسن
ليله….طيب هما بس اللي قرايب و كلكم صحاب
رشيد….لا عسال و سلامه كمان ولاد خاله
ليله….ايه ده زي ايه وسلمي
حسان…..بجد انا فكرتكم اخوات عشان كنتوا يتكلموا والدكم في الموبايل تقريباً
ايه…..لا احنا ولاد خاله بس انا بقول لبابا سلمي بابا عادي هو اللي مربيني
سلامه…..يعني بباها متجوز مامتك يعني
ايه….بابتسامه لا لا بابا و ماما ماتوا من زمان و انا عشت مع خالتوا و بابا احمد طول عمري يعني فا هما بالنسبه ليا ابويا و امي
سلامه….انا اسف والله مكنتش اعرف
ايه….لا عادي والله
ليله….بابتسامه واضح أن لينا قصص تشبه بعض
ايمان…..اه والله يا ليله انا لاحظت ده
فضل…..بيتهيألي قعدتنا هتطول و عشان منزهقش نتعرف علي بعض احسن
ايمان…..من ناحية الزهق فا شكلوا كده بدأ لنا مش متعوده افضل في مكان مقفول عليا كده كتير
رشيد…..خلاص يبقي نتعرف بقي عشان منزهقش
فضل…..بعد الفطار اعمالكم الشاي و نقعد مع بعض
ايمان….اتفقنا
عشري…..الحمد لله
ثواني و الكل خلص اكل و قاموا وراء بعض
يا دوب شالوا الاكل و رجعوا كل حاجه مكانها و الجو بره اتحول لكارثه حقيقيه و اللي حصل خلال الكام ساعه اللي فاتت كان مجرد بدايه بتوقيت الساعه اربعه مساءاً سمعوا صوت صريخ قوي محدش فيهم عرف هو جاي منين بمجرد ما سمعوا جريوا علي الشبابيك مكانش في اي حاجه ظاهره.
و ثواني بالظبط و رجع صوت الرعد بقوه كأن السماء فيها غضب رهيب البرق كان قوي جداً السماء بتنور و ترجع تضلم تاني
البحر مكانش في حالته الطبيعيه موج عالي و قوي السيول دمرت الدنيا صوت تكسير الزجاج كان عالي محدش عارف دي عربيات ولا شبابيك و لا التربيزات اللي بتبقي في كل ڤيلا بره.
كل حاجه حرفياً كانت بتطير من شدة الرياح حتي الرمل كان عامل إعصار مرعب لون الجو بقي اصفر و شويه شويه النهار بيختفي الجو كان برد لأن الثلج تقريباً كان مغطي المكان بره و حوالين الڤيلا كأنهم في بلد أوروبيه.
البنات صرخوا و رجعوا خطوه لوراء خافوا من الثلج اللي عمال يخبط علي كل الشبابيك.
وقفت نادين بعيد عنهم و اول ما صوت الرعد و لمحت من بعيد شكل الهواء اللي مطير كل حاجه جريت علي المطبخ بسرعه قعدت علي الارض وراء الرخاميه ضمت رجلها و حطت أيدها علي دونها و غمضت عينها.
رشيد….ابعدوا عن الشبابيك
سلمي فقدت أعصابها و بدأت تعيط هي و ايه ومسكوا في بعض
ليله….بخوف هو ايه اللي بيحصل ده
نعيمه…..احنا هنموت
حسان….ابعدوا من هنا
عشري…..سلاااااامه هات اي شنط بلاستيك عندك
عسال…..انت عايز تعمل ايه
عشري….لازم نسد الباب من تحت علي قد ما نقدر احتمال كبير المايه بره ترفع اكتر و تدخل علينا.
فضل……المكان ضيق هتدخلهم ازاي ؟
عشري….هاتوا سكينه أو اي حاجه بسرعه
ليله……المايه لو زادت هتدخل بردوا
عشري….لا مش هتدخل بس لازم شنط كتير
دخل جري سلامه علي المطبخ يجيب كل الشنط و دخل وراه عسال يجيب سكينه لمح نادين قاعده علي الارض و بتهز في نفسها بتوتر و رعب
عسال…..نادين نادين سلامه خد سكينه لعشري بسرعه
عسال……طيب طيب
عسال…..قعد علي ركبه قدامها نادين نادين انتي كويسه ومسك أيدها بعدهم عن ودنها
نادين هزت راسها بلأ
عسال….متخافيش كل حاجه هتبقي تمام حاولي تتنفسي بهدوء متوتريش نفسك لازم تتحكمي في نفسك اللي خارج منك انتي بخير متقلقيش كلنا بخير
نادين…..هنموت هنموت
عسال….لا لا لا كله هيبقي تمام اسمعيني يا نادين متفكريش في اي حاجه سلبيه ماشي انسي كل اللي بيحصل حوالينا ده فكري في حاجه حلوه حاجه نفسك تعمليها انا ترجعي فكري في مكان نفسك تروحي عليه أو مكان بقالك كتير مزورتيهوش فكري في اغنيه بتحبيها أو فيلم هااا نادين خليكي معايا بصيلي فتحي عينك
هزت نادين راسها بلأ
عسال…..فتحي عينك بقولك بصيلي متخافيش يلا افتحي
فتحت نادين عينها براحه و هي لسه بتهز في نفسها بتوتر
عسال…..بطلي هز اهدي سيبي جسمك شويه انا معاكي هاتي ايدك يلا هاتي ايدك
مسكت نادين أيده
عسال…..بصي عدي من واحد لعشره في سرك و بهدوء يلا اسمعي الكلام
غمضت نادين عينها
عسال….لا عدي وانتي مفتحه يلا براحه
عدت نادين بهدوء و بصتلوا
عسال….خلصتي
نادين….بخوف ايوه
عسال….عدي تاني يلا
ايمان….بصوت عالي زلزال تاني
نعيمه….بصريخ زلزاااال
فضل…..بااااس بلاش صريخ اهدوووا كله تمام هزه عاديه مفيش حاجه
نادين…..هنموت هنموت
عسال….نادين اهدي والله كله هيعدي قرب اكتر منها و مسك راسها ضمها لصدره
قبضت نادين علي كفه و غمضت عينها فضل عسال يمشي أيده التانيه علي شعرها لحد ما بطلت تهز في نفسها.
عشري…..ليله الفردي الشنط و لفيها زي المروحه مع سلامه بسرعه
بصت ليله من الجدار الزجاج اللي جنب الباب
ليله….بخوف المايه طلعت لحد الدرجه الثانيه يا عشري
عشري…..متبصيش ويلا تعالي متخافيش
يلا بسرررررعه
نزل حسان علي ركبه جنبهم و فضل يفرد في الشنط هو وسلامه و ليله و عشري يحطها تحت حرف الباب و يدخلها بالسكينه مسابش زاويه غير وملاها شنط بلاستيك الفراغ اللي تحت الباب كله اتملأ بالشنط ليله كل شويه تقوم تبص تشوف المايه وصلت فين و ترجع
عشري….يا ليييييله قولتلك متبصيش يلا بسرعه
ايمان……في شنط تاني اهي
عشري….هاتي هاتي كويس
ايه…..عشري في مايه بانقط من الشباك
عشري….لا سبيها عادي ده تنقيط بسيط يلا افردوا الشنط بسرعه
كملوا باقي الشنط اللي معاهم مبقاش في مكان بدخل فيه تاني لحد ما الباب كله اتسد من تحت بالشنط قامت ليله بسرعه وقفت تاني تشوف و قام عشري وقف وراها يبص و باقي الشباب بيبصوا من جنبهم
المايه كانت بتزيد قدامهم لحد ما طلعت علي اول درجه و بقت تمشي براحه ناحيه الباب
ليله…..المايه طلعت
عشري….مش هتدخل مستحيل تدخل
حطت ليله أيدها علي الزجاج كانت بتترعش جامد
عشري…..اهدي شويه ايدك بتترعش
ليله….المايه هتدخل علينا يا عشري لازم نكلم اي حد يجي يلحقنا
حط عشري أيده علي كفها المسنود علي الزجاج
عشري…..مش هتدخل مستحيل
سابها عشري و راح بسرعه فضل واقف جنب الباب يبص علي تحت يشوف المايه هتدخل ولا لأ
رن موبايل ايمان في الوقت ده جريت عليه تشوف مين
ايمان…..دي ماما مش هرد
رشيد….ردي عليها عشان متقلقش
ايمان….هتعرفني من صوتي مش هتصدق لو قولتلها احنا كويسين
رشيد….ولو مردتيش هتقلق اكتر احنا لحد الوقت كويسين ردي عليها و خليكي طبيعيه انتي والبنات بخير يعني مش لازم يبان عليكي التوتر يلا ردي
ايمان….اقولها ايه طيب
سلمي….بدموع مترديش يا ايمي
رشيد….لو مردتش هتقلق اكتر ردي اسمعي الكلام اطلعي فوق عشان متسمعش الصوت هنا و متكدبيش عليها في كل حاجه كده كده البلد كلها خربانه عشان تصدقك يلا اطلعي
ايمان….لا لا انا خايفه اطلع فوق هيحصل زلزال تاني
رشيد…..اطلعي هاجي معاكي يلا بسرعه.
عشري….بسعاده المايه مدخلتش مدخلتش
ليله…..قدام الباب بقي في مايه كتير
عشري….بس مدخلتش هنا الشنط سدت المكان
سلامه….عاش يا عشري الفكره نجحت
ليله….بسعاده المايه مدخلتش فعلاً
حسان….الحمد لله
عسال…..نادين نادين يلا متخافيش كله تمام الحمد لله
حست نادين أن هي نفسها الأرض تتشق و تبلعها حست انها هديت كتير بس لما التوتر راح مبقتش عارفه توريه عينها ازاي استخبت في حضنه بالشكل ده
عسال….نادين انتي نمتي ؟
رفعت نادين راسها بهدوء و هي عينها لتحت هزت راسها بلأ و فضلت ترجع شعرها وراء ودنها
عسال…..انتي كويسه
نادين…ااا ايوه انا كويسه
عسال….خلاص المايه مدخلتش و مفيش زلزال و شويه و الجو هيرجع يهدأ تاني متخافيش
نادين….اااا انا هقوم
عسال قام وقف و مسك كفها قومها سابته نادين و بسرعه خرجت علي بره وقفت علي جنب مع ايه و سلمي.
خرج عسال بهدوء و راح علي عشري و الشباب
عند ايمان.
ايمان…..طيب المهم انتوا بخير
ماريز…..احنا بخير بس كل حاجه هنا بايظه البلد متبهدله قولتلك يا ايمان متسافريش بليل مسمعتيش الكلام
ايمان….يعني يا ماما لو كنت سافرت بالنهار مكانش كل ده هيحصل
ماريز….لا كان هيحصل بس علي الاقل لو كان حصل وانتي هنا مكنتش سافرتوا خالص بس انتي و ليله دماغكم ناشفه مش بتسمعوا الكلام
ايمان….خلاص يا ماما بقي اللي حصل حصل المهم ان احنا بخير و الڤيلا هنا امان اينعم السيول مغرقه الدنيا بس مفيش اي قلق يعني متخافيش
محمد….هاتي التليفون اكلمها
ماريز….خدي ابوكي معاكي
ايمان….ايوه يا بابا
محمد…..ايمي انتوا بخير كلكم يا بنتي
ايمان….والله العظيم زي الفل و معانا املنا و شربنا و كل حاجه تمام و قاعدين جوه الڤيلا حتي الراجل اللي ليله حجزت معاه قالنا لو احتاجتوا اي حاجه كلموني يعني متخافش البلد هنا فيها ناس كتير يعني لو اي حاجه احتجناها هتلاقي مساعده بس احنا مبسوطين و كله تمام
محمد….طيب الحمد لله المهم تخلوا بالكم من نفسكم
ايمان….انتوا اللي خلو بالكم من نفسكم و اقفلوا عليكم و امنيه و محمود بلاش يخرجوا لاي سبب
محمد….يخرجوا فين يا بنتي البلد بايظه كارثه في كل حته و حرايق و اخر بهدله ربنا يستر و يعدي الايام دي علي خير المهم يا ايمي كل شويه طمنيني عليكي انتي و البنات يا حبيتي انا طول ما انتي بعيد مش متطمن
ايمي….والله ما تخاف احنا زي الفل متقلقش و اكيد هكلمك حاضر انت بس خلي ماما تهدأ شويه
محمد ….ماشي يا حبيبتي يلا روحي لصحابك و سلمي عليهم كلهم
ايمي….يوصل حاضر يلا سلام
قفلت ايمان و رفعت راسها لفوق و دموعها نزلت وهي بتخرج نفس طويل
رشيد….ايه لا لا ليه الدموع دي مش اتطمنتي عليهم
ايمان….اول مره يحصل حاجه زي دي في البلد و اكون مش معاهم ماما قلقانه اوي حتي بابا يعني بيحاول يطمني بس انا عرفته كويس حصلت قبل كده في مره وقت الثوره محمود اخويا الصغير خرج من البيت بدري و تليفونه اتقفل و كان وقتها في حظر مكانش حد فينا عارف يوصل ليه و لا حتي عارفين ننزل يومها بابا كان بيموت بجد هو و ماما كنت معاهم و قوتها و شوفت قد ايه كانوا مرعوبين لحد ما وصل خدوا نفسهم و انا عارفه أن المرادي هما اكتر كمان في قلقهم لأن الوضع مش حلو
رشيد….معلش كل حاجه هتعدي علي بكره او بعده بالكتير لما الجو يبدأ يهدأ و الدنيا تستقر هيرتاحوا انتي بس اهدي و خليكي معاهم كل شويه في الموبايل في النهايه دول ال و ام و مهما كبرنا بيفصلوا قلقانين حاولي تطمنيهم
ايمان….ربنا يستر
رشيد….يلا امسحي دموعك و تعالي ننزل سامعهم بيقولوا أن المايه مدخلتش الحمد لله
ايمان….طيب الحمد لله يلا خلينا ننزل
في الأسفل..
نعيمه….بطلي عياط بقي متخافيش مش اتطمنتي عليه
سلمي….بس هو لوحده و خايفه يتعب أو يحصل حاجه
ايه…..مش هيحصلوا اي حاجه أن شاء الله
ليله…..يا بنتي بطلي تقولي كده اتفائلي بالخير
عشري….سلمي متخافيش في النهايه هو في القاهره يعني لا قدر الله لاسوء الظروف هو مش لوحده يعني معاه جيران عكسنا احنا هنا
ايمان….ايه ده في ايه ؟
ليله….كانت بتكلم عمو احمد و خايفه عليه عشان لوحده
ايمان…..متخافيش هيبقي كويس والله و أن شاء الله في القاهره هيقدروا يسيطروا علي الوضع بسرعه
ليله….كلمتي زوزو
ايمان….اه بس هتموت من الرعب هي و بابا بتقولي الدنيا بايظه
نعيمه….ايوه ما الفيس اهو مقلوب في خساير كتير و في بيوت وقعت و في انفاق غرقت و في حرايق ربنا يستر
سلامه….علي فكره في بلاد كمان حصل فيها كده يعني مش مصر بس المشكله ان مفيش حد لاقي تفسير للي بيحصل ده ظاهره غريبه.
حسان….ربنا يستر و تعدي علي خير
ايمان….يارب طمنوني المايه مدخلتش صح
عشري….لا الحمد لله
حسان….فكرة عشري كانت كويسه حتي لو المايه بعد شويه اتسربت مش هتبقي كتير
ليله…..بقول ايه يعني انا عندي فكره كده لأسوء الظروف
فضل….فكرة ايه ؟
ليله….انا ملاحظه جنب المطبخ هنا في صرف و كمان جنب الحمام في صرف يعني بفكر حتي لو علي بكره نفتح الباب اينعم هتدخل المايه كتير بس نسحبها علي الصرف و اهو منها نقلل المايه شويه
فضل…..الصرف صغير مش كبير
عشري….واصلا مش هينفع وارد اصلا الصرف يتسد لأن الواضح أن الصرف بره مش شغال و الا مكانتش المايه دي كلها اتجمعت فا ممكن لو دخلت تسد الدنيا و وقتها مش هتعرف نتصرف
ليله…..انا بقول فكره يعني يمكن تنفع
رشيد….بلاش نجاذف هي فكره كويسه بس زي ما عشري قال ممكن الصرف يتسد خلينا نستني لبكره
ليله….تمام
نعيمه….الجو برد شويه مش كده
ايه….انا بردانه ايوه
سلمي….الثلج في كل مكان
سلامه….الجو نفسه برد مش بس عشان الثلج
ليله….انا هموت و انام شويه منمتش من اول امبارح
ايمان…..ولا انا اصلا كلنا منمناش كويس
عسال….طيب ما تطلعوا تناموا شويه و احنا هنا صاحين
ليله….لا لا انا صاحيه
ايمان….وانا مش عايزه اطلع فوق بصراحه لسه اعصابي بايظه من الزلزال
نادين…..انا عايزه انام
نعيمه….تيجي تطلعي فوق و هفضل معاكي متخافيش
نادين….لا فوق لا
سلامه…..طيب خليكي هنا اسندي راسك و نامي
نادين…..مش هعرف انام و انا خايفه
ايمان…..لو حصل حاجه احنا جنبك و بعدين هتصحي علي صوت ميلو هو مش بيفصل انا هاجي جنبك كمان
سلامه…..اطلع اجيبلكم حاجه تتغطوا بيها ماشي
ايمان….طيب
قعدوا البنات كل واحد في مكان و قعدت ايمان جنب نادين مسكت فيها نادين و سندت علي كتفها
ايمان….نامي يلا شويه انا كمان هنام معاكي
بصت نادين علي عسال اول ما لاقته باصص عليها بسرعه غمضت عينها
عشري…..ليله تعالي اقعدي هنا جنبهم
ليله….لا لا انا كويسه
عشري…..مين فينا اللي عنيد الوقت شكلك تعبانه تعالي يلا الجو هدي تاني بره ارتاحي شويه
ليله….شويه طيب خليني اقعد هنا
قعدت ليله علي كرسي البار و مسكت علبه سجاير بتاعت ايمان خدت سيجاره و لغتها و فضلت مدياهم ضهرها.
نزل سلامه بكام غطاء خفيف.
سلامه…..سلمي خدي دي انتي و ايه
سلمي…..شكراً يا سلامه
عسال….قرب منه هات واحده لايمي و نادين
سلامه….امسك
قرب عسال من ايمان
عسال…..اغطيكم و لا تمام
ايمان….معلش أفرادها عشان اللي بتقول خايفه تنام واضح انها سافرت
عسال….بابتسامه اه سافرت فعلاً
فرد الغطاء مسكت ايمان طرفه اتغطت و هو غطي نادين كويس و بعدين بعد تاني وقف مكانه
قعدت نعيمه علي ثاني سلمه و حطت الغطاء علي ضهرها
فضل…..انتي قاعده كده ليه هتنامي علي السلم
نعيمه….لا انا مش هنام خلاص بس بردانه
حسان….ايه ده انتي قاعده كده ليه تعالي تعالي مكاني
نعيمه….لا والله انا مرتاحه هنا خليك
حسان….قومي بس
نعيمه….والله مرتاحه هنا خليك
حسان…..هتفضلي قاعده علي السلم
نعيمه….في كذا مكان فاضي جنبهم بس انا مرتاحه والله خليك انت
حسان…..طيب زي ما تحبي
فضل…..قرب منها طيب قومي اطلعي نامي فوق
نعيمه….لا لوحدي لا
فضل….يعني لو في حاجه حصلت هنسيبك قومي يلا اطلعي
نعيمه….لا مش كده بس انا مرتاحه صدقني لو تعبت هقوم
فضل….ماشي عايزه اي حاجه تشربيها
نعيمه….لا لا شكراً
فضل…..ماشي
المكان تحت كان مش كبير اوي الڤيلا كلها أصلاً مكانتش كبيره حتي الاوض كانت مساحتها مش كبيره يا دوب كل اوضه فيها سريرين و تحت كان في ثلاث كنبات شبه حرف ال U لكن منفصلين عن بعض وكرسين.
سلمي و ايه كانوا علي كنبه و ايمي و نادين علي كنبه و عشري قاعد علي كنبه لوحده حسان كان قاعد علي كرسي و رشيد قاعد علي كرسي فضل كان واقف جنب عسال بيشربوا سجاير كل واحد فيهم ماسك موبايله
ليله عند كرسي البار و نعيمه علي السلم بتقاوم النوم نزل سلامه من فوق و هو حاطت علي كتفه غطاء خفيف
عشري….بابتسامه ايه بردت
سلامه….اه والله الجو وحش اوي حاسس أننا في شهر واحد اجيبلك غطاء
عشري….لا انا تمام
راح سلامه عند الشباك اللي وراء كرسي سلمي و ايه و فضل يبص علي بره بعدم تصديق
سلامه….يا نهار اسود دي الدنيا بايظه خالص
حسان….بنوم هتفضل واقف كده هتتوتر
سلامه….مش متوتر والله بس المنظر صعب اوي
عشري….اطمنت علي امك
سلامه….اه كنت بكلامها فوق بتسلم عليكم و قلقانه اوي بتقولي الدنيا متبهدله
عشري…..ربنا يستر و تعدي علي خير
رشيد…..اتصلت بيهم صحيح في المعرض و قولتهم يطلعوا العربيات كلها الدور اللي فوق
بصلوا سلامه بصدمه
سلامه….يا نهار اسود انا نسيت المعرض باظ
رشيد….لا الحمد لله كله تمام متقلقش
سلامه….الحمد لله و انتوا محدش فيكم اطمن علي الكافيهات
فضل….في واحد فيهم غرق بس بسيطه يعني
سلامه…..يعني ايه بسيطه في حاجه باظت
عشري….كراسي و ترابيزات و شمسيات بعتوا الشباب الصور بس كله تمام يعني لحقوا الدنيا
سلامه….الحمد لله بقولك ايه شوف نعيمه لو تطلع فوق ولا تيجي هنا حرام حسيت انها كانت نايمه وانا نازل
فضل…..مش راضيه تقوم شكلها خايفه
راح فضل ناحيتها و قرب منها.
فضل…..يا استاذه نوني
فتحت عينها بسرعه و بصتلوا
نعيمه….ايه انا صاحيه
فضل….بابتسامه اه واضح
نعيمه…..بضحكه هاديه باين عليا اني بقاوح النوم
فضل…..اوي تعالي هناك جنبهم
نعيمه….انا مرتاحه هنا والله
فضل…..لو مقوتيش هقعد جنبك و افضل ارغي معاكي عشان متناميش لحد ما تزهقي و تقومي
نعيمه….يا سيدي تنور خليك
فضل….وادي قاعده اما نشوف اخرتها معاكي و مع الجو
قعد فضل علي اول درجه تحتها.
نعيمه….تفتكر الوضع ده ممكن ياخد قد ايه
فضل…..والله الوضع ده يتلحق علي طول بس في حالة لو الجو استقر لكن طول ما السيول دي شغاله محدش هيعرف يعمل حاجه
نعيمه…امممم يعني لو مثلاً بكره الجو بقي احسن ممكن الدنيا تظبط بسرعه
فضل….بابتسامه والله شكلك خايفه الاجازه تروح منك
نعيمه….هو أولاً انا خايفه و مش حابه الوضع يسوء اكتر من كده بس ان جيت للحق صراحه اه اصل انت متعرفش انا كنت مستنيه الاجازه دي و متحمسه ليها قد ايه
فضل….ليه يعني بقالك كتير مسافرتيش
نعيمه….لا خالص بس احنا عموما مش بنحب نسافر في الصيف ده أولاً ثانياً ده وقت السفر بتاعنا كمان الفتره اللي فاتت مكانتش احسن حاجه كنت حاسه اني مضغوطه شويه و عايزه اغير جو بس للاسف ملحقتش
فضل……طيب قوليلي ايه اللي كان مخليكي مضغوطه
خدت نفس طويل و بصت جنبها
نعيمه….عادي ضغوط الحياه العاديه و الشغل و المشاكل كده يعني
فضل…..علي فكره لو حابه تتكلمي انا ممكن اسمعك عادي
نعيمه….بابتسامه هو صراحه انا معنديش مشكله في الكلام خالص بس المشكله اني حاسه ان عيني بتقفل و ثواني بالظبط هتلاقيني بتكلم معاك علي توم اند چيري
فضل….بضحك اه شكلك سافرتي أصلاً و مش معانا علي الارض الوقت
نعيمه…..بضحك شكلي والله
فضل….طيب ممكن تطلعي أو تروحي تنامي جنبهم
نعيمه….والله انا مرتاحه هنا حاسه المكان دفا عشان السجاد خليني هنا واول ما اقفل خالص هقوم
فضل…ماشي
نعيمه….روح انت اقعد هناك
فضل….لا انا قاعد جنبك أصلاً حتي الشباب شكلهم هينام
نعيمه…..انتوا منمتوش كويس ولا ايه
فضل….لا لحد اربعه الفجر كنا صاحين علي ما طلعنا واتكلمتا شويه بقت خمسه و بعد كده صحينا علي الصوت اللي بره و شويه و انتوا وصلتوا وطبعاً الايام اللي فاتت مكناش بننام كويس
نعيمه….صحيح انتوا بقالكم كتير هنا
فضل…..اربع ايام انهارده كان خامس يوم و المفروض كنا هنرجع فيه
نعيمه….ليكم نصيب تقعدوا تاني
فضل….فعلاً
غمض حسان عينه و نام هو رشيد عشري كمان عينه كانت حمراء و كان مصدع عايز ينام كل شويه عينه تروح علي الباب و يرجع يبص علي ليله
تعب سلامه من الوقفه و لف قعد جنب ايه و سلمي
أما عسال فا كان قاعد علي كرسي من كراسي السفره و عينه شبه مش بتتشال عن نادين
قام عسال في نفس الوقت اللي قام فيه عشري
راح عسال من غير تفكير قعد بهدوء جنب نادين ابتسم ابتسامه بسيطه و سند رأسه علي الكنبه غمض عينه.
قرب عشري من ليله كانت سانده أيدها علي البار و حاطه راسها و نامت
عشري….بهدوء ليله ليله قومي من هنا
ليله….فتحت بهدوء في ايه في حاجه حصلت
عشري….لا مفيش انتي نمتي علي البار تعالي نامي هناك
ليله….لا لا مش عايزه انا هنا كويسه
عشري….قومي اسمعي الكلام لو روحتي في النوم هتقعي تعالي
قامت ليله بهدوء راحت قعدت علي الكنبه و بصت عليهم لقت الكل تقريباً نام فتح عسال عينه
عسال….في حاجه ولا ايه
عشري….لا نامت علي البار و هتقع تنام هنا احسن
عسال…..في غطاء هناك اهو سلامه حاطه زياده سابه ليها
عشري….ماشي
راح عشري جاب الغطاء و فرده عليها فتحت عينها خدته منه و غطت نفسها كويس
مسك عشري الريموت و قلل الصوت شويه و قعد يحول و يشوف لو في اي حاجه حصلت تاني .
ربع ساعه و كان الكل نايم في سابع نومه
و بعد مرور خمس ساعات متواصله في تمام الساعه العاشره مساءاً……
و للحديث بقيه….
