لقاء كارثي

نادين…لا عشان هو مستفز يا ليله و عشان انا اترعبت بجد

ليله….هو قالي اللي حصل و قالي انه متوقعش انك تفهمي غلط و بعدين اتسحل مع زوزو و حماده و محمود ما انتي عرفاهم يموتوا في الرغي و اي حد بيتسحل معاهم

نادين…..ليله ميدو عمره ما بعتلي رساله زي دي تخيلي افتح رساله بعد اتصالين و الاقيه كاتبلي نادين ردي بسرعه و بعدين مكانش فات وقت بالظبط اربع دقايق لما خرجت من الحمام و شوفت الموبايل اتصل نص ساعه مفيش رد ولا بيكنسل حتي افصل واتصل افصل واتصل تخيلي بقي انا في النص ساعه دي فكرت في كام حاجه و حشه و خوفت اتصل علي سلامه او مامته و اقلقهم

ليله…..طيل ما انتي عارفه انه اكيد راح لزوزو

نادين….انا نسيت خالص موضوع زوزو ده يا ليله مجاش في بالي اصلا انا مركزتش غير مع رسالته ليه بيبعتلي يقولي ردي بسرعه حصل ايه معرفش راح من بالي كل حاجه انا متصله بيه فوق الخمسين مره و في الاخر يرد يقولي كنت لسه هتصل بيكي انا قولت فيكي حاجه من كميه الاتصال دي طب ارد عليه اقولوا ايه

ليله…..ماهو اكيد مترجمش ان الرساله خوفتك و هو اللي قلق اكيد عليكي من الاتصال ده كله

نادين…..طيب خليه بقي

ليله…..يابت بطلي عند و ردي عليه اتكلمي معاه براحه الموضوع بسيط

نادين….لا مش بسيط يا ليله انا لما بكنسل علي ميدو كذا مره مش بيسكت لما بروح المخزن و موبايلي بيبقي خارج التغطيه بيتعصب بقيت اروح ولو هلاقي نفسي بطول كل شويه اخرج بره اطمنوا و ارجع ممنوع موبايلي يفصل لازم الباور بنك يكون معايا ديماً و انا عشان مقلقهوش و اتفادي اي زعل او مشكله بسيطه بسمع كلامه و في الاخر هو يخرج بكل برود يقولي نسيت الموبايل في العربيه لا اسفه مش قابله اعتذاره انا اصلا صاحيه مودي زي الزفت

ليله…..بابتسامه ما باين علي صوتك هرمونات اكيد

نادين…..مش هرمونات يا ليله بس مودي مش حلو و اتقفلت اكتر بسببه

ليله….طيب ممكن و حياتي عندك تردي و ياستي افضلي زعلانه زي ما انتي بس ردي عليه و طمنيه و عاتبيه كمان بس متزعليهوش انا بحب ميدو هاجي اروقك

نادين…..لا والله ماهرد الوقت خالص عشان هنتخانق صدقيني

ليله….احيه انتي بتحلفي يابت ما خلاص الراجل اعتذر عديها عادي و بعدين زعلتي كام ساعه اهو واكيد مش هيكررها تاني

نادين…..ليله بالله عليكي اقفلي و سيبيني و الله مخنوقه