ابن ليل

دانه….اتمني ده اللي يحصل يادارين

غمضت دره عينها وخدت نفس طويل وبعدين رسمت علي وشها ابتسامه بسيطه

دره…..انا جيت اتأخرت عليكم.

دارين…..لا خالص يا مامي تعالي ارتاحي شويه بقي

دره….جيبتلكم بقي نسكافيه وكرواسون ريحتهم تجنن❣️ يلا كلوا

خدت كل بنت كوبايه النسكافيه وبدأوا ياكلوا في صمت

شربت دره من النسكافيه وهي عينها رايحه جايه وجواها كلام عايزه تتكلم فيه معاهم💔

سابت من ايدها النسكافيه وفضلت ماسكه الكوبايه بين ايدها وهي عينها عليها وبعدين رفعت راسها ببطئ

دره…احممم بنات انا عايزه اتكلم معاكم في حاجه

دارين…خير يا مامي في ايه؟

دره….يعني انا سمعتكم من غير قصد وانتوا بتتكلموا

بصوا البنات لبعض

دره…..انا حكيتلكم كتير عن امي وابويا واخويا وقولتلكم ان مفيش حد في طيبه قلبهم صدقوني لما قولتلكم كده مكنتش بكدب عليكم هما فعلاً طيبين واحن حد ممكن تقابلوا في حياتكم يعني ناس كده مش موجودين الوقت ولو علي اللي حاصل بينا من سنين يمكن يكون حقهم لاني زمان قررت اني ابعد عنهم واختار حياتي اه مكنتش قاصده البعد إلا لما هما رفضوا خالص جوازي من ابوكم بس كنت مضطره لاني عرفت ان وجودي وسطهم وهو في بينا خلاف مش هتبقي حاجه كويسه لا ليا ولا ليهم وبعدها فضلوا مقاطعيني بس ده مش معناه انهم وحشين صدقوني انا واثقه من حبهم ليا فا عشان كده كل اللي طلباه منكم هو حاجه واحده وانا عارفه انكم هتقدروا تعملوها

دانه….ايه هي يا مامي

دره…..لما نوصل يا دانه مهما حصل بينا مش عيزاكم تدخلوا ابداً مهما قالوا ومهما عملوا متدخلوش

بصتلها دانه بإحراج.

دانه….مامي انا مكنتش اقصد انا بس

دره….بمقاطعه عارفه يا دانه انك متقصديش وعارفه كمان انك بتحبيني بس زي ما انتي بتحبيني انا كمان بحبهم واكيد هزعل لو زعلتوهم انا عارفه يا حبيبه قلبي ان انتي واخواتك مش هتحبوا ابداً اني اتحط في موقف مش حلو بس سيبوني مني ليهم بلاش انتوا تكونوا طرف انا ربيتكم احسن تربيه مش عايزه حد يقول انكم واقفين قصاد جدكم وجدتكم وبتردوا عليهم

دارين…..مامي احنا مقدرين كل ده بس كمان احنا شايفين ان في ضغط كبير عليكي ومش حابين حد يزعلك

دره…..لو علي الزعل يا دارين فا انا قلبي مليان واتعودت خلاص بس مهما حصل بيني وبينهم انا واثقه ان كل ده هيعدي دول عشرين سنه من الزعل يا دارين يعني يوم ما يحصل مواجهه اكيد مش هتبقي بسيطه سيبوني بس انا أحل كل حاجه ومهما سمعتوا متدخلوش اتفقنا